Mika 3 - Tonga Bible 1986

Ŵeruzgi ndi ŵamchimi ŵasuskika

¹ Ndipo ndinguti: Vwani, imwe mwaŵarongozgi waku Yakobe, ndi mafumu gha nyumba yaku Yisraele! Kumbi kuti nkhwaku imwe cha kuziŵa weruzgi?

² Imwe mutinkha umampha ndi kwanja uheni, mwaŵenimwe muparuwa khungu la ŵanthu ŵangu, ndi kucheka nyama kutuwa ku viwanga vyawo;

³ mwaŵenimwe muturgha nyama ya ŵanthu ŵangu; ndi kufuŵa khungu lawo, ndi kuphwanya viwanga vyawo ndi kuvikang'antha nge ndi nyama pa chiŵiya, nge ndi nyama mu mumphika.

⁴ Viyo ŵakaliyanga ku Ambuya, kweni kuti amukenge cha; akabisanga chisku chawo kwaku iwopa nyengo yiya, chifukwa nchitu zawo ŵazisanduska kuŵa ziheni.

⁵ Viyo atiti Ambuya kunena ndi ŵamchimi wo ŵalandizga ŵanthu ŵangu, wo ŵadanirizga kuti, “Chimangu,” po ŵe ndi kanthu kakurgha, kweni ŵalongoso nkhondo paku yo walivi kuŵika kanthu mu milimu yawo.

⁶ Chifukwa ichi ukaŵanga usiku kwaku imwe, wambura chiwona, ndi kuŵenge mdima kwaku imwe, kwambura kuroska. Dazi lamuserere ŵamchimi, ndi zuŵa likaŵanga la mdima bi, paku iwo.

⁷ Ŵawoni ŵazamuchita soni, ndi ŵakuloska nawo ŵazamuchita soni; wose ŵakajaranga milomo yawo, chifukwa kulivi kwamuka kuturiya kwaku Chiuta.

⁸ Kweni ine, ndazazika ndi nthazi, ndi mzimu wa Ambuya, ndi weruzgi ndi mazaza, kunena kwaku Yakobe ulakwi wake ndi kwaku Yisraele mphurupuru yake.

⁹ Vwani ichi, imwe mwaŵarongozgi ŵa nyumba yaku Yakobe, ndi mwa mafumu mwa nyumba yaku Yisraele, imwe mutinkha weruzgi ndi kubendezga urunji wose.

¹⁰ Imwe muzenga Zioni ndi ndopa, ndi Yerusalemu ndi ubudi.

¹¹ Ŵarongozgi ŵake ŵateruzgiya chimbundi, ŵazukuru ŵake ŵasambizgiya mphoto, ŵamchimi ŵake ŵaloska chifukwa cha ndrama; ndipuuli ŵayegeme ku Ambuya ndi ŵatiti, “Kumbi Ambuya ŵe mukati mwidu cha? Uheni kuti ukatiwiyanga cha.”

¹² Viyo chifukwa chaku imwe Zioni wakalimikanga nge ndi munda; Yerusalemu wakaŵanga ndundu ya vyakupasuka, ndi phiri la nyumba nge ndi miti yitali mulisuwa.