Mika 6 - Tonga Bible 1986

Yisraele wasuskika chifukwa cha ulakwi wa ŵanthu ŵake

¹ Vwani cho Ambuya akamba: Yukani, kambani mlandu winu panthazi pamapiri, ndipo mapiri ghamanaghamana ghavwe mazu ghinu.

² Vwani, imwe mwamapiri, suskanu ya Ambuya, ndi imwe viŵanja vyakukho vya charu chapasi; pakuti Ambuya ŵe ndi suskanu ndi ŵanthu ŵawo, ndipo akamikananga ndi Yisraele.

³ “A! Mwa ŵanthu ŵangu ndachitanji kwaku imwe? Ndamusuzgani imwe ndikanthu uli? Mundamuke!

⁴ Pakuti ndamutuzgani mu charu cha Egipiti, ndi kumuwomboni mu nyumba ya uŵanda; ndipo ndingukutumiyani panthazi pinu Mosese, Aroni ndi Miriamu ŵarongozge.

⁵ A! Mwa ŵanthu ŵangu, kumbukani cho Balaki, karonga wa Moabu wangughanaghana; ndi cho Balamu mwana waku Beori wangumwamuka; ndi cho chinguŵako kutuwa ku Shitimi ku Gilgala, mwakuti muziŵe milimu ya utaski wa Ambuya.”

⁶ “Nkhazanga ndi chine pa maso pa Ambuya, ndi kusindama pa maso paku Chiuta wa pachanya paku vyose? Kumbi nkhazanga pa maso pake ndi sembe yakocha, ndimatholi gha chirimika chimoza? Kumbi Ambuya akakondwanga ndi vikwi vya ŵana ŵa mberere ŵanthurumi, ndi vikwi chumi (10,000) vya misinji ya mafuta?

⁷ Kumbi nkhaperekanga mwana wangu wa umwali chifukwa cha maulakwi ghangu, chipasi cha liŵavu langu chifukwa cha kwananga kwa mzimu wangu?”

⁸ Iyo wakurongo wa munthu, cho nchamampha, ndi cho Ambuya akhumbiya iwe, kweni kuchita urunji, ndi kwanja ulemu, ndi kwenda kwakujiyuyuwa ndi Chiuta wako?

⁹ Mazu gha Ambuya ghadanirizga ku msumba ndipo ndi vinjeru vyamampha kopa zina linu: “Vwani, mwa fuku ndi mwakuwungana mu msumba!

¹⁰ Kumbi ndingaruwa usambasi wa uheni mu nyumba ya muheni, ndi thumba la vyakupimiya vyakupusika yo ngwakutembeka?

¹¹ Kumbi ndingamuleka munthu yo wendi mweso yiheni, ndi thumba la mauzitu ghakupimiya ghakupusika?

¹² Ŵanthu ŵinu ŵasambasimba kuzazika ndi nkhaza; ŵakuja mwaku imwe ŵakamba mautesi, ndi lilime lawo ndakupusika mu mlomo wawo.

¹³ Chifukwa ichi ndayamba kumupumani, kumupa suwani chifukwa cha maulakwi ghinu.

¹⁴ Mukarghanga, kweni mukagutanga cha; muŵenge ndi nja mukati mwinu; mukaŵikanga pade, kweni kuti mukasunganga cha, ndipo cho musunga ndichiperekenge ku lipanga.

¹⁵ Mukamijanga, kweni mukavunanga cha, mukapuwanga maolivi, kweni kuti mukajitukutizganga ndi mafuta cha; mukapuwanga mphereska, kweni kuti mumwenge vinyo wake cha.

¹⁶ Chifukwa mwasunga vilayizgu vyaku Omri, ndi vyakuchita vyose vya nyumba yaku Ahabu; ndi mwayenda mufundu zawo; ndi mupasuweninge, ndi ŵakujamo ŵinu wakafyonyekanga; viyo mukayeyekanga ndi ŵanthu.”