Nehemiya 5 - Tonga Bible 1986

Nehemiya wavikiriya ŵakusauka ŵakumangika

¹ Sono kunguwoneka nkhuta yikuru ya ŵanthu ndi ya ŵawoli ŵawo kuliriya pa ŵabali ŵawo ŵaYuda.

² Pakuti ŵengapo wo ŵakambanga kuti, “Pamoza ndi ŵana ŵidu ŵanthurumi ndi ŵanthukazi te ŵanandi: tiyeni tisaniye vyakurgha tirghenge ndi tikaŵanga ŵamoyo.”

³ Ŵengapo so wo ŵatinge, “Tichita pinyolo minda yidu, ndi minda ya mphereska, ndi nyumba zidu, kusaniya kurgha chifukwa cha chilala.”

⁴ Ndipo ŵengapo ŵeniwo ŵatinge, “Tabwereka ndrama za msonkho wa karonga wapa minda yidu ndi minda yidu ya mphereska.

⁵ Sono nyama ya maliŵavu ghidu yikozgana ndi ya ŵabali ŵidu, ŵana ŵidu ŵakozgana ndi ŵana ŵawo, kweni tichichizga ŵana ŵidu ŵanthurumi ndi ŵanthukazi kuŵasanduska ŵaŵanda, ndipo ŵana ŵidu ŵanthukazi ŵemu uŵanda kale; kweni kuti mazaza ngidu cha kutuzgapo ichi, pakuti minda yidu ndi minda ya mphereska vyemu manja gha ŵanthu ŵanyake.”

⁶ Ndingukaripa ukongwa ndinguti ndavwa nkhuta yo ndi mazu yagha.

⁷ Ndingujikhome fundu ndija, ndipo ndingutundula ŵaraŵara ndi zinduna. Ndinguti kwaku wo, “Imwe muchita phindu, we yose pa mwana munyake.” Ndipo ndinguchita unganu ukuru paku wo,

⁸ ndipo ndinguti kwaku wo, “Ifwe uli ndi penipo taŵiya ndi mwaŵi, tawezga ŵabali ŵidu ŵaYuda wo ŵanguguliskika ku mitundu kweni imwe so musaska ŵabali ŵinu kuti ŵaguliskike kwaku ifwe.” Ŵanguja chisisi, ŵengavi kuwona kakukambapo.

⁹ Viyo ine ndinguti, “Chinthu cho muchita kuti nchamampha cha. Si mutenere kwenda mu chopu chaku Chiuta widu kukanizga lirengu la mitundu yo njakupindikana nafwe?

¹⁰ Ndipo so ine ndi ŵabali ŵangu ndi ŵateŵeti ŵangu tituŵakongoleska ndrama ndi vyakurgha. Tiyeni tireke phindu ili,

¹¹ wezgiyani kwaku iwo msana wale minda yawo, minda yawo ya mphereska, miti yawo ya mafuta gha olive ndi nyumba zawo, ndi cha chichumi pe chumi cha ndrama, kurgha, vinyo, ndi mafuta vyenivyo mwaŵapananga.”

¹² Sono ŵanguti, “Tikawezganga ivi ndi kuwezgako kanthu kwaku wo cha. Tikachitanga mo wakambiya.” Ndipo ndingudana ŵazukuru, ndi ndinguŵarapiska kuchita kwakuyana ndi mo ŵapanganirana.

¹³ Ndipo ndingukung'untha so chiunu changu ndi ndinguti, “Viyo Chiuta wadikiskemo munthu we yose mu nyumba yake ndi mu nchitu yake yo warekenge kufiska phanganu lake, viyo ndimo wadikiskiyemo ndi kuŵa wambura kanthu.” Ndipo wumba wose unguti, “Ameni,” ndi ungukankhuska Ambuya. Ndipo ŵanthu ŵanguchita kwakuyana ndimo ŵangupanganirana.

¹⁴ Ndipo sono kwamba pa nyengo yo ndingumikika kuŵa mweruzgi wawo mura mu charu chaku Yuda, kwamba pa chirimika cha machumi ghaŵi (20) kwachifika ku chirimika cha machumi ghatatu pachanya viŵi (32) vyaku Arataserese karonga yo, virimika chumi ndi viŵi, nanga ndine nanga mbabali ŵangu tengavi kurgha kwakupaskika ndi karonga.

¹⁵ Ŵeruzgi ŵara ŵakudanga wo ŵengapo paurongo pangu ŵanguchitiska mphingu zizitu pa ŵanthu, ndipo ŵanguronda kurgha ndi vinyo ku ŵanthu, pamoza ndi mashekelo machumi ghanayi (40) gha siliva, ŵateŵeti ŵawo so ŵanguchita mitufu pa ŵanthu. Kweni ine kuti ndinguchita viyo cha, chifukwa chakopa Chiuta.

¹⁶ Ndipo so ndingungangamikiya pa nchitu ya linga ili, kuti ndingugula charu cha, ndipo ŵateŵeti ŵangu wose ŵanguwungana penipa kwachichita nchitu.

¹⁷ Kweni so wo ŵarghanga pa gome langu ŵanthurumi machumi pe chumi pachanya machumi ghankhonde (150) ŵaYuda ndi zinduna, pamoza ndi wo ŵanguza kwaku ifwe ŵakutuwa ku mitundu ya pafupi nafwe.

¹⁸ Sono vyo vingurongosoleke zuŵa limoza vyenga ng'ombe yimoza, ndi mberere zakuchita kusankhika zinkhonde ndi yimoza, nyoli nazu so zingurongosoleke ine, ndipo pa mazuŵa chumi kwenga supa zakuzala za vinyo; ndipuuli pa unandi waku viya vyose ndengavi kufumi ako vyakurgha vyakupaskika ku mweruzgi mura chifukwa uteŵeti wenga uzitu pa ŵanthu yaŵa.

¹⁹ Kumbukani chifukwa cha umampha wangu, a Chiuta wangu, vyose vyenivyo ndachitiya yaŵa ŵanthu.