Mika 5 - Tonga Bible 1986

Betelehemu wa kamuzi kamana mwaku iwe wakapapikangamo mtaski

¹ Sono mwazingirizgika ndi linga urwani watijarizga; ŵapuma ndi nthonga pa dakama la fumu yaku Yisraele.

² Kweni iwe, Betelehemu Efrata, wamweniwe we mumana kuŵa mukati mu mafumu ghaku Yuda, mwaku iwe mukawiyanga kutuwa kwaku ine wakuusa, mu Yisraele, mweniyo chandilu chake nchakali ukongwa, chituwa ku mazuŵa ghamwaka.

³ Viyo wakaŵajowonga mpaka yize nyengu kuti yo we pafupi kubara wabare; penipo ndipo ŵakujako ŵa ŵabali ŵake ŵakawerenga ku ŵanthu ŵaku Yisraele.

⁴ Ndipo wakamanga ndi kuliska mskambu wake, ndi nthazi za Ambuya, ndi kuzirwa kwa zina la Ambuya Chiuta wake. Ndipo ŵakajanga mu kufwasa chifukwa iyo wakaŵanga mukuru mpaka ku vigoti vya charu chapasi.

⁵ Ndipo ichi chikaŵanga chimangu, po ŵaAsiriya ŵatuza mu charu chidundi kukanda pa dongo lidu, kuti timuyuskiye ŵaliska ŵankhonde ndi ŵaŵi, ndi ŵakaronga ŵankhonde ndi ŵatatu.

⁶ Iwo ŵakausanga charu cha Asiriya ndi lipanga ndi charu chaku Nimirodi ndi lipanga lakukhwetuwa; ndipo ŵakatitaskanga ku ŵaAsiriya po ŵatuza mu charu chidu ndi kukanda mu mphaka zidu.

⁷ Viyo wakujako waku Yakobe wakaŵanga mukati mu ŵanthu ŵanandi nge ndi dungwi lakutuwa kwa Ambuya, nge ndi vuwa pa uteka, kuti yiziulikiya munthu cha, pamwenga kulindizga ŵana ŵa ŵanthu.

⁸ Ŵakujako ŵaku Yakobe ŵakawanga mukati mu mitundu, mukati mu ŵanthu ŵanandi, nge ndi nkharamu mukati mu mskambu wa nyama za mu dondo, nge ndi nkharamu yamupupuka mukati mu mskambu wa mberere, yeniyo pa yiporotamo, yikanda pasi ndi yiparuwa tumanatumana, ndipo palivi yo waziŵa kutaska.

⁹ Janja linu likatumphuliskikiyanga pazimphindikwa zinu ndipo ŵarwani ŵinu wose ŵakadumulikanga.

¹⁰ Ndipo mu zuŵa lo, atiti Ambuya, nkhadumuwanga ŵakavalo mukati mwako, ndipo nkhabwanganduwanga magareta ghako;

¹¹ nkhadumuwanga misumba ya charu chako, ndi kuwiskiya pasi malinga ghako ghose.

¹² Nkhamaranga ŵaukwi wose mujanja lako, ndipo kuti ukaŵanga so nawo cha ŵaukwi;

¹³ ndi nkhapasuwanga vikozgo vyako, ndi mizati yako kutuwa mukati mwako, ndipo kuti ukalambiyanga so cha milimu ya manja ghako.

¹⁴ Ndipo nkhazuwangamo Ashera mwaku imwe, ndi kupasuwa misumba yinu.

¹⁵ Ndipo ndi ukari ndi kandundu ndiwezgiyenge nduzga pa mitundu yo yengavi kuvwiya.