Maŵerengedu 30 - Tonga Bible 1986

Marapu gha ŵanthukazi

¹ Mosese wangukamba ndi ŵarongozgi ŵa mafuku gha ŵaYisraele, kuti, “Ichi ndicho Ambuya alangula.

² Asani munthu warapa rapu ku Ambuya, pamwenga walimbira rapu kumanga umoyo wake, wareke kuswa mazu ghake, wakachitanga kwakulingana ndi chose cho chatuwa mu mlomo wake.

³ Pamwenga asani munthukazi warapa rapu ku Ambuya, kujimanga iyo mweneko ndi rapu, penipo wemu nyumba ya awiske, pa usungwana wake,

⁴ ndipo awiske ŵavwa za kurapa ndi kulimbira kwake kweniko wajimanga nako, kweni kuti warongoro nayo kanthu cha; iku marapu ghake ghakakhozgekanga, ndipo limbira lake lose lo wajumanga nalo likakhozgekanga.

⁵ Kweni asani awiske ŵakana pa zuŵa lo ŵavwiya ichi, palivi rapu pamwenga limbira lo wajumanga nalo, likakhozgekanga; ndipo Ambuya akamugowokiyanga, chifukwa awiske ŵamukanizga.

⁶ Ndipo asani ngwakuŵirwa wendi murumi wake, ndipo warapa pamwenga warongoro kanthu kaheni kwambura kughanaghana ko wajimanga nako,

⁷ ndipo murumi wake wakavwa, kweni kuti wakamba nayo kanthu cha pa zuŵa lo wavwiya; iku marapu ghake ghakakhozgekanga, ndi malimbira ghake gho wajumanga nagho ghakakhozgekanga.

⁸ Kweni asani, pa zuŵa lo murumi wake wavwiya, wakana, iku wakamutuzgangapo rapu lo lenga paku iyo, ndi karongororedu kake kambura kwenere, ko wangujimanga nako; sono Ambuya akamugowokiyanga.

⁹ Rapu lose la choko pamwenga la munthukazi yo wapatika, kanthu kose keniko wajimanga nako, kakakhozgekanga kumikana nayo.

¹⁰ Ndipo asani wangurapiya mu nyumba ya murumi wake, pamwenga wangujimanga ndi limbira,

¹¹ ndipo murumi wake wanguvwa, sono wengavi kukamba nayo kanthu, ndi kumukanizga; iku marapu ghake ghose ghakakhozgehanga, ndi limbira lose lo wangujimanga nalo likakhozgekanga.

¹² Kweni asani murumi wake wangavisanduska vyaŵaka ndi kuvituzgapo pa zuŵa lo wavivwiya, iku vyose vyo vingutuwa mu mlomo wake vyakukamba ndi rapu lake pamwenga limbira lakumanga umoyo wake, kuti vikakhozgekanga cha: murumi wake watuzgako, ndipo Ambuya akamugowokiyanga.

¹³ Rapu lose ndi limbira lose lakusuzga umoyo wake, murumi wake waziŵa kukhozga, pamwenga kutuzgapo.

¹⁴ Kweni asani murumi wake waja waka cheti zuŵa ndi zuŵa, ndikwesa kuti murumi wake wakhozge marapu ghake ghose, pamwenga limbira lake lose, lo wajinanga nalo; walikhozge, chifukwa kuti wangurongoro nayo kanthu cha pa zuŵa lo wangulivwiya.

¹⁵ Kweni asani wavisanduska kuŵa vyawaka ndi vyambura kwenere pa nyengo yo wavivwiya, iku munthukazi yo wakanyamuwanga kwananga kwake.”

¹⁶ Ivi ndivyo vilangulu vyo Ambuya angulanguliya Mosese, pakati pa murumi ndi muwoli, pakati pa wiske ndi mwana wake munthukazi, pa usungwana wake, mukati mu nyumba ya awiske.