Maŵerengedu 35 - Tonga Bible 1986

Misumba ya ŵaLevi

¹ Ndipo Ambuya angukamba ndi Mosese mu vidika vya Moabu pafupi ndi Yordane pa Yeriko,

² “Unene ŵaYisraele, kuti ŵaŵapaske ŵaLevi, mizi yakujamo kutuliya mu chihara chawo: ndipo iwe ukaŵapaskanga ŵaLevi charu cha chipozwa kuzingilizga misumba.

³ Misumba ndiyo ŵakajangamo iwo, ndipo charu cha chipozwa chikaŵanga cha ng'ombe zawo vyakuŵeta vyawo ndi vyamoyo vyawo.

⁴ Charu cha vyakuŵeta cho mukapaskanga ŵaLevi, chambenge kutuliya pa linga la msumba kurazga ku bwalo mikono chikwi chimoza (1,000) kuzingirizga,

⁵ ndipo mukapimanga, ku bwalo kwa msumba, kuchiri ku vuma mikono vikwi viŵi (2,000) kuchiri ku malaŵi mikono vikwi viŵi (2,000) kuchiri ku zambwe mikono vikwi viŵi (2,000) ndipo kuchiri ku nkhonde mikono vikwi viŵi (2,000), msumba uje pakatikati, ichi chikaŵanga chawo nge ncharu cha vyakuŵeta cha misumba yawo.

⁶ Misumba yo mukapaskanga ku ŵaLevi yikaŵanga misumba yinkhonde ndi umoza yakupozomokiyamo, mwenimo mukazomerezganga mubaya munthu kuthaŵiyamo, kusazgiyapo paku yo mukaperekanga misumba machumi ghanayi pachanya yiŵi (42).

⁷ Misumba yose yo mukaperekanga ku ŵaLevi pamoza ndi charu chawo cha vyakuŵeta yikaŵanga machumi ghanayi pachanya yinkhonde ndi yitatu (48).

⁸ Ndipo nge ndi misumba yo mukaperekanga muchihara cha ŵaYisraele, ku mafuku gho nganandi mukatongako yinandi; ku mafuku gho ngamana mukatongako yimana; fuku ili ndi liya kwakulingana ndi chihara chake, likaperekanga misumba ku ŵaLevi.”

Misumba yakupozomokiyamo

⁹ Ambuya angurongoro ndi Mosese,

¹⁰ “Ukambe ndi ŵaYisraele, mutakuti mwalowoka Yordane muchisere mu Kanani.

¹¹ Mwamusankha misumba kuŵa misumba yakutaskikiyamo imwe, alinga kuti mubaya munthu yo wabaya munyake kwambura kumufinga wathaŵiyeko.

¹² Misumba yikamuŵiyaninga yakutaskikiyamo kwaku yo ndi muwezge nduzga, mwakuti mubaya munthu wareke kufwa mpaka penipo watuma paurongo pa wumba kuti ŵeruzgike.

¹³ Misumba yinu yakutaskikiyamo yo mukaperekanga yikaŵanga yinkhonde ndi umoza.

¹⁴ Misumba yitatu mukayiperekanga kusirgha ku Yordane, ndi misumba yitatu mu charu cha Kanani, kuŵa misumba yakutaskikiyamo.

¹⁵ Misumba iyi yinkhonde ndi umoza yakutaskikiyamo yikaŵanga ya ŵaYisraele, iyi yinkhonde ndi umoza yakutaskikiyamo yikaŵanga ya ŵaYisraele, ndi mlendo, ndipo ndi mlendo wakuja mwawo, alinga kuti yose yo wabaya munthu kwambura kumufinga wathaŵiyeko.

¹⁶ “Kweni asani wangumupuma ndi chisulo, ndipo wafwa, iyo ndi mubaya; wakubaya yo wabayike.

¹⁷ Ndipo asani wangumupuma ndi mwa wo munthu wangaziŵa kufwa nawo, ndipo wafwa, iyo ndi wakubaya yo ŵabayike.

¹⁸ Pamwenga asani wangumupuma ndi nthonga ya chimiti, yo munthu wangaziŵa kufwa nayo, ndipo wafwa, iyo ndi mubaya, wakubaya yo wabayike.

¹⁹ Wakuwezge nduzga ndopa iyo yija ndiyo wakabayanga wakubaya yo; asani wakumana nayo, wamubaye.

²⁰ Asani wamugwaza pa chifukwa chakutinkha, pamwenga kuchita kubisama kupong'a chinthu, kuti wafwa,

²¹ pamwenga kumupuma ndi janja mukutinkha, kuti wafwa, iku yo wamupuma wabayike, ndi mubaya, wakuwezge nduzga ndopa, ndiyo wabaye wakubaya yo, asani wakumana nayo.

²² “Kweni asani wangumugwaza kwakuchita kubuchiya kwambura kumufinga, pamwenga kumupong'a ndi chinthu kwambura kumukhazga,

²³ manyi wangupong'a mwa, wo munthu wangufwa nawo, kwambura kumuwona kuti watimpong'a ndipo wafwa, nanga kuti wenga murwani wake cha, ndi kuti wangunkhumba kumunanga cha:

²⁴ wumba weruzgenge pakati pa mubaya munthu ndi muwezge nduzga ndopa, kwakulingana ndi vyeruzgu ivi,

²⁵ ndipo wumba ukataskanga mubaya munthu yo mu janja laku muwezge nduzga ndopa, ndipo wumba umuwezgiyenge ku muzi wake wakupozomokiyamo, ko wangathaŵiya, ndipo wakajanga mwenimuwa mpaka penipo mzukuru mura yo wangupakika ndi mafuta ghakupaturika wafwa.

²⁶ Kweni mubaya munthu pa nyengo ye yose wakatuwanga kuruta ku bwalo kujumpha mphaka ya muzi wakutaskikiyamo ko wangathaŵiya,

²⁷ ndipo asani muwezgenduzga ndopa wamusaniya ku bwalo ku mphaka ya muzi wake wakutaskikiyamo, ndipo watumubaya; kuti wakaŵanga ndi mrandu cha.

²⁸ Chifukwa munthu watenere kuja mu muzi wake wakutaskikiyamo mpaka pa nyifwa ya mzukuru mura; kweni pavuli pa nyifwa ya mzukuru mura mubaya munthu watenere kuwere ku charu cha chihara chake.

²⁹ “Ndipo vinthu yivi vikawanga dangu ndi cheruzgu kwaku imwe, mu migonezi yinu yose, mu kuja kwinu kose.

³⁰ Asani we yose wabaya munthu mubaya yo wabayike pakupanikizgika ndi ŵakaboni; kweni paulevi munthu yo wakabayikanga pa ukaboni wa munthu yumoza.

³¹ Ndipo ukongwa viŵi mureke kuronde thumba lakulipa umoyo wa wakubaya munthu, yo weruzgikiya ku kubayika, kweni kuti wabayike.

³² Ndipo mureke kuronde thumba lakulipa paku yo wathaŵiya ku muzi wake wakutaskikiyamo, mwakuti wawere ku charu chake po mzukuru mura wenga wandafwe.

³³ Viyo mureke kukazuzga charu cho mujamo; pakuti ndopa zikazuzga charu, ndipo palivi thumba lo lingaziŵa kuwombo charu pa chifukwa cha ndopa zo zidikamo, kweni ndi ndopa zakumweniyo pe wanguzidira.

³⁴ Mureke kukazuzga charu cho mujamo, chenicho ine ndija mukati mwake; pakuti ine Ambuya ndija mukati mu ŵaYisraele.”