Mateyu 3 - Tonga Bible 1986

Yohane Mbatizi watamba nchitu yake

¹ Ndipo mu mazuŵa ghenigha wanguza Yohane Mbatizi yo, wakumemeza mu bozwa laku Yuda, wakuti,

² “Ng'anamukani; chifukwa waŵandika ufumu wa kuchanya.”

³ Chifukwa mweniyo ndiyo wanguneneka ndi Yesaya mchimi yo, kuti, “Liu la wakubongo mu bozwa, Rongosoni nthowa ya Ambuya, Nyoroskani miseu yake.”

⁴ Kweni mweniyo Yohane wenga ndi chakuvwara chake cha weya wa gamila, ndi likwamba la chikopa lo wamanganga mu chiunu chake; ndipo chaukurgha chake chenga ŵazombe ndi uchi wamu dondo.

⁵ Ndipo kungutuliya kwaku iyo Yerusalemu ndi Yuda yose ndi charu chose chakuzunguliya Yordane;

⁶ ndipo ŵabatizikanga ndi iyo mu msinji Yordane, ŵakusumuwa vyakulakwa vyawo.

⁷ Kweni wachiwona ŵanandi ŵa ŵaFarisi ndi ŵaSaduki ŵakuza ku ubatizo wake, wanguŵafumba, “Mwa mphapu za vipi, njani wangukucheŵeskani kuthaŵa kandundu ko katuza?

⁸ Viyo pasani vipasi vyakwenere ching'anamuka,

⁹ ndipo mungapimanga cha kunena mwaku mwaŵeni, ‘Uskefwe te nayo Abrahamu,’ chifukwa ndikuneniyani kuti ngwanthazi Chiuta ku mya yeniyi kumyuskiya Abrahamu ŵana.

¹⁰ Ndipo sono nako mbavi yajikika ku nkhorozu za miti, chimuti chose chakureka kupasa vipasi vyeneko chitemeka ndipo chipong'eka mu moto.

¹¹ “Ine nadi ndikubatizani ndi maji ku ching'anamuka: kweni yo watuza pavulipangu ngwanthazi ndi ine, viyatu vyaku mweniyo kuti nde wakwenere cha ine kufwatuwa. Iyo wamkukubatizani ndi Mzimu Wakupaturika ndi moto.

¹² Mweniyo chipepeteru chake che mu janja lake, wakatoweskanga mbuli wake; ndi kuwunjika trigu wake mu nkhokwe, kweni wamukocha mwere ndi moto wambura mazimwika.”

Yesu wabapatizika ndi Yohane mu msinji wa Yordane

¹³ Sono wanguza Yesu ku Yordane kwaku Yohane kutuwa ku Galile kwachibatizika ndi iyo.

¹⁴ Kweni Yohane wamkaniyanga, wakuti, “Ine ndikavuka kubatizika ndi imwe, ndipo kumbi imwe mutuza kwaku ine?”

¹⁵ Kweni wakwamuka Yesu wangumunene, “Inya kuŵi viyo: chifukwa nkwakwenere ifwe kufiska urunji wose.” Sono wangumzomerezga.

¹⁶ Ndipo wachibatizika Yesu wati wazuwuka mu maji, ruŵi, machanya ghangumjurikiya, ndipo wanguwona Mzimu waku Chiuta, usiku ulaka ndi nkhunda, ndi kubota paku iyo.

¹⁷ Ndipo, wonani, liu linguvwika kutuwa kuchanya, lakuti, “Mweniyo ndi Mwana wangu, nkhwanjiwa, mwaku mweniyo ndikondwere.”