Maŵerengedu 33 - Tonga Bible 1986

Ulendo wa ŵaYisraele pakati pa Ramesese ndi Sitimu

¹ Yagha ndi maulendo gha ŵa Yisraele, ŵachituwa mu charu cha Egipiti mu mafuku ghawo pasi pa urongozgi waku Mosese ndi Aroni.

² Mosese wangulemba malo ghawo ghakutuwamo, chigono ndi chigono, mwa langulu la Ambuya; ndipo ivi ndi vigono vyawo kwakuyana ndi malo ghawo ghakutuwamo.

³ Ŵangusoka kutuwa pa Ramesese pa zuwa la chumi ndi ghankhonde, la mwezi wakudanga, pa zuŵa la pavuli pa dghera lakujumphapo waka, ŵaYisraele ŵangutuwa mwa upundi mu maso gha ŵaEgipiti wose,

⁴ penipo ŵaEgipiti ŵaŵikanga mu masano ŵana ŵawo ŵa umwali, wo Ambuya angubaya mukati mwa wo; ndi pa maso pa ŵachiuta ŵawo Ambuya angufiska vyeruzgu.

⁵ Viyo ŵaYisraele ŵangusoka pa Ramesese, ŵangugoŵa pa Sukoto.

⁶ Ŵangutuwa pa Sukoto, ŵangugoŵa pa Etama gho ghe pamphepete pa bozwa.

⁷ Ŵangutuwa pa Etama ŵanguwere vuli ku Pihahiroto, ko nkhuvuma kwa Bala-zefono; ŵangugoŵa paurongo pa Migidolo.

⁸ Ŵangusoka paurongo pa Haliroto, ŵanguporota mukati mu nyanja kwachisere mu bozwa, ndipo ŵangwenda ulendo wa mazuŵa ghatatu mu bozwa la Etama, ŵangugoŵa pa Mara,

⁹ ŵangusoka pa Mara ŵangufika ku Elimi, pa Elimi penga visima chumi ndi viŵi vya maji ndi miti machumi ghankhonde ndi ghaŵi ya kanchindwe, ndipo ŵangugoŵa penipa.

¹⁰ Ŵangusoka pa Elimi, ŵangugoŵa pafupi ndi Nyanja Yiyera.

¹¹ Ŵangusoka pa Nyanja Yiyera, ŵangugoŵa mu bozwa la Sini.

¹² Ndipo ŵangutuwa mu bozwa la Sini ŵangugoŵa pa Dofoka.

¹³ Kutuwa pa Dofoka, ŵangugoŵa pa Alusu.

¹⁴ Kutuwa pa Alusu, ŵangugoŵa pa Refidimu, po pengavi maji ghakuti ŵanthu ŵamwe.

¹⁵ Ŵangusoka pa Refidimu, ŵangugoŵa mu bozwa la Sinai.

¹⁶ Ndipo ŵangutuwa mu bozwa la Sinai, ŵangugoŵa pa Kibroto-havata.

¹⁷ Kutuwa pa Kibroto-havata, ŵangugoŵa pa Hazeroto.

¹⁸ Kutuwa pa Hazeroto, ŵangugoŵa pa Ritima.

¹⁹ Ŵangusoka pa Ritima, ŵangugoŵa pa Rimoni-pereze.

²⁰ Ŵangutuwa pa Rimoni-pereze, ŵangugoŵa pa Libina.

²¹ Kutuwa pa Libina, ŵangugoŵa pa Risa.

²² Kutuwa pa Risa, ŵangugoŵa pa Kehelata.

²³ Ŵangusoka pa Kehelata, ŵangugoŵa pa phiri Shefere.

²⁴ Ŵangusoka pa phiri Shefere, ŵangugoŵa pa Harada,

²⁵ Ŵangutuwa pa Harada ŵangugoŵa pa Makoloto.

²⁶ Ŵangutuwa pa Makoloto ŵangugoŵa pa Tahata.

²⁷ Ŵangutuwa pa Tahata, ŵangugoŵa pa Tera.

²⁸ Kutuwa pa Tera, ŵangugoŵa pa Mitika.

²⁹ Kutuwa pa Mitika, ŵangugoŵa pa Hashamona.

³⁰ Kutuwa pa Hashamona ŵangugoŵa pa Moseroto.

