Maŵerengedu 12 - Tonga Bible 1986

Miriamu ndi Aroni wayukiya Mosese

¹ Ndipo Miriamu ndi Aroni ŵangurongoro kumikana ndi Mosese chifukwa cha muwoli wake, pakuti wanguto munthukazi mu Etiopia.

² Ŵanguti, “Kumbi nadi Ambuya arongorore mwaku Mosese pe? Kuti arongorore so ndi mwaku ifwe cha?” Ambuya anguvwa ichi.

³ Mosese wenga wakuzika kwakuruska ŵanthu wose mu charu chapasi.

⁴ Ndipo mwa mabuchibuchi Ambuya angurongoro kwaku Mosese, Aroni ndi Miriamu, anguti, “Imwe mwa ŵatatu, mutuwe, muze ku hema lakuwunganamo.” Ndipo wose ŵatatu ŵangutuliyako.

⁵ Ndipo Ambuya angusikiya mu chimtambo, anguma pa khomo la hema, ndipo angudana Aroni ndi Miriamu ndipo wo ŵaŵi ŵangutuliyako.

⁶ Ambuya anguti, “Tegherezgani mazu ghangu: Asani mwe mchimi mukati mwinu, ine Ambuya nditumuziŵiska kuti ndiripo mu chiwona, ndirongoro nayo mu loto.

⁷ Kweni mteŵeti wangu Mosese kuti we viyo cha; vyose vyangu vyemu manja ghake.

⁸ Ndirongoro nayo maso ndi maso, ndi mazu ghakuvwika, ghambura kubisika; iyo wawonanga kawonekedu ka Ambuya. Sono chifukwa nchine mwengavi chofyu kumikana ndi mteŵeti wangu Mosese?”

⁹ Viyo ukari wa Ambuya ungukole paku iwo, ndipo Ambuya angutuwapo;

¹⁰ po chimtambo chingukungunukapo pa hema, ŵanguwona, Miriamu wanguŵa wa makhati, tu; nge ndi nyankhuŵinda. Ndipo Aroni pakulereska Miriamu, wanguwona, kuti ngwa makhati.

¹¹ Sono Aroni wanguti kwaku Mosese, “Owe, mbuyangu, mureke kutilanga chifukwa chakuti tachita ubereŵeza ndi tananga.

¹² Wareke kuŵa ulaka ngwa kufwa, mweniyo kuchiri kunyake kwa luŵavu kwarghika wachituwa mu chibali cha nyina.”

¹³ Sono Mosese wanguriya ku Ambuya kuti, “Muchizgeni, Chiuta mwe, nditukuŵeyereni.”

¹⁴ Kweni Ambuya anguti kwaku Mosese, “Asani wiske wangumufunyiya mata pa maso, kumbi kuti wangaŵa ndi soni mazuŵa ghankhonde ndi ghaŵi cha? Watuzgike ndi kuja kubwalo kwa ugoŵi mazuŵa ghankhonde ndi ghaŵi, pavuli paku gho walondereke so.”

¹⁵ Viyo Miriamu wangujaririkiya kubwalo kwa ugoŵi mazuŵa ghankhonde ndi ghaŵi; ndipo ŵanthu kuti ŵangwenda so lwendo cha mpaka penipo Miriamu wangulondereka so.

¹⁶ Ndipo pavuli pake ŵanthu ŵangusoka pa Hazaroto, ŵangugoŵa mu bozwa la parana.