Mateyu 26 - Tonga Bible 1986

Ŵazukuru ndi ŵaFarisi ŵapangana kumuko Yesu

¹ Ndipo kunguŵa, penipo Yesu wangumara mazu ghenigho ghose, wangunena ndi ŵasambizi ŵake,

² “Muziŵa kuti pavuli pa mazuŵa ghaŵi kuŵenge dghera la phaska, ndipo Mwana wa munthu wakombolekenge kwachipayikika.”

³ Sono ŵanguwunjikana ŵazukuru ŵara ndi ŵara ŵa khamu mu mphara ya mzukuru mura, wakutamulika Kayafa:

⁴ ndipo ŵangupangana kumko Yesu mu uchenjezi, ndi kumubaya.

⁵ Kweni ŵanenanga, “Mu dghera cha, vinu chingaŵapo chiwawa mu khamu lo.”

Yesu watukutizgika mafuta ku Betaniya

⁶ Ndipo pakuŵa Yesu mu Betaniya mu nyumba yaku Simone wamakhate,

⁷ kunguza munthukazi wakuŵa ndi supa yasangarawe ya muro wa mtengu ukuru, ndipo wangughapunguliya pa mutu pake, wachija pa kurgha.

⁸ Kweni ŵachiwona ŵasambizi wo ŵangutundiya ŵakuti, “Ncha chine chitayiku ichi?

⁹ Chifukwa muro lo linguziŵa kusaskika ndrama zinandi, ndi kupaskika ku ŵakavu.”

¹⁰ Kweni Yesu wakuwamo wanguŵanene, “Mutumsuzgiyanji munthukazi? Wandichitiya mlimu wamampha.

¹¹ Chifukwa nyengo zose mwe nawo ŵakavu pamoza namwe; kweni kuti mwe ndi ine nyengo zose cha.

¹² Chifukwa uyu po wapunguliya muro ili pa liŵavu langu, nkhundirongosole kukuŵikika.

¹³ Nadidi ndikuneniyani, kose ko evangeli uwu umemezekenge mu charu chose, chenicho nacho mwenuyu wachita, chikakambikanga nge nchikumbusku chake.”

Yuda wapangana kumukombo Yesu

¹⁴ Penipo yumoza wa chumi ŵaŵi wo, wakudanika Yuda mKeriote, wanguruta ku ŵazukuru ŵara.

¹⁵ Ndipo wanguŵafumba, “Mukandipaskanga chine, asani ndamukombole kwinu?” Ndipo iwo ŵangumwese vyasiliva machumi ghatatu.

¹⁶ Ndipo kwamba penipa wapenjanga nyengo yakufwasa alinga kuti wamukombo.

Yesu warongoso kurgha dghera la phaska

¹⁷ Ndipo pa zuŵa lachimoza la dghera la vyamburamtupu ŵasambizi ŵanguza kwaku Yesu, ŵakuti, “Mukhumba tikurongosoliyeni nunkhu kurgha phaska?”

¹⁸ Ndipo wanguti iyo, “Sereni mu msumba kwaku yanimweni, ndi muneniyeni, ‘Msambizi watiti, Nyengo yangu ye pafupi; ndirghenge phaska mu nyumba yako pamoza ndi ŵasambizi ŵangu.’ ”

¹⁹ Ndipo ŵasambizi ŵanguchita uli ndimo Yesu wanguŵalanguliya, ndipo ŵangulirongoso phaska.

²⁰ Ndipo pakuŵa mazuro wanguja pasi pamoza ndi ŵasambizi wo chumi ndi ŵaŵi;

²¹ ndipo ŵachirgha iwo, wanguti, “Nadidi, ndikuneniyani kuti yumoza waku imwe wandipachiyenge.”

²² Ndipo ŵanguŵa ŵachisungu ukongwa, ndipo ŵangwamba yumoza yumoza kunena nayo, “Kumbi ndine, Ambuya?”

²³ Kweni wakwamuka wanguti, “Wakubwenga pamoza nane janja lake mu mbali, ndiyo wandipachiyenge.

²⁴ Kweni Mwana wa munthu waruta, uli ndimo kwalembeke ndi iyo; kweni owe ku munthu yo mweniyo Mwana wa munthu wapachirika nayo! Kwenga kwamampha kwaku iyo, asani wengavi kupapika.”

²⁵ Kweni Yuda, yo wangumpachiya, wanguti, “Kumbi ndine, Rabi?” Watiti kwaku iyo, “Iwe wakamba.”

