Maŵerengedu 28 - Tonga Bible 1986

Mpasku wakocha wambura kurekezga

¹ Ambuya angunena ndi Mosese,

² “Walanguliye ŵaYisraele, uŵanene kuti, ‘Muphwerenge kupereka kwangu pa nyengo yake yakutemeka, mpasku wangu, kurgha kwa mipasku yangu yapa moto, fungu lamampha.’

³ “Ndipo ukambe nawo, kuti, Uwu ndi mpasku wapa moto wo mukaperekanga ku Ambuya; ŵana ŵaŵi ŵa mberere ŵa umoyo ŵa chirimika chimoza ŵambura kalema, zuŵa ndi zuŵa, nge ndi mpasku wambura kumara.

⁴ Kamberere kamoza muperekenge ku mlenji ndi kanyake ku mazulo;

⁵ ndi chigaŵa chimoza cha vigaŵa vya mweso wa ufwa wamampha, wakusazgika ndi chigaŵa chimoza cha vigaŵa vinayi vya mafuta ghakwenga.

⁶ Uwu ndi mpasku wakocha wambura kurekezga, wo ungupaturika pa phiri la Sinai kuŵa fungu lamampha, mpasku wapa moto ku Ambuya.

⁷ Mpasku wake wa kumwa ukaŵanga chigaŵa chimoza cha vigaŵa vinayi vya mafuta pa kamberere kamoza; ndipo uchite kuti vinyo wanthazi wadirike ku Ambuya mu malo ghakupaturika, uŵenge mpasku wa kumwa.

⁸ Kamberere kanyake mukaperekanga ku mazulo nge ndi mpasku wa ufwa waku mlenji; ndipo nge ndi mpasku wake wakumwa, mukaperekenge nge ndi mpasku wapa moto, fungu lamampha lakukondweska ku Ambuya.

Mpasku wakocha wapa zuŵa la Sabata

⁹ “Pa zuŵa la sabata ŵana ŵa mberere ŵaŵi ŵa umoyo wa chirimika chimoza ŵambura kalema, vigaŵa viŵi vya vigaŵa chumi vya ufwa wamampha kuŵa mpasku wa ufwa, wakusazgika ndi mafuta, ndi mpasku wake wakumwa:

¹⁰ uwu ndi mpasku wakocha wa sabata ndi sabata, pamoza ndi mpasku wakocha wambura kurekezga ndi mpasku wake wakumwa.

¹¹ “Pakwamba kwa myezi, mukaperekanga mipasku yinu yakocha ku Ambuya: nkhuzi ziŵi zimana zimana, bira yumoza, ŵana ŵamberere ŵankhonde ndi ŵaŵi ŵa chirimika chimoza wambura kalema;

¹² ndipo so vigaŵa vitatu vya vigaŵa chumi vya mweso wa ufwa wamampha kuŵa mpasku wa ufwa, wakusazgika ndi mafuta; pa nkhuzi yimoza; ndi vigaŵa viŵi vya vigaŵa chumi vya ufwa wamampha kuŵa mpasku wa ufwa, wakusazgika ndi mafuta, pa bira yumoza;

¹³ ndi chigaŵa chimoza cha viaŵa chumi cha ufwa wamampha wausazgika ndi mafuta nge ndi mpasku wa ufwa pa kamberere kamoza; kuŵa mpasku wakocha wa fungu lamampha, mpasku wapa moto ku Ambuya.

¹⁴ Mipasku yawo ya kumwa yikaŵanga nusu wa mweso wa vinyo pa nkhuzi yimoza, chigaŵa chimoza cha vigaŵa vya mweso pa bira yumoza; uwu ndi mpasku wakocha wapa mwezi ndi mwezi chirimika chose.

¹⁵ Ndipo so mwana wambuzi yumoza munthurumi kuŵa mpasku wapa ulakwi ku Ambuya; kakaperekekanga pamoza ndi mpasku wakocha wambura kurekezga ndi mpasku wake wakumwa.

Mpasku wapa viphikiru vyakutondoreka

¹⁶ “Pa zuŵa la chumi ndi ghanayi la mwezi wakudanga ndi dghera la phaska la Ambuya.

¹⁷ Ndipo pa zuŵa la chumi ndi ghankhonde la mwezi uwu ndi dghera; mukarghanga chiŵande chambura mtupu mazuŵa ghankhonde ndi ghaŵi.

¹⁸ Pa zuŵa la kudanga pakaŵanga ungano wakupaturika: mureke kuchita nchitu ya mazuŵa ghose,

¹⁹ kweni mupereke mpasku wapa moto, mpasku wakocha ku Ambuya: nkhuzi ziŵi zimana zimana, bira yumoza, ŵana ŵa mberere ŵankhonde ndi ŵaŵi ŵa umoyo wa chirimika chimoza; muwone kuti zilivi kalema;

²⁰ ndipo so mpasku wawo wa ufwa wamampha wakusazgika ndi mafuta; vigaŵa vitatu vya vigaŵa chumi vya mweso mukaperekanga pa nkhuzi yimoza, ndi vigaŵa viŵi vya vigaŵa chumi pa bira;

²¹ chigaŵa chimoza cha vigaŵa chumi mukaperekanga pa mwana wa mberere yumoza ndi yumoza;

²² ndipo so mwana wa mbuzi yumoza munthurumi waŵenge wa mpasku wapa ulakwi, kumuchitiyani mphepeska.

²³ Mukaperekanga ivi pamoza ndi mpasku wakocha wa mlenji, wo ndi mpasku wakocha warutaruta.

²⁴ Mu nthowa yeniyi ndimu mukaperekiyanga zuŵa ndi zuŵa, pa mazuŵa ghankhonde ndi ghaŵi, kurgha kwa mpasku wapa moto, fungu lakondweska ku Ambuya; mukaperekanga pamoza ndi mpasku wakocha wambura kurekezga ndi mpasku wake wakumwa.

²⁵ Ndipo pa zuŵa la chinkhonde ndi chiŵi mukaŵanga ndi unganu wakupaturika; mungachitanga nchitu ya mazuŵa ghose cha.

²⁶ “Pa zuŵa la vipasi vyakudanga, po mupereka mpasku wa ufwa wa mbeu yifya ku Ambuya pa madghera ghinu gha masabata, mukaŵanga ndi unganu wakupaturika; mungachitanga nchitu ya mazuŵa ghose cha.

²⁷ Kweni perekani mpasku wakocha wa fungu lakukondweska ku Ambuya: nkhuzi ziŵi zimana zimana; bira yumoza, ŵana ŵa mberere ŵankhonde ndi ŵaŵi ŵa chirimika chimoza;

²⁸ ndipo so mpasku wawo wa ufwa wamampha wakusazgika ndi mafuta, vigaŵa vitatu vya vigaŵa chumi vya mweso pa nkhuzi yimoza, vigaŵa viŵi vigaŵa chumi pa bira,

²⁹ chiŵa chimoza cha vigaŵa chumi pa yumoza ya ŵana ŵa mberere ŵankhonde ndi ŵaŵi;

³⁰ ndi kambuzi kamoza, kuŵa ka mphepeska paku imwe.

³¹ Pamoza ndi mpasku wakocha wambura kurekezga ndi mpasku wake wa ufwa, muviperekenge ndi mpasku wawo kumwa. Kweni muwone kuti vyambura kalema.”