Mateyu 9 - Tonga Bible 1986

Yesu wachizga munthu wavinjenje

¹ Ndipo wati wasere mu ngaraŵa, wangwambuka, ndipo wanguza mumuzi wake.

² Ndipo, awonani, ŵangumtole wavinjenje wakura pa mphasa; ndipo Yesu wachiwona chivwanu chawo, wanguti ku wavinjenje yo, “Zika mtima, wamwana we, vyagowokereke iwe vyakulakwa vyako.”

³ Ndipo, ŵanyake ŵa ŵalembi ŵangunena mwaku ŵija, “Watuka uyu.”

⁴ Ndipo Yesu, wakuziŵa maghanaghanu ghawo, wanguti, “Chifukwa chine mupimiya viheni mu mitima yinu?

⁵ Chifukwa chiyuyu nichi, kunena, ‘Vyagowokereka vyakulakwa vyako’; pamwe kunena, ‘Soka, ndi endanga?’

⁶ Kweni alinga kuti muziŵe kuti Mwana wa munthu we nayo nthazi panupasi kwachireke vyakulakwa,” sono watiti ku wavinjenje yo, “Soka, to mphasa zako, ndi rutanga ku nyumba yako.”

⁷ Ndipo wanguyuka, wanguruta ku nyumba yake.

⁸ Kweni, yati yawona mizinda yo, yingopa, ndipo yingumkankhuska Chiuta yo wapaska nthazi yaviyo ku ŵanthu.

Yesu wadana Mateyu

⁹ Ndipo wachirutiriyapo Yesu wanguwona munthu, wakudanika Mateyu, wakuja pa nyumba yakusonkhiyapo msonkho; ndipo wangumunene, “Rondo ine.” Ndipo wangusoka, wangumrondo.

¹⁰ Ndipo kunguŵapo, wachija pa kurgha mu nyumba yo, ŵakusonkheska msonkho ŵanandi ndi ŵakulakwa wanguza ndi ŵanguteka pasi pamoza ndi Yesu ndi ŵasambizi ŵake.

¹¹ Ndipo wachiwona ŵaFarisi wo, ŵanguŵanene ŵasambizi ŵake, “Chifukwa chine msambizgi winu waturgha ndi ŵamsonkho ndi ŵalakwi?”

¹² Ndipo, wati wavwa, wanguti, “Kuti ŵakavuka ng'anga ŵamsuma cha, kweni ŵarwali ndiwo.

¹³ Kweni mukachisambire mo chiriri chenichi, ‘Ndilembe lisungu, chisopu cha.’ Chifukwa kuti ndinguza kuzachidana ŵarunjicha, kweni ŵalakwi.”

Fumbu ndi kufunga

¹⁴ Sono ŵangumuziya iyo ŵasambizi ŵaku Yohane, ŵakuti, “Chifukwa chine ifwe ndi ŵaFarisi tifunga panandi, kweni ŵasambizi ŵako kuti ŵafunga cha?”

¹⁵ Yesu wanguŵanene, “Kumbi ŵangatenje ŵana ŵanthengwa, penipo mweninthengwa we nawo pamoza? Kweni ghazenge mazuŵa ndipo wampokeka kwaku wo mweni-nthengwa, ndipo ŵafungenge penipo.

¹⁶ Ndipo palive yumoza wagambika chigamba cha saru yifya pa raya lakuguga; chifukwa chigamba cho chidodomokenge paraya lo, ndipo kuparuka kwake kukaŵanga kuheniko.

¹⁷ Chingana nkhuti ŵapunguliya vinyo mufya mu vikuli vyakuguga cha, iku viphwatukenge vikuli vyo, vinyo wadikenge ndi vikuli vikanangikanga: kweni vinyo mufya ŵapunguliya mu vikuli vifya, ndipo visungika umampha vyose viŵi.”

Mwana munthukazi waku Yairo ndi munthukazi wakusuruwa ndopa

¹⁸ Wachirongoro vyenivyo kwaku wo, awonani, wanguza mura ndi wangumlambiya, wakuti, “Mwana munthukazi wangu sosonukweni wafwa: kweni muzichiŵika pake janja linu, ndipo waŵenge wamoyo.”

¹⁹ Ndipo Yesu wangusoka, wangumrondo, ndi ŵasambizi ŵake.

²⁰ Ndipo, ehe, munthukazi, msuruwa ndopa virimika chumi ndi viŵi, wakuza kuvuli kwake, wangukwaska mphonji za munjirira wake:

²¹ chifukwa mu mtima wake watinge, “Ne ndikwaskenge munjirira wake, mbwenu ndichizgikenge.”

²² Kweni Yesu, wakung'anamuka ndi wakumuwona, wanguti, “Chintha mtima, mwana munthukazi, chivwanu chako chakuchizga.” Ndipo munthukazi yo kutuwa pa ora lenilo wanguchizgika.

²³ Ndipo wachiza Yesu munyumba ya mura yo, ndi wachiwona ŵakutenje wo ndi mzinda wakuwawata,

²⁴ wanguŵanene, “Ndereniko: chifukwa msungwana yo kuti wafwa cha, kweni wara tulo.” Ndipo ŵangumseka.

²⁵ Kweni po mzinda wo ungutuzgika, wangusere, ndi wangumkole janja; ndipo msungwana yo wanguyuka.

²⁶ Ndipo thenthe lake linguwanda mu charu chiya chose.

Yesu wachizga ŵachiburumutiya ŵaŵi

²⁷ Ndipo wachirutiriya Yesu, ŵangumrondo ŵachiburumutiya ŵaŵi, ŵakubongo ndi ŵakuti, “Tifwiyeni lisungu, mwa mwana waku Davidi.”

²⁸ Ndipo po wanguti wazamu nyumba yo ŵanguza kwake ŵachiburumutiya wo; ndipo Yesu wanguti kwaku wo, “Kumbi muvwana kuti nde wanthazi kwachichita chenichi?” Ŵatiti kwaku iyo, “Inya Ambuya.”

²⁹ Sono wangukwaska maso ghawo, wakuti, “Kwakuyana ndi chivwanu chinu kukuŵiyeni.”

³⁰ Ndipo ghangujurika maso ghawo. Ndipo wanguŵachenjezga Yesu, wakuti, “Alereni kuti wangachiziŵa ichi yumoza cha.”

³¹ Kweni yiwo ŵanguruta, ndipo ŵangumuwandiska mu charu chiya chose.

Yesu wachizga

³² Ndipo ŵachituwa iwo, awonani, ŵangumtole wambuwu, wakuŵa ndi demone.

³³ Ndipo wachituzgika demone, wambuwu yo wangurongoro: ndipo yinguzizwa mizinda yo, yakuti, “Kosekose kuti chiuwonekapo chaviyo cha mu Yisraele.”

³⁴ Kweni ŵaFarisi ŵatinge, “Mu mweni-demone watuzga ŵademone.”

Yesu wendi chitima ndi ŵanthu

³⁵ Ndipo Yesu wazunguliyanga misumba yose ndi mizi, kusambizga mu masinagoge ghawo wakumemeza evangeli wa ufumu wo, ndi wakuchizga nthenda yose ndi urwali wose.

³⁶ Kweni pakuwona mizinda yo, wanguyifwiya lisungu, pakuti yenga yakusuzgika ndi yakuparghanika, nge ndi mberere zambura mliska.

³⁷ Sono watiti ku ŵasambizi ŵake, “Chivuna nchikuru, kweni ŵanchitu mbamanavi.

³⁸ Ninizikiyani viyo Mweneko wa chivuna cho alinga watume ŵanchitu ku chivuna chake.”