Njonesku ya Ambuya

²⁶ Ndipo ŵachirgha, Yesu wanguto chiŵande wangutumbika, ndi wangumenya; ndipo wangupaska ku ŵasambizi wo, wanguti, “Rondani, rghani; ichi ndi liŵavu langu.”

²⁷ Ndipo wanguto nkhombo, wanguti wawonga, wangupaska kwaku wo, wakuti, “Mwiyanimo mose;

²⁸ chifukwa ili ndi ndopa zangu za chipanganu chifya, zakudikiya pa chifwa cha ŵanandi ku chireke cha vilakwa.

²⁹ Kweni ndinene imwe, kuti ndimwengepo so cha chipasi ichi cha mphereska kutuwa ku sono mpaka zuŵa liya, penipo pamoza namwe ndimwenge chifya mu ufumu wa Ada.”

³⁰ Ndipo ŵanguti ŵamba sumu ŵangutuliya ku phiri la Olivete.

Yesu wakamba ndi kumkana kwaku Petro

³¹ Sono Yesu wanguti kwaku wo, “Imwe mose muguŵiskikenge mwaku ine usiku uno: chifukwa kwalembeka, ‘Ndikosonge mliska, ndipo ziparghanikenge mberere za mskambu.’

³² Kweni ndati ndayuskika ine, ndikudanjiriyeninge ku Galile.”

³³ Kweni wakwamuka Petro wangunena nayo, “Chingana wose ŵaguŵiskike mwaku imwe, ine kuti ndiguŵiskikenge cha.”

³⁴ Yesu wanguti kwaku iyo, “Nadidi ndikunene, kuti usiku uno wandakokoŵereke tambala, undikanenge katatu.”

³⁵ Petro wanena nayo, “Chingana kungandenere kufwa pamoza namwe, kuti nkhakananga imwe cha.” Kwakulingana so ŵangukamba ŵasambizi wose.

Yesu waromba mu Gesemane

³⁶ Sono watuza Yesu pamoza nawo ku malo ghakuzumbulika Gesemane, ndipo waŵanene ŵasambizi, “Jani penipanu po ine ndiruta kuwa kwachiromba.”

³⁷ Ndipo wakutole pamoza nayo Petro ndi ŵana ŵaŵi ŵaku Zebediya, wangwamba kukoreka lisungu ndi kusuzgika ukongwa.

³⁸ Sono wanguti kwaku wo, “Mzimu wangu ngwalisungu ukongwa mpaka ku nyifwa; tandarani panu, cherezgani pamoza nane.”

³⁹ Ndipo pakurutiyapo kunthazi kamanavi, wanguwa kavunama, wakuromba ndi wakuti, “Ada, asani kungachitika, yindirutiriye nkhombo iyi: kweni uli ndimo ndikhumbiya ine cha, kweni mo mukhumbiya imwe.”

⁴⁰ Ndipo wanguza ku ŵasambizi, wanguŵasaniya ŵara tulo, ndipo watiti kwaku Petro, “Kwari? Kuti munguziŵa cha kucherezga pamoza nane ora limoza?

⁴¹ Khazgani, ndi rombani, alinga mureke kusere mu kusedu, mzimu nadi ngwakukhumba kuromba, kweni liŵavu ndakutomboroka.”

⁴² Kachiŵi wanguruta ndipo wanguromba, wakuti, “Ada, asani mukhumba, mutuzgeko kwangu nkhombo iyi, khumbo langu cha, kweni khumbo linu lichitike.”

⁴³ Ndipo wachiza so wanguŵasaniya ŵara tulo, chifukwa maso ghawo ghangundota.

⁴⁴ Ndipo wakuŵasiya, wanguruta kwachiromba kachitatu, wakukamba so mazu ghakuyana ŵaka.

⁴⁵ Sono watuza ku wasambizi wo, ndipo waŵanene, “Kumbi mweche kura, ndi kujipumuzga? Onani, ora laŵandika, ndipo Mwana wa munthu wapachirika mu manja gha ŵakulakwa.

⁴⁶ Yukani, tirutenge: awonani, waŵandika wakundipachiya yo.”

Kukoreka kwaku Yesu

⁴⁷ Ndipo, weche kurongoro iyo, onani, Yuda, yumoza wa chumi ndi ŵaŵi wo, wanguza, ndi pamoza nayo mzinda ukuru ndi malipanga ndi zinthonga, ŵakutuwa ku ŵazukuru ŵara ndi ŵara ŵa khamu.

⁴⁸ Ndipo wakumpachiya yo wanguŵapaska chisimikizgu, wakuti, “Mweniyo ndakumufyofyontha, ndiyo: mukoni.”

⁴⁹ Ndipo, wanguza kwaku Yesu, ruŵi wanguti, “Mauleni, Rabi”; ndipo wangumufyofyontha.

