Maŵerengedu 34 - Tonga Bible 1986

Mphaka ya charu cha Kanani

¹ Ambuya angunena ndi Mosese,

² “Uŵalanguliye ŵaYisraele, kuti, Muchisere mu charu cha Kanani (ichi ncharu cho chikaŵiyanga imwe chihara, charu cha Kanani mo chilili chose),

³ kuchiri ku malaŵi kutuwa ku bozwa la Zini mumphepete mwa Edomu, mphaka yinu kuchiri ku malaŵi yikaŵanga kutuliya ku umari wa Nyanja ya Mche ku vuma;

⁴ mphaka yikazunguliyanga kukwere ku malaŵi kwa Akrabini, kwambukiya ku Zini, yamugota ku malaŵi kwa Kadeshe-barnea; yikarutiliyanga ku Hazaradara, mpaka ku Azamono;

⁵ mphaka yikanyongokanga kutuwa ku Azamono mpaka ku msinji waku Egipiti, umari wake yamugota ku nyanja.

⁶ “Kuchiri ku zambwe, mukaŵanga ndi Nyanja Yikuru ndi likumba lake; iyi ndiyu yikaŵanga mphaka yinu ku zambwe.

⁷ “Mphaka yinu kuchiri ku nkhonde yikaŵanga iyi: kutuwa ku Nyanja Yikuru mukalembanga mzere mpaka ku phiri la Horo;

⁸ kutuwa ku phiri Eloro mukalembanga mzere mpaka pa kusere pa likomo laku Hamati, mphaka yamugota pa Zabada;

⁹ yikarutiliyanga mpaka ku Zifironi, umari wake yamugota pa Hazarenana; iyi yikaŵanga mphaka yinu ku nkhonde.

¹⁰ “Mukalembanga mphaka yinu ku vuma kutuwa ku Hazarenana mpaka ku Shefama;

¹¹ mphaka yikasikanga kutuliya ku Shefuma mpaka ku Ribila kuchiri ku vuma kwa Aini; yikasikanga, kwachifika mumphepete mwa nyanja ya Kineroti ku vuma;

¹² mphaka yikasikiyanga ku Yordane, umari wake yamugota ku Nyanja ya Mche, ichi ndichu chikaŵanga charu chinu ndi mphaka zake zose zingirizge.”

¹³ Mosese wangulanguliya ŵaYisraele, wanguti “Ichi ncharu cho mukaharanga ndi mphenduzga, cho Ambuya akhozga kuti chipaskike ku mafuku ghankhonde ndi ghanayi pamoza ndi fuku la nusu;

¹⁴ chifukwa fuku la ŵina Rubene pa nyumba za auskeu ndi fuku la ŵina Gadi pa nyumba za auskeu pamoza ndi fuku la nusu laku Manase; ŵakuronde chihara; chawo;

¹⁵ mafuku ghaŵi ndi fuku la nusu ŵakuronde chihara chawo kusirgha ku Yordane ku Yeriko kuchiri ku vuma, kumaturi gha lumwi.”

¹⁶ Ambuya angunena ndi Mosese,

¹⁷ “Yagha ndi mazina gha ŵanthu wo ŵakamugaŵiyaninga charu kuŵa chihara chinu: Eleazara mzukuru ndi Yoswa mwana waku Nuni.

¹⁸ Ukatonga yumoza pa fuku le lose, kugaŵa charu kuŵa chihara.

¹⁹ Mazina gha ŵanthu ndi yagha: Wa fuku laku Yuda, Kalebe mwana waku Yefune.

²⁰ Wa fuku la ŵina Simeoni, Sheumele mwana waku Amihudu.

²¹ Wa ŵina Benjamini, Elidada mwana waku Chisilono.

²² Ŵa ŵina Dani mura, ndi Buki mwana waku Jogoli.

²³ Wa ŵina Yosefe: fuku la ŵina Manase mura, ndi Hemele mwana waku Efodo.

²⁴ Ndipo wa fuku la ŵina Efraimu, ndi Kemele mwana waku Shifitana.

²⁵ Ŵa ŵina Zebuluni, Elizafana mwana waku Parnaka.

²⁶ Ŵa ŵina Isakara, ndi Palatiele mwana waku Azana.

²⁷ Ŵa ŵina Ashere, ndi Ahihudu mwana waku Shelomi.

²⁸ Ŵa ŵina Naftali, ndi Pedahele mwana waku Amihudu.

²⁹ Yaŵa ndiwo ŵanthu wo Ambuya angulangula kugaŵiya charu ŵaYisraele mu Kanani.”