Nthanthi 11 - Tonga Bible 1986

Ŵarunji ndi ŵalakwi

¹ Mweso wakupusika mbukazuzi ku Ambuya, kweni mweso wakunyoroka ndi likondwa lawo.

² Asani patuza kujikuzga pavuli patuza chilengesku; kweni pamoza ndi wakujiyuyuwa ndi zeru.

³ Unthu wakufikapo wa wakunyoroka utuŵarongozga, kweni kubende kwa ŵakunyenga kutuŵananga.

⁴ Mauromba kuti ghatanduwa cha mu zuŵa la ukari, kweni urunji upozomoska ku nyifwa.

⁵ Urunji wa wambura kalema unyoroska nthowa yake, kweni wa mphulupulu zitumuwiska mphulupulu za mweneko.

⁶ Urunji wa wakunyoroka utuwapozomoska, kweni ŵakunyenga ŵakoloka umukoli, ndi makhumbiru ghawo.

⁷ Asani wamphurupuru wafwa, gomezgu lake liwala, ndipo gomezgu la ŵambura uchiuta ligota pawaka.

⁸ Murunji wataskika ku suzgu, ndipo wamphurupuru waseremo mu malo ghake.

⁹ Ndi mlomo wake munthu yo ngwambura kuziŵa Chiuta wanguziŵakunanga muzengezgani wake, kweni ndi chinjeru ŵarunji ŵataskika.

¹⁰ Asani vinthu vyose vituŵa umampha ndi murunji msumba ukondwa; ndipo asani wamphulupulu wafwa patuŵa chiwawa chakukondwa.

¹¹ Ndi chitumbiku cha wakunyoroka msumba ukuzgika, kweni uthereskeka ndi mlomo wa wamphulupulu.

¹² Yo wayuyuwa muzengezgani wake walivi chinjeru, kweni munthu wakuwamo waja chisisi.

¹³ Yo wayingayinga uli ndi mwendanato wasumuwa vya kuubende, kweni mweniyo ngwamagomekezgeka mu mzimu wasunga kanthu kukabisa.

¹⁴ Penipo palivi mulongizgi ŵanthu ŵatuwa; kweni mu unandi wa zinduna mwe chimangu.

¹⁵ Yo wajariya unkhoswe mlendo wakakomwanga nawo, kweni mweniyo watinkha unkhoswe we umampha.

¹⁶ Munthukazi wa wezi waronde ulemu, ndi ŵanthu ŵandeu ŵasaniya uromba.

¹⁷ Munthu mweniyo ngwa wezi watijisakatiska, kweni munthu mukari watijipweteka yija.

¹⁸ Munthu wa mphurupu watanduwa mphotu yakupusika, kweni mweniyo wamija urunji waronde mphotu yeneko.

¹⁹ Mweniyo wakoreska mu urunji wakajanga wamoyo, kweni mweniyo wachimbiriya uheni wakafwanga.

²⁰ Ŵanthu ŵa miwongo yakurandizga mbukazuzi ku Ambuya, kweni wo mbakurunjika mu nthowa zawo wakondwa nawo.

²¹ Uziŵiske, munthu muheni kuti walekengepo cha kulangika, kweni ŵeniwo mbarunji wakataskikanga.

²² Uli ndi mphete ya golide pa mphunu ya nkhumba ndimu walili munthukazi wakutowa yo walivi kateskeru.

²³ Kunweka kwamurunji kumaliya mu umampha pe, gomezgu la wa mphurupuru mu ukari.

²⁴ Munthu yumoza wapaska kwa wanangwa, kweni vyose vikuwa kusambasa ukongwa; munyake wakaniriya chenicho wangapaska, ndipo wakomwa vichimusoŵa.

²⁵ Munthu mwanangwa wakalemeranga, ndipo mweniyo wadiriya maji nayo wakadirikiyanga maji.

²⁶ Ŵanthu ŵatimutemba mweniyo wakaniriya kurgha, kweni thumbiku le pa mutu waku yo waguliska kurgha.

²⁷ Mweniyo wapenja umampha kwarwana wapenja mwaŵi, kweni uheni utuza kwaku yo watuupenja.

²⁸ Mweniyo wagomekezga mu uromba wake wakamilanga, kweni murunji watipitiyenge uli ndi jani liŵisi.

²⁹ Mweniyo wasuzga ŵa nyumba yako wakahalanga mphepo, ndipo wakupusa wakaŵanga muteŵeti wa ŵazeru.

³⁰ Chipasi cha ŵakurunjika ndi muti wa umoyo, kweni uchikanamaranga utuzgapo maumoyo.

³¹ Asani murunji walonde thayu pa charu, naku wamphulupulu ndi muheni kuŵenge uli.