Nehemiya 2 - Tonga Bible 1986

Karonga Arataserese wazomerezga Nehemiya kuti wakamange linga la Yerusalemu

¹ Mumwezi wa Nisani mu chirimika cha machumi ghaŵi cha karonga Arataserese pa nyengo vinyo wangurongosoleke paurongo pake, ine ndinguteŵete karonga vinyo. Ndipo ine ndengavi kuŵapo wa chisungu kale paurongo pa karonga.

² Ndipo karonga wanguti kwangu, “Chifukwa chine chisku chako chazimbwa pakuti ulivi kutama? Aka kuti nkhanthu kanyake cha kweni nchisungu cha mtima.” Sono ndingofyerwa ukongwa.

³ Ndinguti ku karonga, “Waje wamoyo muyaya karonga! Chingareka uli kuzimbwa chisku changu, penipo msumba, malo gha miunda ya ada, nga uyiku ndi malikomo ghakufya ndi moto?”

⁴ Sono karonga wanguti kwangu, “Cho upempha nchine?” Viyo ndingupempha kwaku Chiuta wakuchanya.

⁵ Ndi ndinguti ku karonga, “Asani chingakondweska karonga ndi asani mteŵeti wake wangasaniya mwaŵi mu maso ghinu kuti munditume ku Yuda, ku msumba wa miunda ya ada kuti nkhazenge so.”

⁶ Ndipo karonga wanguti kwangu (fumukazi yinguja pafupi nayo), “Wamujako mazuŵa ghalinga, ndipo wamuwe zuŵanji?” Viyo chingukondweska karonga kundituma ndipo ndingumuteme nyengo.

⁷ Ndipo ndinguti ku karonga, “Asani chingakondweska karonga, mundipaske ŵakalata ŵakuya ku ŵeruzgi, ŵara ŵa chigaŵa chiya kusirgha liya la msinji wo, kuti ŵakandijuliye nthowa kwachiporotamo mpaka nkhafike ku Yuda;

⁸ ndi kalata kwaku Asafi msungi wa lusuwa la miti la karonga kuti wakandipaske miti yakuchitiya mphanjizgu za malikomo gha linga la kasopi ndi za nyumba yo ndamujamo.” Ndipo karonga wangundipaska vyenivyo ndingupempha pakuti janja lawezi laku Chiuta wangu lenga paku ine.

⁹ Sono ndinguza ku ŵeruzgi ŵara ŵa chigaŵa cha kusirgha liya la msinji, ndinguŵapaska kalata wa karonga, sono karonga pamoza nane wangutuma ŵara ŵa ŵankhondo ndi ŵakukwere pa ŵakavalo.

¹⁰ Kweni penipo Sanbalata mwina Horono ndi Tobiya mteŵeti mwina Amoni, ŵanguti ŵavwa ichi, chinguŵakalipiska ukongwa kuti kwaza munthu yo wapukwa makani gha ŵana ŵaku Yisraele.

¹¹ Viyo ndinguza ku Yerusalemu ndenga muwa mazuŵa ghatatu.

¹² Sono ndingusoka ndi usiku, ine pamoza ndi ŵanthurumi ŵamanavi, ndipo ndengavi kuneniyapo yumoza cho Chiuta wangu wanguŵika mu mtima wangu kwachichitiya Yerusalemu. Pengavi chinyama chinyake pamoza nane kweni cho ndingukwelapo pe.

¹³ Ndingutuwa ndi usiku kuya ku likomo la Dambo kuya ku chisima cha Kambe ndi ku likomo la Urongo ndipo ndingusandasanda linga la Yerusalemu lenilo lingugumukiya pasi ndi malikomo ghake gho ghangufya ndi moto.

¹⁴ Pavuli ndingulutiriya ku likomo la Chisima ndi ku Thaŵali la karonga; kweni kuwa kwengavi malo ghakuprortako chinyama cho ndingukwerapo ine.

¹⁵ Pavuli ndingukwere kudambo ndi usiku ndingusanda linga, lo; pavuli ndinguwere kuvuli ndi ndinguserere pa likomo la Dambo, viyo ndinguweko.

¹⁶ Ndipo ŵamazaza ŵengavi kuziŵa ko ndinguya ndi cho ndachitanga, ndipo ndenga ndindaŵanene ŵaYuda, ŵazukuru, ŵakuzirwa ŵamazaza ndi wose yo ŵenga ŵakuchita mlimu.

¹⁷ Pavuli ndinguti kwaku wo, “Muwona suzgo yo tilimu, mo Yerusalemu walili ngwakuphwanyika ndi malikomo ghake ghakufya. Zaninga tizenge linga la Yerusalemu, alinga tireke kuwereka ndi lilengu.”

¹⁸ Ndipo ndinguŵanene gha janja laku Chiuta wangu lo lenga pamoza nane kutichitiya vyamampha, ndi so mazu gha karonga gho wangundiŵereŵete. Ndipo iwo ŵanguti, “Tiyeni tipamphuke tizenge.” Viyo ŵangulimbiska manja ghawo, pa mlimu uwu wamampha.

¹⁹ Kweni penipo Sanbalata mwina Horono, ndi Tobiya mteŵeti mwina Amoni, ndi Geshemu muArabu ŵanguti ŵachivwa, ŵangutiseka ndi ŵangutiyeya ndi ŵanguti, “Nchinthu uli ichi cho muchita? Kumbi mugalukiya karonga?”

²⁰ Sono ine ndinguŵamuka, “Chiuta wakuchanya wakatipundiskanga ndipo ifwe taŵateŵeti ŵake tikapamphukanga nditikazenganga: kweni imwe mulivi phande pamwenga mazaza pamwenga chikumbusku mu Yerusalemu.”