Maŵerengedu 25 - Tonga Bible 1986

¹ Wachija Yisraele mu Shitimu ŵanthu ŵangwamba kuseŵe ndi ŵana ŵanthukazi ŵa Moabu.

² Yaŵa ŵangudaniya ŵanthu ku sembe za ŵachiuta ŵawo, ŵanthu ŵangurgha ndi kugwadiya ŵachiuta ŵawo,

³ viyo Yisraele wangujibatika kwaku Bala waku Peoro, ndipo ukari wa Ambuya ungukole paku Yisraele;

⁴ Ambuya angunena ndi Mosese, “Uto mafumu ghose gha ŵanthu, uŵapayike pa mtandasanya pa maso pa Ambuya, mwakuti ukari wakofya wa Ambuya utuweko kwaku Yisraele.”

⁵ Ndipo Mosese wangurongoro ndi ŵeruzgi ŵa ŵaYisraele, “Yose waku imwe wakoso ŵanthu ŵake wo ŵajibatika kwaku Bala waku Peoro.”

⁶ Ndipo awonani, yimoza wa ŵaYisraele wanguza ku ŵabali ŵake ndi munthukazi muMidiani, pa maso paku Mosese ndi wumba wose wa ŵaYisraele, penipo ŵaliyanga pa khomo la hema lakuwunganamo.

⁷ Finehasi mwana waku Eleazara, mwana waku Aroni mzukuru, wanguti wamuwona, wangusoka ndi kusiya wumba, wanguto mkondo mu janja lake.

⁸ Wangumlondo munthu yo waku Yisraele mukati mu hema lake, wanguŵagwaza wose ŵaŵi, munthurumi muYisraele ndi munthu­kazi. Viyo nthenda ya chideru yingureka pa ŵaYisraele.

⁹ Kweni ndipuuli wo ŵangufwa ndi chideru ŵenga vikwi machumi ghaŵi pachanya vinayi (24,000).

¹⁰ Ambuya angurongoro ndi Mosese anguti,

¹¹ “Finehasi mwana waku Eleazara, mwana waku Aroni mzukuru, wawezge vuli ukari wangu pa ŵaYisraele, pakuti wenga ndi sanji mu malo mwa sanji yangu mukati mwawo, kuti ndireke kuŵamara ŵaYisraele mu sanji yangu.

¹² Chifukwa chenichi kamba, ‘Awonani, ndapereka kwaku iyo phanganu la chimangu;

¹³ ndipo likamuŵiyanga iyo ndi ku mphapu yake pavuli pake, phanganu la mzukuru wa muyaya, chifukwa wanguchitiya sanji Chiuta wake, ndi kuŵachitiya mphepeska ŵaYisraele.’ ”

¹⁴ Zina la muYisraele wakubayika pamoza ndi munthukazi muMidiani lenga Ziuri mwana waku Salu, mura wa nyumba ya auskeu ya ŵaSimeoni.

¹⁵ Ndipo zina la munthukazi muMidiani yo wangubayika lenga Kozobi mwana munthukazi waku Zuru, yo wenga mura wa nyumba ya uskeu ya ŵaMidiani.

¹⁶ Sono Ambuya angunena ndi Mosese,

¹⁷ “Uŵasuzge ŵaMidiani ndipo uŵakoso,

¹⁸ pakuti ŵakusuzga ndi mautesi ghawo, gho ŵangumupusikani pa makani ghaku Peoro, ndi ghaku Kozobi, mwana munthukazi wa fumu yaku Midiani, mzichi wawo, yo wangubayika pa zuŵa la nthenda ya chideru pa chifukwa chaku Peoro.”