Mika 4 - Tonga Bible 1986

Ŵakujako ŵawezgeke mu mgonezi wa chimangu

¹ Mu mazuŵa ghakumariya phiri la nyumba ya Ambuya likamikikanga kuŵa litali kuruska mapiri ghose, ndipo likatumphuliskikanga kuŵa litali kuruska mapiri ghose; ndipo ŵanthu ŵamundonde kwaku lo,

² ndi mitundu yinandi yikazanga ndi kunena kuti: “Tiyeni tikwere ku phiri la Ambuya, ku nyumba yaku Chiuta waku Yakobe; mwakuti watisambizge nthowa zake ndi kuti tendenge mwaku zo.” Chifukwa ku Zioni kukatuwiyanga dangu, ndi mazu gha Ambuya ghakatuwiyanga ku Yerusalemu.

³ Ŵakayeruzganga ŵanthu ŵanandi, ndipo wakachenyanga mitundu yanthazi yo yekutali; ndipo ŵasulenge malipanga ghawo kuŵa mayembe, ndi mikondo yawo kuŵa vimayi vyakuvuniya. Mtundu ukarekanga kupong'a nkhondo pa mtundu unyake, chingana nkhuti usambiri so zankhondo.

⁴ Kweni wakajanga yose musi mumphereska yake ndi musi mwa mkuyu wake, ndipo pakaŵangavi yumoza wakuŵatenthemeska; chifukwa Ambuya ŵa maŵanja akamba viyo.

⁵ Pakuti mitundu yose ya ŵanthu, ŵe wose utenda mzina laku Chiuta wake, kweni ifwe tendenge mzina la Ambuya Chiuta widu muyaya ndi muyaya.

⁶ Mu zuŵa lo, atiti Ambuya, ndiwunjikenge ŵakupunduka, ndiso ndiwunjikenge wo ŵadikiskika, ndiwo ndaŵasuzga;

⁷ ŵakupunduka ndiŵachitenge kuŵa ŵakujako; ndi ŵakudikiskika kuŵa mtundu wanthazi. Ndipo Ambuya akaŵausanga mu phiri la Zioni kutuwa sono mpaka muyaya.

⁸ Ndipo iwe, chitanthali chamskambu, phiri la msumba waku Zioni ufumu wakudanga, ukazanga kwaku iwe, ufumu wa ŵanthu ŵaku Yerusalemu.

⁹ Sono uliliyanje ukongwa? Kumbi mulivi karonga mwaku iwe? Kumbi nchifukwa waupu wako wafwa po urwirwi wakuko nge ndi munthukazi yo wabala?

¹⁰ Kunkhurukani pasi ndi kutamantha, mwa ŵanthu ŵaku Zioni, nge ndi munthukazi yo wabala; pakuti sono mukatuwanga mu msumba ndi kuja mu dondo; mukarutanga ku Babiloni. Kweniko mwamutaskika ndi kweniko Ambuya amkukuwomboni, mu janja la ŵarwani.

¹¹ Sono mitundu yawunjikanakumikana namwe, kuti, “Rekani ŵakazuzgike, ndi maso ghidu ghalereske pa Zioni.”

¹² Kweni kuti ŵaziŵa cha maghanaghano gha Ambuya; kuti ŵawamu cha nanga ndi fundu yawo, kuti aŵawunjika nge ndinchinda pa lwaniko.

¹³ Yukani ndi mukhweme, mwa ŵanthu ŵaku Zioni; pakuti ndisanduskenge sengwe lino kuŵa chisulu, ndi vikandiro vino kuŵa vyamkuŵa; mukapikitanga ŵanthu ŵanandi, ndi kupatuliya Ambuya chanduwu chawo, usambasi wawo mukapatuliyanga Ambuya wa charu chose chapasi.