Mateyu 5 - Tonga Bible 1986

Visambizgu vya pa phiri

¹ Ndipo pakuwona mizinda yo, Yesu wangukwera pa phiri lo, ndipo wati waja pasi, ŵanguza kwaku iyo ŵasambizi ŵake,

² ndipo wakubanuwa mlomo wake waŵasambizganga, wakuti:

Likondwa leneko

³ “Mbakutumbikika ŵasauchi mu mzimu, pakuti ngwawo ufumu wo wa kuchanya.

⁴ “Mbakutumbikika ŵakutenje, pakuti iwo ŵasanguruskikenge.

⁵ “Mbakutumbikika ŵakuzika: pakuti iwo ŵaharenge panupasi.

⁶ “Mbakutumbikika ŵakuvwa nja ndi nyota vya urunji: pakuti iwo ŵagutenge.

⁷ “Mbakutumbikika ŵalisunga: pakuti iwo wachitikiyenge lisungu.

⁸ “Mbakutumbikika ŵakutowa mu mtima: pakuti iwo ŵawonenge Chiuta.

⁹ “Mbakutumbikika ŵakutata chimangu: pakuti iwo ŵazumbulikenge ŵana ŵaku Chiuta.

¹⁰ “Mbakutumbikika ŵakuŵembeka chifukwa cha urunji: pakuti ngwawo ufumu wo wa kuchanya.

¹¹ “Mwe ŵakutumbikika penipo ŵanthu ŵamtoza ndi kuŵemba imwe, ndipo ŵamnena chiheni chose paku imwe kwautesi, pa chifukwa chaku ine.

¹² Sangarukani ndi kondwani, pakuti mphotu yinu njikuru kuchanya; chifukwa wanguŵaŵemba viyo ŵamchimi ŵa paurongo pinu.

Mche ndi ukweru

¹³ “Ndimwe mche wa panupasi: kweni asani mche wasukuruka, ndi chine ukacherekekanga? Kuti ngwanthazi so ku kanthu cha, kweni kutayika kubwaro ndi kupwatikapo ndi marundi gha ŵanthu.

¹⁴ “Imwe mwe ukweru wa charu. Ungabisika cha muzi wakumangika pa phiri.

¹⁵ Chingana nkhuti ŵanthu ŵakozga limbuni ndi kuliŵika kusi ku mwesu cha, kweni pa chikolerunyali; ndipo liŵaliya wose ŵamu nyumba yo.

¹⁶ Viyo ŵaliskani ukweru winu paurongo pa ŵanthu, mwakuti ŵawone nchitu zinu zamampha, ndi ŵakankhuske Auskemwe ŵakuchanya.

Kusambizga ndi dangu

¹⁷ “Mungarunguruka cha kuti ndaziya kuzachinanga chilangulu cho chingana mbamchimi; kuti ndaziya kuzachinanga cha, kweni kuzachifiska.

¹⁸ Nadidi ndikuneniyani, mpaka kuchanya ndi panupasi virutenge, kweni kalembo kamoza kamwenga kadonthu kamoza kuti kangaruta cha kamu chilangulu, mpaka penipo vyose vyafiskika.

¹⁹ Viyo yose yo wangaswa kamoza ka marangu yagha ghamanako, ndipo wangasambizga ŵanthu viyo, wadanikenge mumanako ukongwa mu Ufumu wa kuchanya: kweni yose yo wangachita ndi wangasambizga gho, mweniyo wadanikenge mura mu Ufumu wa kuchanya.

²⁰ Chifukwa ndikuneniyani, kuti, kwambura kuti urunji winu ungaruska wo wa ŵalembi ndi ŵaFarisi, kuti mwamsere mu ufumu wo wa kuchanya cha.

Chisambizgo cha ukali

²¹ “Mwavwa kuti kunguneneka ku ŵamwaka, ‘Mungabaya cha; ndipo yose yo wabaya waŵenge wakukoleka ku cheruzgu.’

²² Kweni ine ndikuneniyani, kuti yose wakumtundiriya mbali wake waŵenge wakukoleke ku cheruzgu, ndipo yose yo wanganyoza mbali wake, waŵenge wakukoleke ku upu wo; ndipo yose yo wanganena, ‘Mvumbwa we’, waŵenge wakukoleke ku gehena la moto.

²³ Viyo asani utole mpasku wako ku chakusopiyapo ndipo ukumbuka kuti mbali wako we nako kanthu paku iwe;

²⁴ reka danga mpasku wako paurongo pa jochero, ndi kanga, danga wanjaniskika ku mbali wako yo, sono pavuli po uzipereke mpasku wako.

