Maŵerengedu 5 - Tonga Bible 1986

Ŵamakhati wose ŵatuzgikamo mu ugoŵi

¹ Ndipo Ambuya angunena ndi Mosese, anguti;

² “Ŵalanguliye ŵaYisraele kuti ŵatuzgemo wamakhate yose mu ogiŵi, ndi yose wakuŵa ndi nthenda ya kusuluwa, ndi yose yo wakazuzgika pa kukwaska chakufwa;

³ uŵatuzge wose munthurumi ndi munthukazi, ŵatuzgikiye kubwalo kwa ugoŵi, alinga kuti ŵareke kukazuzga ugoŵi wawo, mukati mo Ine ndija.”

⁴ Ndipo ndimo ŵaYisraele ŵanguchitiya, ŵanguŵatuzgiya kubwalo kwa ugoŵi; nge ndimo Ambuya angunene Mosese, ŵaYisraele nawo ŵanguchita kwakukozgana.

⁵ Ambuya angukamba kwaku Mosese, kuti,

⁶ “Ukambe ndi ŵaYisraele asani munthurumi pamwenga munthukazi wachita uheni we wose wo ŵanthu ŵachita pakuswa lamulu la Ambuya, ndipo waziŵika,

⁷ wakazomeranga uheni wo wachita; ndipo walipe mtengo waku cho wachita, ndikusazgiyapo chimoza cha vigaŵa vinkhonde vya mtengo wo, ndi kupereka kwaku yo wamunangiya.

⁸ Kweni asani mweniyo wanangiya walivi mbali wake yo wangaronde mtengo wo, iku mtengo wo ulipike ku Ambuya pa janja la mzukuru, pamoza ndi mberere yinthurumi ya mphepeska yo munthu watijipepeske.

⁹ Ndipo mpasku wose, vinthu vyose vyakupaturika vya ŵaYisraele, vyo ŵatuza navyo ku mzukuru, vikaŵanga vyake;

¹⁰ ndipo vyakupaturika vya munthu we yose vikaŵanga vyake; chinthu che chose cho munthu wakaperekanga ku mzukuru chikaŵanga chake.”

¹¹ Ambuya angunena ndi Mosese,

¹² “Kamba ndi ŵaYisraele, asani muwoli wa munthu wabuda wamunangiya wachita kwambura magomezgeka,

¹³ asani munthurumi munyake wala nayo, kwambura kuwoneka ku munthurumi wake, ndipo ichi chabisika kuti iyo wajikazuzga, ndipo palivi kaboni wakumusimika, pakuti wengavi kukoreka wachichita;

¹⁴ sono asani mtima wa sanji uyuka mu munthurumi, kuchitiya sanji muwoli wake yo wajikazuzga; pamwenga asani sanji yamuyukiya kuchitiya muwoli wake nanga iyo kuti wajikazuzga cha;

¹⁵ pa viyo munthurumi watore muwoli wake ku mzukuru, ndi kupereka mpasku wake, chigaŵa chimoza cha vigaŵa vya mweso wa ufwa wa barile; wareke kuŵikako mafuta nanga nkhusazgako cha chema, pakuti ndi mpasku wa sanji, mpasku wakukumbuska ulakwi.

¹⁶ “Sono mzukuru wakazanga ndi muwoli yo pafupi, ndi kumuŵika paurongo pa Ambuya;

¹⁷ ndipo mzukuru wakatonga maji ghakupaturika mu chiyaŵi cha dongo, ndi kuto fuvu la pasi lamu chihema chakuwunganamo kulidira mu maji,

¹⁸ sono mzukuru waŵike munthukazi yo paurongo pa Ambuya, wafwatuwe sisi lake, ndipo waŵike mpasku wa chikumbusku mu manja ghake, we ndi mpasku wa sanji. Ndipo mzukuru wakoreze maji ghakuŵaŵa mu janja lake gho ghasiska thembo.

¹⁹ Penipo mzukuru wakamurapiskanga rapu munthukazi watinge, ‘Asani palivi munthurumi yo wala nawe, ndipo ulivi kubuda kuchita cho mbukazuzi, ndi munthurumi wa pade yo kuti ndi murumi wako cha, ipo upozomoke ku maji ghakuŵaŵa yagha gho ghasiska thembo.

²⁰ Kweni asani walakwa pakuŵa ndi munthurumi munyake yo kuti ndi murumi wako cha wala nayo,

²¹ sono’ (mzukuru wamurapaske munthukazi ndi rapu la thembo, wakambe nayo kuti) ‘Ambuya akuchite iwe kuŵa wakutembeka ndi rapu mukati mu ŵanthu ŵako, po Ambuya avundiska chigha chako ndi kukutupiska mbulu;

²² maji yagha gho ghasiska thembo ghasere mu matumbo ghako kukutupiska mbulu ndi kuvundiska chigha chako.’ Ndipo munthukazi wakambenge, ‘Ameni, Ameni.’

²³ “Pavuli mzukuru walembe matembo yagha mu buku, ndipo waghawimwe ndi maji ghakuŵaŵa;

²⁴ munthukazi wamwe maji ghakuŵaŵa gho ghasiska thembo, maji gho ghaserenge mwake ghakumuŵaŵa.

²⁵ Ndipo mzukuru wakatonga mpasku wa sanji mu janja la munthukazi, ndi kuwuzungung'a paurongo pa Ambuya ndi kuwuŵika pa guŵa la sembe;

²⁶ mzukuru watopo mpasku wo janja za, kuŵa chigaŵa, cha chikumbusku chake, ndi kuwocha pa jochero, sono pavuli pake wamumweske munthukazi maji gho.

²⁷ Watakuti wamumweska maji, asani wakukazuzgika nadi, ndi wakumunangiya murumi wake, maji ghakusiska thembo ghakaserenga ndi kumuŵaŵa, ghamutupiskenge mbulu, ndi kuvundiska chigha chake, viyo munthukazi wakaŵanga thembo mu ŵanthu ŵake,

²⁸ kweni asani munthukazi walivi kukazuzgika, ngwakuphotoka, wakapozomokanga ndipo wakapapanga ŵana.

²⁹ “Ili ndi dangu mu mrandu ya sanji, penipo muwoli, wakuŵa pasi, pa mazaza gha murumi wake, wabuda pa kula ndi wamwenga yo kuti ndi murumi wake cha,

³⁰ pamwenga po mtima wa sanji utuziya munthurumi kichitiya sanji muwoli wake; penipo wakamikanga muwoli wake paurongo pa Ambuya, ndipo mzukuru wakafiskanga paku iyo dangu lose ili.

³¹ Munthurumi wakaŵanga wambura kafukwa, po munthukazi wakapinganga kwananga kwake.”