Nthanthi 12 - Tonga Bible 1986

¹ We yose wakwanja kuvwiya watanja chinjeru, kweni mweniyo watinkha kuchenjezgeka ndi bereŵeza.

² Munthu wamampha wasaniya mwaŵi kutuwa ku Ambuya, kweni munthu wa vipangu viheni ŵatumususka.

³ Munthu kuti wakhozgeka ndi mphurupuru cha, kweni msisi wa urunji kuti underezgekengepo cha.

⁴ Muwoli wamampha nchisoti cha mrumi wake, kweni mweniyo watole soni we uli nkhuvunda mu viwanga vya mrumi wake.

⁵ Maghanaghanu gha murunji nga kurunjika; vipangu vya wamphulupulu vyakupusika.

⁶ Mazu gha wa mphurupulu ghakhazga ndopa, kweni mlomo wa akunyoroka utaska ŵanthu.

⁷ Wamphulupulu ŵathereskeka ndipo ŵatuŵapo so cha, kweni nyumba ya murunji yikamanga.

⁸ Munthu warumbika kwakuyana ndi chinjeru chake chamampha, kweni mweniyo ngwa muwongo wakulandizga wasekeka.

⁹ Wamamphaku ndi munthu wakujiyuyuwa mweniyo watijitataliya kwakuruska mweniyo watijipaska ula kweni walivi chiŵande.

¹⁰ Munthu murunji waphwere umoyo wa chiŵetu chake, kweni lisungu la wamphulupulu ndi nkhaza.

¹¹ Mweniyo walima munda wake wakaŵanga ndi viŵande vinandi, kweni mweniyo wandondoloska vyambura kanthu walivi chinjeru.

¹² Sonjo wa nthazi wa wamphulupulu wabwanganduka, kweni msisi wa murunji utuma gwa.

¹³ Munthu muheni watghika ndi kusovya kwa milomo yake, kweni murunji wathaŵako ku suzgu.

¹⁴ Kutuwa ku chipasi cha mazu ghake munthu wakhorweskeka ndi umampha, ndipo nchitu ya janja la munthu yiwere ku mweneko.

¹⁵ Nthowa ya wakupusa njamampha mu maso gha mweneko, kweni munthu wazeru wategherezga ku chisambizgu.

¹⁶ Kukalipa kwa wakupusa kuziŵika ruŵi, kweni munthu wakuphwere wapatana ndi kutukana.

¹⁷ Yo wakamba uneneska wapaska ukaboni wakuneneskadi, kweni kaboni mutesi wakamba kupusika.

¹⁸ Walipo mweniyo mazu ghake ngaruŵi ghe uli nkhulasa kwa lipanga, kweni lilime la wazeru lituza ndi kuchizga.

¹⁹ Milomo ya uneneska yijaliriya muyaya, kweni lilime lakupusika nda nyengo yimanavi.

²⁰ Kupusika kwe mu mtima waku wo ŵapanga uheni, kweni ŵeniwo ŵarongoso umampha ŵendi kukondwa.

²¹ Wakurunjika kuti katumuwiya kaheni cha, kweni ŵaheni ŵazazika ndi suzgu.

²² Milomo yitesi mbukazuzi ku Ambuya, kweni ŵeniwo ŵachita kwamagomekegeka ndi likondwa lawo.

²³ Munthu wakuphwere wabisa chinjeru chake, kweni ŵakupusa ŵamemeza kupusa kwawo.

²⁴ Janja la wakutakataka likausanga, penipo mukata wakaŵikikanga ku nchitu yakuchizgika.

²⁵ Maghanughanu mu mtima wa munthu ghatimusiskiya pasi, kweni limazu lamampha litumukondweska.

²⁶ Munthu murunji watuwako ku uheni, kweni nthowa ya wamphulupulu yituŵalandizga.

²⁷ Munthu mukata kuti wakayikonga cha nyama yake, kweni munthu wakutakataka yo wakalondanga chuma chakuzirwa.

²⁸ Mu nthowa ya urunji mwe umoyo, kweni nthowa ya kunanga yilongozge ku nyifwa.