³¹ Kutuwa pa Moseroto, ŵangugoŵa pa Benejakana.

³² Kutuwa pa Benejakana, ŵangugoŵa pa Horohagidigada.

³³ Kutuwa pa Horo-hagidigada, ŵangugoŵa pa Joto-batana.

³⁴ Ŵangutuwa pa Jotobataha, ŵangugoŵa pa Abarona,

³⁵ Ŵangutuwa pa Abarona, ŵangugoŵa pa Ezionogebere.

³⁶ Ŵangutuwa pa Ezionogebere, ŵangugoŵa mu bozwa la Zini (lo ndi Kadeshe).

³⁷ Ŵangusoka pa Kadeshe, ŵangugoŵa pa phiri Horo, mumphepeti mwa charu cha Edomu.

³⁸ Ndipo Aroni mzukuru wangukwera phiri Horo mwa langulu la Ambuya, ndipo wangufwiya penipa, mu chirimika cha machumi ghanayi, ŵaYisraele ŵanguti ŵatuwa mu charu cha Egipiti, pa zuŵa la kudanga la mwezi wa chinkhonde.

³⁹ Aroni wachifwa pa phiri la Horo wenga wa umoyo wa virimika machumi pe chumi pachanya machumi ghaŵi ndi vitatu (123).

⁴⁰ Ndipo muKanani, karonga wa Arada, yo wajanga ku mwera mu charu cha Kanani, wanguvwa ndi kuza kwa ŵaYisraele.

⁴¹ Ndipo ŵangusoka pa phiri Horo, ŵangugoŵa pa Zalmoni,

⁴² Ŵangusoka pa Zalmoni, ŵangugoŵa pa Punono.

⁴³ Ŵangusoka pa Punono, ŵangugoŵa pa Oboti.

⁴⁴ Kutuwa pa Oboti ŵangugoŵa pa Iyebarini, mu charu cha Moabu.

⁴⁵ Kutuwa pa Iyimi, ŵangugoŵa pa Dibonogada.

⁴⁶ Ndipo kutuwa pa Dabonogada, ŵangugoŵa pa Almonodiblataimi.

⁴⁷ Ŵangusoka pa Almonodiblataimi, ŵangugoŵa mu mapiri gha Abarimi, paurongo pa Nebo.

⁴⁸ Kutuwa pa mapiri gha Abarimi, ŵangugoŵa mu vidika vya Moabu pafupi ndi Yordane pa Yeriko;

⁴⁹ Ŵangugoŵa pafupi ndi Yordane kutuliya ku Bete-jeshimoto mpaka ku Abete-shitimi mu vidika vya Moabu.

⁵⁰ Ndipo mu vidika vya Moabu ku Yordane pafupi ndi Yeriko, Ambuya angurongoro ndi Mosese,

⁵¹ “Ukambe ndi ŵaYisraele, mutakuti mwalowoka Yordane kusere mu charu cha Kanani,

⁵² mukadikiskanga wose ŵakuja mu charu paurongo pinu, ndipo muphwanye vikozgo vyawo vyose vyakuchongeka mu mya, mubwanganduwe ŵangoza ŵawo wose ŵakuchita kusongono, ndi kuwiskiya pasi malo ghawo ghose gha pachanya;

⁵³ ndipo mukapokanga charu ndi kujamo, pakuti ndapaska charu kwaku imwe ku chihara.

⁵⁴ Mukaharanga charu ndi mphenduzga kwakulingana ndi mafuku ghinu; ku fuku likuru mukaperekanga chihara chikuru, ndipo ku fuku limana mukaperekanga chihara chimana; ko kose mphenduzga yaŵiya munthu we yose, kweniko ndiku kukaŵanga kwake; kwakuyana ndi mafuku gha auskemwe ndimu mukahariyanga.

⁵⁵ Kweni asani mureka kuŵadikiska ŵeni charu pa maso pinu, wo mukaŵazomerezganga kuja ŵakaŵanga nge ndi zimphandu mu maso ghinu nge ndi minga mu mbaghara zinu, ŵakamusuzganinga mu charu chomujamo.

⁵⁶ Ndipo ine mo ndatinge ndichitiye kwaku iwo ndimu ndikachitiyanga kwaku imwe.”