Maŵerengedu 23 - Tonga Bible 1986

Wakanizgika ku unganu wa Ambuya

¹ Ndipo Balamu wanguti kwaku Balaki, “Mundizenge panu majochero ghankhonde ndi ghaŵi, ndipo mundipaske nkhuzi zinkhonde ndi ziŵi ndi ŵabira ŵankhonde ndi ŵaŵi.”

² Balaki wanguchita nge ndi mo Balamu wangumunene; Balaki ndi Balamu ŵangupereka pa jochero le lose nkhuni yimoza ndi bira yumoza.

³ Ndipo Balamu wanguti kwaku Balaki, “Wume pafupi ndi mpasku wako wakocha, ine ndikarutanga; vinu Ambuya akazanga kukumana nane; ndipo chose cho akandirongonga ndikukambiyenge.” Ndipo wanguruta pachanya pa muteteti.

⁴ Ndipo Chiuta wangukumana ndi Balamu wangunena ndi iyo, “Ndarongoso majochero gha sembe ghankhonde ndi ghaŵi, ndipo pa jochero le lose ndaperekapo nkhuzi yimoza ndi bira yumoza.”

⁵ Ndipo Ambuya angunena ndi Balamu, kuti, “Were kwaku Balaki, yagha ndighu ukakambi.”

⁶ Wanguwere kwaku iyo, ndipo ehe, Balaki ndi mafumu ghose gha Moabu ŵanguma pafupi ndi sembe yake yakocha.

⁷ Sono Balamu wangukamba ntharika yake, wanguti, “Ku Aramu ndiku wandito ine Balaki, karonga wa Moabu, ku mapiri ghaku maturi gha lumwi: ‘Zanga, uzinditembe Yakobe, zanga uzindinyoze Yisraele!’

⁸ Ndingamutamba uli mweniyo Chiuta walivi kumutemba? Ndingamunyoza uli mweniyo Ambuya alivi kumunyoza?

⁹ Pakuti ndichija pachanya pa mapiri nditumuwona, pakuja pa mitunthu nditumulereska; ehe, mbanthu ŵakuja pakuŵija, ndipo kuti ŵaŵerengeke pamoza ndi mitundu cha!

¹⁰ Njani wangaŵerenga fuvu laku Yakobe, chingana nkhuŵerenga chigaŵa cha chinayi chaku Yisraele? Rekani ndifwe nyifwa ya murunji, ndipo umari wangu ukozgane ndi wake!”

¹¹ Ndipo Balaki wangunena ndi Balamu, “Nchine cho wandichitiya ndingukutole kuti uzitembe ŵarwani ŵangu, kweni ehe, kuti wachitapo kanthu cha, waŵatumbika.”

¹² Ndipo wangwamuka, “Kumbi ine ndingareka kuphwere kukamba cho Ambuya aŵika mu mlomo wangu?”

¹³ Balaki wangunena nayo, “Zanga tirute tose ku malo ghanyake, ko ungaziŵa kuŵawona; wamuwona wo ŵe kufupi pe, kuti wamuwona wose cha; penipo ndipo ukaŵatembe chifukwa changu.”

¹⁴ Ndipo wangumotore ku lisuwa la Zofimi, pachanya pa Pisiga, ndipo ŵanguzenga majochero gha sembe ghankhonde ndi ghaŵi, ŵangupereka nkhuzi yimoza ndi bira yumoza pa jochero le lose.

¹⁵ Balamu wanguti kwaku Balaki, “Wume pano pafupi ndi sembe yako yakocha, po ine ndiruta kwachikumana ndi Ambuya kuwa.”

¹⁶ Ambuya angukumana ndi Balamu, ndipo anguŵika mazu mu mlomo wake, anguti, “Uwere kwaku Balaki, ndipo ukakambi kuti viyo.”

¹⁷ Ndipo wanguza kwaku iyo ndipo, awonani wanguma pafupi ndi sembe yake yakocha, ndi mafumu gha Moabu pamoza nayo. Balaki wanguti, “Nchine cho Ambuya akamba?”

¹⁸ Ndipo Balamu wangukamba ntharika, wanguti, “Soka, Balaki, ndipo uvwe; undivwiske ine, wa mwana we waku Zipora:

¹⁹ Chiuta kuti ndi munthu cha, kuti waname, pamwenga mwana wa munthu, kuti wang'anamuke. Kumbi cho wakamba, kuti wakachitanga cha? Pamwenga cho wanena, kuti wakachifiskanga cha?

²⁰ Ehe, ndaronde langulu la kutumbika: iyo watumbika, ndipo ine kuti ndingasintha cha.

²¹ Walivi kusaniyamo kaheni mwaku Yakobe: nanga nkhuwonamo suzgu mwaku Yisraele. Ambuya Chiuta wawo we pamoza nawo, ndipo kubangula kwa karonga kwe mukati mwawo.

²² Chiuta watiŵatuzga mu Egipiti; we ndi nthazi nge ndi masengwe gha njati.

²³ Pakuti kulivi nyanga yakumikana ndi Yakobe, kulivi kombeza kwakumikana ndi Yisraele; sono kukambikenge paku Yakobe ndi Yisraele, ‘Ehe cho Chiuta wachita!’

²⁴ Awonani, ŵanthu yaŵa! Nge ndi nkharamu yinthukazi ŵayukiya muchanya, ndipo ulaka ndi nkharamu yinthurumi ŵatijisoska; kuti yigona pasi cha mpaka po yargha nyama yeniyo yako, ndi kumwa ndopa za yakubayika yo.”

²⁵ Sono Balaki wanguti kwaku Balamu, “Ungaŵatemba ndi keni kamana cha, nanga nkhuŵatumbika naku pe cha.”

²⁶ Balamu wangumuka Balaki wanguti, “Kumbi ndingukunene cha, kuti, ‘Chose cho Ambuya akamba, ndichu ndikachitanga’?”

²⁷ Ndipo Balaki wangunena ndi Balamu, “Zanga sono, ndikakutolenga ku malo ghanyake; akhumba kukamukondweskanga Chiuta kuti unditembe iwo pa malo gha.”

²⁸ Viyo Balaki wangutole Balamu pachanya pa Peoro po palereskana ndi bozwa.

²⁹ Ndipo Balamu wangunena ndi Balaki, “Undizenge panu majochero ghankhonde ndi ghaŵi, ndipo undipaske nkhuzi zinkhonde ndi ziŵi ndi ŵabira ŵankhonde ndi ŵaŵi.”

³⁰ Balaki wanguchita nge ndimo Balamu wangunene, wangupereka nkhuzi yimoza ndi bira yumoza pa jochero le lose.