Maŵerengedu 24 - Tonga Bible 1986

¹ Ndipo penipo Balamu wanguwona kuti kungukondweska Chiuta kutumbika Yisraele, kuti wanguruta cha, nge mpha nyengo zinyake, kwachombeza, kweni wangulazga chisku chake ku bozwa.

² Balamu wanguyinuska maso ghake, wanguwona kuti Yisraele wagoŵa fuko ndi fuko pakulija. Ndipo mzimu waku Chiuta unguza paku iyo,

³ viyo wanguto ntharika yake, wanguti, “Uneneska waku Balamu mwana waku Beori, uneneska wa munthu yo jiso lake ndakujurika,

⁴ uneneska waku mweniyo watuvwa mazu ghaku Chiuta, yo walereska chiwona cha wanthazi zose, wakuwa pasi, kweni wakuwa ndi maso ghambura kusizimiya:

⁵ naku nkhunozga kwa mahema ghako, Yakobe, maugoŵi ghako, Yisraele we!

⁶ Ulaka ndi madambo ghakutambalukiya kutali, ulaka ndi minda ya mu mphepete mu msinji, nge ndikholonje lakupandika ndi Ambuya, nge ndi miti ya milanji mu mphepete mu msinji.

⁷ Maji ghakendanga kutuliya mu misuku yake, ndipo mbeu yake yikaŵanga mu maji ghanandi, karonga wake wakaŵanga pachanya kuruska Agagi, ndipo ufumu wake ukakwezgekanga.

⁸ Chiuta watimutuzga mu Egipiti: we ndi nthazi nge ndi masengwe gha njati, wakamezanga mitundu ya ŵanthu wo mbarwani ŵake, ndipo wakaphwanyanga viwanga vyawo tumanatumana, wakaŵalasanga porotu ndi mivwi yake.

⁹ Wangula pasi, wangugona nge ndi nkharamu, ndipo nge ndi nkharamu yinthukazi; yo wakamuyuskanga njani? Watumbikike yose yo watumbika iwe, ndipo watembeke yose yo watemba iwe.”

¹⁰ Ndipo Balaki wangukwiya ukongwa paku Balamu, ndipo wanguwomba chikufi, Balaki wangunena ndi Balamu, “Ndingukudana kuti uzitembe wakupindikana nane, kweni awona, iwe waŵatumbika sono nkhachitatu aka.

¹¹ Chifukwa chenichi sono rutanga ku malo ghako; Ndingunena kuti, ‘Kwakuneneska ndikuchitiyenge ulemu,’ kweni Ambuya amika ulemu wako.”

¹² Ndipo Balamu wanguti kwaku Balaki, “Kumbi kuti ndingughanene cha mathenga ghako gho ungunditumiya kuti,

¹³ ‘Chingana Balaki wangundipaska nyumba yake yakuzaza siliva ndi golide, kuti ndingajumpha mazu gha Ambuya cha, kuchita chamampha pamwenga chiheni pa khumbu laku ine ndija; chenicho Ambuya akamba, ndichu nane nkhakambanga?’

¹⁴ Viyo sono, ehe, ndiruta ku ŵanthu ŵangu, zanga, ndikakuziŵiskanga cho ŵanthu yaŵa ŵakachitanga ku ŵanthu ŵako mu mazuŵa gho ghatuza.”

¹⁵ Ndipo wangukamba ntharika yake, wanguti, “Uneneska waku Balamu mwana waku Beori, uneneska wa munthu yo jiso lake ndakujurika,

¹⁶ uneneska waku yo watuvwa mazu ghaku Chiuta, ndipo waziŵa chinjeru cha wapachanya limu, wakuwona chiwona cha wanthazizose, wakuwa pasi, kweni wambura kusizimiya maso:

¹⁷ nditumuwona, kweni sono cha; nditumlereska, kweni pafupi cha: nyenyezi yikatuliyanga mwaku Yakobe, ndipo ndodo ya ufumu yikayukanga mwaku Yisraele; yikaphwanyanga pa maso paku Moabu, ndi kuswa ŵana ŵanthurumi wose ŵaku Seti.

¹⁸ Edomu wakapokekanga, Seiri nayo, ŵakupindikana ŵake, ŵakapokanga, penipo Yisraele wakachitanga ndi nthazi.

¹⁹ Mwaku Yakobe mukachitikanga ufumu, ndipo ŵakujapo mu misumba ŵapasulikenge.”

²⁰ Ndipo wangulereska ku Amaleke, wangukamba ntharika yake, wanguti, “Amaleke ndiyu wenga wakudanga wamitundu, kweni ku umali wakaphwanyikanga,”

²¹ Ndipo wangulereska pa ŵaKeni, wangukamba ntharika iyi, wanguti, “Kujaliriya ndigho malo ghako ghakujamo, ndipo chivimbu chaku chamangika mu jarawe;

²² kweni ndipuuli Kaini wakaparghang'ikanga. Mpaka zuŵanji Ashuru wakakukonga umukoli?”

²³ Ndipo wangukamba ntharika yake, wanguti, “Owe, njani wakaŵanga wamoyo Chiuta wachichita ichi?

²⁴ Kweni ngaraŵa zikatuwanga ku Kitimu zazamusuzga Ashuru ndi Ebere; ndipo iyo nayo wakapasukanga.”

²⁵ Ndipo Balamu wangusoka wanguwere ku malo ghake, Balaki nayo wanguruta mu nthowa yake.