Mika 7 - Tonga Bible 1986

Chitima chingusanduka chigomezgu

¹ Owe ine! Pakuti ndaŵa nge ndi vipasi vyo vyavunika ndi chihanya, nge ndi vipasi vyakujaliya vuli pavuna, kulivi mphereska zakurgha, kulivi nkhuyu zakwamba kufya zo ndingakhumba.

² Ŵarunji ŵakumara pa charu, ndipo palivi murunji mukati muŵanthu; wose ŵalindizga ndopa; ndipo yose wasaka mbali wake ndi ukondi.

³ Manja ghawo ghe paku chonchiheni, kuchichita ndi phamphu; ŵakaronga ndiŵeruzgi ŵapenja vinda, ndi munthu wakuziŵa wakamba khumbu liheni la mu mtima wake; viyo ŵatiuchita pamoza.

⁴ Wamampha waku wo walingana ndi chatata, wakunyoroka ukongwa waku iwo walingana ndi lisitu la minga. Zuŵa la ŵalonda ŵawo, ndi la chilangu chawo; laza sono, kutimbanyika kwa vinjeru vyawo kwafika.

⁵ Mungagomezganga muzengezgani winu cha, mungagomezganga mubwezi cha; rondani makhomo gha mlomo winu nanga nkhu muwoli wako yo wagona mu chifuŵa chako;

⁶ pakuti mwana munthurumi wayuyuwa awiske, mwana munthukazi wayuyuwa anyina, mukumwana wayukiya apongozi ŵake; ŵarwani ŵa munthu mbanthu ŵa mu nyumba yake.

⁷ Kweni ine, ndilereskenge kwa Ambuya, ndilindizgenge Chiuta yo ndi mtaski wangu; Chiuta wangu wakandivwanga.

⁸ Mungasekeriyanga paku ine cha, mwa ŵarwani ŵangu, ndichiwa, nkhayukanga; ndichija mu mdima, Ambuya akaŵanga ukweru kwaku ine.

⁹ Nkhakunthiyangapo kandundu ka Ambuya chifukwa ndaŵanangiya, mpaka andikambiye mlando wangu, ndi kunderuzga. Akanditoriyanga ku ukweru; nkhawonanga utaski wake.

¹⁰ Viyo murwani wanguwakawonanga, ndipo soni zikonge yo wanguti kwaku ine, “Ŵepani Ambuya Chiuta wako?” Maso ghangu ghamudodoleskenge; sono wakandirizgikiyenge pasi nge ndi dongo lamu gurwi.

¹¹ Zuŵa lakuzenge malinga ghako! Mu zuŵa liya mphaka yikatandaulikanga ukongwa.

¹² Mu zuŵa liya wakazanga kwaku iwe, kutuwa ku Asiriya mpaka ku Egipiti, ndi kutuwa ku Egipiti kufika ku Msinji, kutuwa ku nyanja mpaka ku nyanja, kutuwa ku phiri mpaka ku phiri linyake;

¹³ kweni charu chikaŵanga chakupasuka chifukwa cha ŵakujamo ŵake, chifukwa cha vyakutuwa mu milimu yawo.

¹⁴ Liskani ŵanthu ŵinu ndi ndodo yinu, mskambu winu wo mwasankha wo uja mu lisuwa mukati mu charu cha minda; muwuleke ukarghenge mu Bashani ndi mu Gileada nge ndi mu mazuŵa gha kali.

¹⁵ Nge ndi mu mazuŵa pomwa tuwanga mu charu cha Egipiti, nkhaŵalongonga vinthu vyakuziziswa.

¹⁶ Mitundu yikawonanga ndikukoreka soni chifukwa cha nthazi zawo zose; ŵakaŵikanga manja ghawo pa milomo yawo; makutu ghawo ghakagatanga;

¹⁷ ŵakanyanganga fuvu nge ndi njoka, ndi nge ndi vinthu vyakukwaŵa vyamu charu; ŵakatuwanga ndi chitenthe mu malinga ghawo, ŵakawerenga ndi mantha ku Ambuya Chiuta widu, ndipo ŵakawopanga chifukwa chaku imwe.

¹⁸ Ndi yani Chiuta yo wenge ndimwe, wakugowoke maubendezi ndi kureke maulakwi gha ŵakujako ŵa ŵanthu ŵake? Kuti watufya mtima kwakukiyakiya cha, chifukwa wakondwa mu chanju chake.

¹⁹ Ŵakaŵanga so nafwe ndi chitima, wakakandirizgiyanga pasi pamarundi ghake maulakwi ghidu. Mukatayanga mu zindimba za nyanja mauheni ghidu ghose.

²⁰ Mukalongonga chigomekezgu kwaku Yakobe ndi chanju chakufikapo kwaku Abrahamu, nge ndimo mungulapiya ku auskefwe mu mazuŵa gha kali.