²⁵ Uŵe pa wanasi ndi mphindikwa yako ruŵi, weche nayo mu nthowa; vinu kokuli mphindikwa yo yingakupereka ku mweruzgi, ndi mweruzgi wangakupereka ku mlinda wa ŵamkoli yo, ndi ungatayika mu ulinda.

²⁶ Nadidi ndikunene, kuti ungatuwamo ŵaka mwenimo cha, mpaka po walipa katambala kakumariya.

Chisambizgo cha ureŵi

²⁷ “Mwavwa kuti kunguneneka, ‘Ungareŵa cha.’

²⁸ Kweni ine ndikuneniyani, kuti yose wakulereska munthukazi kumkhumbira, wareŵa nayo kali mu mtima wake.

²⁹ Kweni asani jiso lako lamarghe litukuguŵiska, ulikorowo, ndi ulitaye; chifukwa nkhwamandulika kwaku iwe kuti chinangike chimoza cha viŵaru vyako, kwakuruska kuti litayike mu gehena liŵavu lako lizirima.

³⁰ Ndipo asani janja lako lamarghe litukuguŵiska, ulidumuwe ndi ulitaye: chifukwa nkhwamandulika kwaku iwe kuti chinangike chimoza cha viŵaru vyako, kwakuruska kuti litayike mu gehena liŵavu lako lizirima.

Chisambizgo cha chipata

³¹ “Ndipo kunguneneka kuti, ‘Yose yo wangapata muwoli wake, wampaske karata wa chipata.’

³² Kweni ine ndikuneniyani, kuti yose wakupata muwoli wake kwambura kuti mpha chifukwa cha ureŵi, wamuchitiska kureŵa: ndipo yose yo wangamto wati wapatika, wareŵa.

Kusambizga ndi marapu

³³ “Ndipo so mwavwa kuti kunguneneka ku ŵanthu ŵamwaka, ‘Ungarapa kwautesi cha, kweni uperekenge ku Ambuya marapu ghako.’

³⁴ Kweni ine ndikuneniyani, Ungarapa kose cha; chingana khuchanya, pakuti nchitengu chaku Chiuta;

³⁵ chingana ndi panupasi, pakuti nchitambaliru cha marundi ghake: chingana ndi Yerusalemu, pakuti ndi msumba wa karonga mura.

³⁶ Chingana nkhurapa pa mutu wako cha, pakuti ulive nthazi kwachichita sisi limoza kulisanduska kuti liŵe lituŵa pamwenga lifipa.

³⁷ Kweni mazu ghinu pakurongoro ghaŵe, ‘Inya,’ pamwenga, ‘Awa’; ndipo ghakutaruliya kwaku yagha ngakutuwa ku mheni yo.

Kusambizga ndi chiwezge-nduzga

³⁸ “Mwavwa kuti kunguneneka, ‘Jiso ku jiso, ndi jino ku jino.’

³⁹ Kweni ine ndikuneniyani, Ungamikana nayo mheni cha. Ndipo yose yo wakupamantha pa dakama lako lamarghe, umung'anamuliye linyake nalo;

⁴⁰ ndipo kwaku yo ngwakukhumba kukutole mrandu ndi kuto munjirira wako, mreke wato so raya lako.

⁴¹ Ndipo yose yo wakukakamizga kumlinda mtunda umoza, yenda nayo mtunda yiŵi.

⁴² Paska kwaku yo wakupempha, ndipo ku wakukhumba kulamba kwako, ungamukaniya cha.

Kwanja ŵamawongo ŵidu

⁴³ “Mwavwa kuti kunguneneka, ‘Wanjenge mwanase wako, ndipo utinkhenge wamawongu wako.’

⁴⁴ Kweni ine ndikuneniyani, Ŵanjeni wamawongu ŵinu, ndipo ŵarombiyeni ŵakuŵemba imwe,

⁴⁵ alinga kuti muŵenge ŵana ŵa Auskemwe ŵakuchanya: pakuti atuzgiya dazi lawo pa ŵaheni ndi ŵamampha, ndipo ang'iskiya vuwa pa ŵarunji ndipa ŵaziraurunji.

⁴⁶ Chifukwa asani munganja ŵakukwanjani pe, mwendiphotu uli? Asi ŵamsonkhu nawo ŵachita chenicho?

⁴⁷ Ndipo asani mungatauzga ŵabali ŵinu pe, muchita chine chakuruska? Asi ŵaMitundu nawo ŵachita chenicho?

⁴⁸ Viyo muŵenge ŵarunji imwe, nge ndimo Auskemwe ŵakuchanya ŵaliri ŵarunji.