Maŵerengedu 13 - Tonga Bible 1986

Ŵanthurumi chumi ndi ŵaŵi ŵatumika kwachiskora Kanani

¹ Ndipo Ambuya angurongoro ndi Mosese,

² “Tuma ŵanthurumi kwachiskora charu cha Kanani, cho ndapaska ku ŵaYisraele; sankha mu fuko le lose la auskeu yumoza, yose wakuwo waŵenge chirongozgi ndipo uŵatume.”

³ Ndipo Mosese wanguŵatuma nge ndimo Ambuya angumulanguliya, kutuliya mu bozwa la Parana, wose ŵenga ŵarongozgi ŵa ŵaYisraele.

⁴ Ndipo mazina ghawo ndi yagha wa ŵina Rubene, Samuwa mwana waku Zakuru;

⁵ wa ŵina Simeoni, Shafata mwana waku Hori;

⁶ wa ŵina Yuda, Kalebe mwana waku Yefune;

⁷ wa ŵina Isakara, Igala mwana waku Yosefe;

⁸ wa ŵina Efraimu, Hoshea mwana waku Nuni;

⁹ wa ŵina Benjamini, Palati mwana waku Rafu;

¹⁰ wa ŵina Zebuluni, Gadiele mwana waku Sodi;

¹¹ wa ŵina Yosefe (ndiku kuti fuko laku Manase), Gadi mwana waku Susi;

¹² wa ŵina Dani, Amiele mwana waku Gemali;

¹³ wa ŵina Ashere, Seturu mwana waku Mikaeli;

¹⁴ wa ŵina Naftali, Nabi mwana waku Vofesi;

¹⁵ ndipo wa fuko la ŵina Gadi, Geuele mwana waku Maki.

¹⁶ Yagha ndi mazina ghaku ŵeniwo Mosese wangutuma kwachiskora charu. Ndipo Mosese wangudana zina Hoshea mwana waku Nuni, Yoswa.

¹⁷ Mosese wanguŵatuma kwachiskora charu cha Kanani, ndipo wanguti kwaku wo, “Rutani musere mu charu chaku mwera ndi kukwera mu charu cha mtunthu,

¹⁸ mukawone charu che uli, ndi ŵanthu ŵakuja mwaku cho manyi mbanthazi pamwenga mbambura nthazi, vinu mbamanavi pamwenga mbanandi,

¹⁹ muwone charu cho ŵajamo manyi nchamampha pamwenga nchiheni, ndi mizi ye uli yo ŵajamo kumbi ŵaja mu mahema pamwenga mu malinga ghakukho;

²⁰ muwone minda manyi nja nyata yamampha pamwenga nchipalamba, kumbi miti yiriko pamwenga kulivi. Muŵe ŵakukhwima mtima, mukaweko ndi vipasi vya charu cho”. Iyi yenga nyengo yakwambiya kufya vipasi.

²¹ Viyo ŵanguruta ŵangwendere charu kwamba ku mabozwa gha Zini kwachifika ku Rehobo, kuŵandikana ndi ku Hamati.

²² Ndipo ŵangufika ku charu chaku mwela, ŵangufika ku Hebroni; kweniko ŵenga Ahimana, Sesai, ndi Talmai ŵa mphapu yaku Anaka. (Hebroni wanguzengeka virimika vinkhonde ndi viŵi wenga wandazengeke Zoani mu Egipiti).

²³ Ndipo ŵanguza ku dambo la Esekolo, kuwa ŵangudumuwako mphereska ya khoroza limoza la vipasi, ndipo ŵangupinga pa muti wakupinga ŵanthu ŵaŵi; ndipo ŵanguza so ndi zobala ndi nkhuyu.

²⁴ Malo ghangudanika dambo la Esekolo, chifukwa cha khoroza la vipasi lo ŵaYisraele ŵangudumuwa penipa.

²⁵ Ndipo ŵanguweko ku kuskora charu pavuli pa mazuŵa machumi ghanayi.

²⁶ Ndipo ŵanguza kwaku Mosese ndi Aroni ndi kuwumba wose wa ŵaYisraele mu mabozwa gha Parana, Kadeshe; ŵanguwe ndi mazu kwaku iwo ndi ku mzinda wose, ndipo ŵanguŵarongo vipasi vya charu chiya.

²⁷ Ndipo ŵangumutauliya kuti, “Tingwachifika ku charu cho mungutitumako; charu nchakutaŵala mkaka ndi uchi ndipo vipasi vyake ndi ivi.

²⁸ Kweni ŵanthu ŵakuja mu charu cho mbanthazi, mizi nja malinga njikuru ukongwa; pade paku ivi, tinguwona ŵa mphapu ya ŵina Anaka kwenikuwa.

²⁹ Ŵina Amaleke ŵaja mu charu chaku mwela; ŵaHiti, ŵaYebusi ndi ŵaAmoni ŵaja mu charu cha mapiri; ŵaKanani ŵaja ku nyanja, ndi mumphepete mwa Yordane.”

³⁰ Kweni Kalebe wanguchetamiska ŵanthu pa maso ghaku Mosese, wanguti, “Tiyeni tikweriyeko kwakutinthimika, kwachichihara; chifukwa tendi nthazi kuchithereska.”

³¹ Kweni ŵanyake wo ŵangukwerako nayo ŵanguti, “Tilivi nthazi yakukweriyako kwachirwana ndi ŵanthu wo; pakuti mbanthazi kwakuruska ifwe.”

³² Viyo ŵanguza ndi makani ghaheni ghapa charu cho ŵangwachiskora ku ŵaYisraele, ŵanguti, “Charu cho tinguyako kwachichiskora, ncharu chenicho, chiturgha ŵanthu ŵakujamo ndipo wanthu wose wo tinguwona mwenimo mbanthu ŵatali msinkhu.

³³ Ndipo kweni kuwati nguwonako vinkhara (ŵina Anaka, wo ndi ŵana ŵa ŵaNedilimu); ndipo ifwe tingujiwona ulaka nge mbaphanana, ndipo ndimu tinguŵiya mu maso ghawo.”