Mateyu 28 - Tonga Bible 1986

Chiyuka cha Ambuya ku ŵakufwa

¹ Ndipo lati laruta Sabata, pa matanda kucha pa zuŵa lachimoza la lisabata, ŵanguruta Mariya Magdala, ndi Mariya munyake yo kwachiwona muunda.

² Ndipo onani, kunguŵapo chiyeuyeu chikuru; chifukwa mungelo wa Ambuya wangusika kuchanya, ndipo wanguza ndi wangugadabuwa mwa wo, ndipo wanguja ndeku pachanya pake.

³ Ndipo kawonekedu kake kenga nge ndi limphezi, ndi kavwaridu kake kangutowa nge ndi matarara:

⁴ ndipo pakumopa ŵaronda wo ŵangutenthema, ndipo ŵanguwa nge mbakufwa.

⁵ Kweni mungelo yo wakwamuka wanguŵanene ŵanthukazi, “Mungopanga cha, chifukwa ndiziŵa kuti mupenja Yesu yo wangupayikika.

⁶ Kuti walipo panu cha; wayuka uli ndimo wangunene. Zani, muwone malo po wangura.

⁷ Ndipo rutani ruŵi, ŵaneniyeni ŵasambizi ŵake, kuti, Wayuka ku ŵakufwa; ndi, onani, wakudanjiriyani ku Galile, kweniko mwamkumuwona: onani, ndakuneniyani.”

⁸ Ndipo ŵangutuwako ruŵi ku muunda ndichopu ndi chimwemwe chikuru; ŵanguchimbiya kwachitauliya ŵasambizi ŵake.

⁹ Ndipo, onani, Yesu iyo wangukumana nawo, wakuti, “Mauleni!” Ndipo Wanguza, ndi ŵanguko marundi ghake, ndipo ŵangumlambiya.

¹⁰ Sono Yesu watiti kwaku wo, “Mungopanga cha; kaninga, katauliyeni ŵabali ŵangu kuti ŵakenge ku Galile, ndiko ŵamukundiwona.”

Makani gha ŵaronda

¹¹ Ndipo ŵachiruta iwo, onani ŵanyake ŵa ŵaronda ŵanguza mu msumba, ndipo ŵangutauliya ŵazukuru ŵara vyakuŵapo vyose.

¹² Ndipo ŵachiwunjikana pamoza ndi ŵara, ŵangupangana fundu, ŵangupaska ndrama zinandi ku ŵankhondo wo,

¹³ ŵakuti, “Nenani, ‘Ŵanguza ŵasambizi ŵake ndi usiku, ndipo ŵamuba po ifwe tenga mutulo.’

¹⁴ Ndipo asani ichi chingavwika ku nduna yo, wakhorwenge nafwe ndipo imwe timutuzgeningimo mu suzgu.”

¹⁵ Ndipo iwo ŵakuronde ndrama zo ŵanguchita uli ndimo ŵangusambizgikiya: ndipo makani ghenigho ghanguwandiskika mu ŵaYuda mpaka kuno kule.

Yesu wawoneka ku ŵasambizi ŵake

¹⁶ Kweni ŵasambizi wo chumi ndiyumoza wanguruta ku Galile, ku phiri lo Yesu wanguŵateme.

¹⁷ Ndipo ŵachimuwona, ŵangumlambiya: kweni ŵanyake ŵangukangang'a.

¹⁸ Ndipo Yesu wanguza, wangurongoro nawo, wakuti, “Wapaskika kwaku ine mtufu wose kuchanya ndi panupasi.

¹⁹ Viyo rutani, sambizgani mitundu yose, ŵakuŵabatiziya mu zina la Dada ndi la Mwana ndi la Mzimu ŵakupaturika:

²⁰ ŵakuŵasambizga kuroreze vyose vyo ndalanguliya imwe: ndipo onani, ine nde namwe mazuŵa ghose mpaka ku umari wa mgonezi wo.”