Nehemiya 1 - Tonga Bible 1986

Nehemiya warombe ŵaYisraele ku Ambuya

¹ Mazu ghaku Nehemiya mwana waku Hakaliya. Sono kunguwoneka mu mwezi wa Chisleve, mu chirimika cha machumi ghaŵi, penipo ndenga mu Susa, msumba ukuru,

² kuti Hanani, yumoza wa ŵabali ŵangu wanguza ndi ŵanthu ŵanyake kutuwa ku Yuda; ndipo ndinguŵafumba gha ŵaYuda wo ŵenga ŵachalipo ŵamoyo wo ŵanguthaŵa kuyoleke ku umkoli: ndi so gha Yerusalemu.

³ Ndipo iwo ŵanguti kwaku ine, “Wo ŵachalipo ŵamoyo mu charu chiya wo ŵanguthaŵa kuyoleke ku umkoli ŵemu suzgu yikuru ndi chilengesku; linga la Yerusalemu likugumukiya pasi, ndipo malikomo ghake ghakufya ndi moto.”

⁴ Ndinguti ndavwa mazu yagha ndinguja ndi ndinguliya, ndipo ndingutenje mazuŵa ghanandi; ndipo ndingulutiriya kufunga ndi kuromba paurongo paku Chiuta wa kuchanya.

⁵ Ndipo ndinguti, “Ambuya Chiuta wa kuchanya, Chiuta mukuru ndi wakofya mweniyo wasunga phanganu ndi chanju chizirima ndi wo ŵatumwanja ndi kusunga marangu ghake;

⁶ chonde tegherezgani ndi gutu linu, ndi lereskani ndi maso ghinu kuti muvwe rombu la mteŵeti winu lo ndiromba sono paurongo pinu msana ndi usiku, kurombe ŵanthu ŵaku Yisraele wo mbateŵeti ŵinu, lakuzomera maulakwi gha ŵanthu ŵaku Yisraele gho talakwiya imwe. Inya, ine ndi nyumba ya ada talakwa.

⁷ Tachita kwakuwo ukongwa paku imwe, ndipo kuti tisunga marangu cha, nanga ndi malangulu ndi vyeruzgu vyo mungulanguliya Mosese mteŵeti winu.

⁸ “Kumbukani mazu ghinu gho mungulanguliya mteŵeti winu Mosese ghakuti, ‘Asani mukaŵanga ŵambura magomekezgeka ndikakumbininiskiyaninga mu mitundu ya ŵanthu;

⁹ kweni asani mukaweriyanga kwangu ndi kusunga marangu ndi kughachita, chingana kumbininiskika kwinu kungalutiriya ku midengwendi yakutali ndikaŵawunjikanga pamoza kutuwa kweniko ndi kuza nawo ku malo gho ndasankha kuwandiska zina langu kweniko?’

¹⁰ Yaŵa mbateŵeti ŵinu ndi ŵanthu ŵinu wo munguwombo ndi nthazi zinu zikuru ndi janja linu lakulimba.

¹¹ Ambuya gutu linu litegherezge ku rombu la mteŵeti winu ndi ku rombu la ŵateŵeti ŵinu wo ŵakondwere mukopa zina linu; ndipo mumupundiske mteŵeti winu ndipo mumuchitiye lisunge mu maso ghaku uyo munthu.” Pa nyengo yo ndenga wakupereka nkhombo ya karonga.