Nehemiya 4 - Tonga Bible 1986

Ŵamawongo ŵati ŵarekeska kuzenga malinga

¹ Sono penipo Sanbalata wanguvwa kuti tazenganga linga lo wangukala ndi wangutoroma ukongwa ndi wanguŵatonyola ŵaYuda.

² Ndipo wanguti paurongo pa ŵabali ŵake ndi paurongo pa liŵanja la nkhondo la Samaria, “Ŵachitanji yaŵa ŵaYuda ŵakutomboloka? Kumbi ŵakawerezgiyangamo vinthu? Kumbi ŵakaperekanga mpasku? Kumbi ŵakamalanga kuchita pa zuŵa limoza? Kumbi ŵakawunjikanga so mya kuyituzga mu zindundu za kuviza, ndi yo yikufya mwenimo?”

³ Tobiya mwina Amoni wenga nayo pamoza, ndipo iyo wanguti, “Inya chenicho ŵazenga asani kambwe wakwerapo wakabwanganduwanga linga lo la mya!”

⁴ Vwani Chiuta widu mwe, pakuti tayeyeka, ŵawezgiyeni pa mitu yawo kuyeya kwawo ndipo muŵapereka kukuŵa kwamphuwa vyawo mu charu mwenimo iwo mbakukoreka umkoli.

⁵ Rekani kuwundirizga kulakwa kwawo ndi mungasisita mphulupuru yawo cha pakuti ŵakukarariskani paurongo pa ŵakuzenga.

⁶ Viyo tinguzenga linga, ndipo linga lose lingugumanizgika kuŵa limoza kwachifika pa msinkhu wake wa pakatikati. Pakuti ŵanthu ŵenga waphamphu kuchita nchitu.

⁷ Kweni penipo Sanbalata ndi Tobiya ndi Arabu ndi ŵina Amoni ndi Ashidodi ŵanguvwa kuti kurongoso kwa linga la Yerusalemu kwarutiriyanga ndi kuti vyakusweka vingwamba kujarika, ŵangukalipa ukongwa,

⁸ ndipo iwo wose ŵanguzomerezgana kuzachichita nkhondo ndi Yerusalemu ndi kuti ŵatimbanizge mitima ya ŵanthu ŵa mwenimo.

⁹ Ndipo tinguromba kwaku Chiuta widu, ndipo tingumika ŵalonda ŵakuŵateska iwo msana ndi usiku.

¹⁰ Kweni Yuda wanguti, “Kulimba kwa ŵakunyamuwa mphingu kutomboloka, ndipo pe viswaswa vinandi: kuti tingaziŵa kutata umampha pa linga ili cha.”

¹¹ Ndipo ŵamawongo ŵidu ŵanguti, “Kuti ŵakaziŵanga pamwenga kuwona naku cha ŵabuchiyenge ŵaka te mukati mwawo ndi kuŵakoso ndi kukanizga nchitu yawo.”

¹² Penipo ŵaYuda ŵeniwo ŵajanga pafupi nawo ŵanguti ŵaza ŵangutinene kuwerezgapo chumi kukamba, “Kutuliya ku malo ghose gho ŵajamo, ŵakazanga kuzachilimbana nafwe.”

¹³ Viyo mu malo gha pasi ukongwa ghakweru ku msana kwa linga, ndinguŵikamo ŵanthu mbumba ndi mbumba paku yija ndi malinga ghawo, mikondo yawo, ndi mauta ghawo.

¹⁴ Ndipo ndingulereska, ndi ndingusoka ndi ndingunene ŵaraŵara, ndi zinduna, ndi ŵanthu wose, “Mungawopanga cha. Kumbukani Ambuya, wo mbara ndi ŵakofya, ndipo imwe murwiye ŵabali ŵinu, ŵana ŵinu ŵanthurumi ndi ŵanthukazi, ŵawoli ŵinu ndi mizi yinu.”

¹⁵ Penipo ŵamawongo ŵidu ŵanguvwa kuti tachiziŵa ifwe ndi kuti Chiuta wayeya fundu yawo tose tinguwere ku linga, we yose ku nchitu yake.

¹⁶ Kwamba pa zuŵa leniliya kuya kunthazi, chigaŵa chimoza cha ŵateŵeti ŵangu ŵangutakataka pakuzenga, ndipo chigaŵa chinyake chinguskoma mikondo, zinguru, mauta ndi maraya gha chisulo; ndipo ŵarongozgi ŵanguma kuvuli kwa nyumba yaku Yuda,

¹⁷ ŵeniwo ŵazenganga linga. Wo ŵapinganga katundu ŵangupingizgika janja limoza katundu ku janja linyake ŵangukoleze chidya.

¹⁸ Ndipo we yose wa ŵakuzenga wangupinga chidya chake uku wazenga. Munthu wakumba mbata wenga pafupi nane.

¹⁹ Ndipo ndinguti ku ŵaraŵara ndi ku zinduna ndi ku ŵanthu wose, “Nchitu njikuru ndipo yatandazgika ukongwa, ndipo tapatukana pa linga, taŵa patali-patali.

²⁰ Mu malo mwenimo mukavwanga chizozu cha mbata, motokiyani kwaku ifwe kweniko. Chiuta widu wakatirwiyanga.”

²¹ Viyo tingutakataka nchitu, ndipo chigaŵa chimoza chaku wo ŵanguskoma mikondo kwamba pa matandakucha mpaka kutuwa kwa nyenyezi.

²² Ndingukamba so ku ŵanthu pa nyengo yeniyiya, “Munthu we yose ndi mteŵeti wake kumuchiye mu Yerusalemu, alinga kuti ŵaŵe ŵakutilonda ndi usiku ndi ŵatakatake ndi msana.”

²³ Viyo nanga ndine nanga mbabali ŵangu nanga mbateŵeti ŵangu, nanga mbalonda ŵeniwo ŵandilondonga pengavi yumoza waku ifwe wanguzuwa vyakuvwara, we yose wanguskoma chidya mu janja lake.