⁵⁰ Kweni Yesu wanguti kwaku iyo, “Bwezi, chita cho waziya?” Sono ŵanguza, ŵanguŵika manja paku Yesu, ndipo ŵangumko.

⁵¹ Ndipo onani, yumoza waku wo ŵapamoza ndi Yesu, wangutambaruwa janja, wanguwewepuwa lipanga lake, ndipo wakutema muŵanda wa mzukuru mura, wangudumuwa gutu lake.

⁵² Sono Yesu watiti kwaku iyo, “Wezga lipanga lako mu malo ghake: chifukwa wose ŵakuto lipanga ŵanangikenge ndi lipanga.

⁵³ Pamwenga kumbi upima kuti ndirive nthazi kuŵeyere Ada, ndipo andipaskenge sosonukweni ŵakuruska maliŵanja chumi ndi ghaŵi gha ŵangelo?

⁵⁴ Kweni na ghangafiskika uli malembo gho, kuti kutenere kuŵa viyo?”

⁵⁵ Mu ora liya wanguti Yesu ku mizinda yo, “Kumbi mwatuliya nge mpha munkhungu ndi malipanga ndi zindodo kuzachindiko? Zuŵa ndi zuŵa mu kasopi ndajanga pasi wakusambizga, ndipo kuti mungundiko cha.

⁵⁶ Kweni chose ichi chaŵapo, alinga kuti makani gha ŵamchimi ghafiskike.” Sono wasambizi wose, ŵangumusiya, ŵanguthaŵa.

Paurongo pa upu

⁵⁷ Ndipo wo ŵangumko Yesu ŵangumgumizgiya kwaku Kayafa, mzukuru mura, kweniko kunguwunjikana ŵalembi ndi ŵara.

⁵⁸ Kweni Petro wamrondonga kutariko, mpaka ku mphara ya mzukuru mura yo, ndipo, wangusere mukati, wanguja pasi pamoza ndi ŵakuteŵeta kwachiwona kamaridu ko.

⁵⁹ Ndipo ŵazukuru ŵara ndi upu wose ŵapenjanga ukaboni wa utesi paku Yesu, alinga kuti ŵamubaye,

⁶⁰ ndipo kuti ŵanguwusaniya cha, chingana ŵanguzako ŵakaboni ŵatesi ŵanandi. Kweni pavuli pake ŵanguza ŵaŵi,

⁶¹ wo ŵanguti, “Mwenuyu wanguti, ‘Nde wanthazi kwananga kasopi waku Chiuta, ndi kumuzenga so mu mazuŵa ghatatu.’ ”

⁶² Ndipo mzukuru mura, wati wasoka, wanguti kwaku iyo, “Kumbi utamuka kanthu cha? Nchine cho ŵatikusimikizgiya yaŵa?”

⁶³ Kweni Yesu wanguchetama chete. Ndipo mzukuru mura wangumnene, “Ndikurapiya paku Chiuta Wamoyo, kuti utinene asani iwe ndiwe Kristu iyo, Mwana waku Chiuta.”

⁶⁴ Wamnene Yesu, “Iwe wakamba. Ndikweni ndikunene, kwanda sono muwonenge Mwana wa munthu wakujariya ku janja la marghe la wanthazi yo, ndi wakuziya pa mitambo ya kuchanya.”

⁶⁵ Sono mzukuru mura wanguparuwa minjirira yake, wakuti, “Watokota: na, tikavukiyanji so ŵakaboni ŵanyake? Awonani, mwavwa kutokota kwake?

⁶⁶ Murungurukanji?” Ndipo ŵakwamuka ŵanguti, “Ngwakwenere nyifwa.”

⁶⁷ Penipo ŵangumufunyiya mata ku maso, ndipo ŵangumjenyeska: ndipo ŵanyake ŵangumpuma makofi,

⁶⁸ ŵakuti, “Tiloske, Kristu we: njani yo wakukoso?”

Petro wakana Yesu

⁶⁹ Kweni Petro wanguja pasi pabwaro mu luluwa; ndipo msungwana yumoza wanguza ndi wanguti, “Iwe nawe wenga pamoza ndi Yesu waku Galile.”

⁷⁰ Kweni iyo wangukana paurongo paku wose, wakuti, “Kuti ndiziŵa cha cho ukamba.”

⁷¹ Ndipo wati watuliya kubwaro ku likomu, munthukazi munyake wangumuwona, ndipo watiti kwaku wo ŵenga kweniko, “Mwenuyu nayo wenga pamoza ndi Yesu waku Nazarete.”

⁷² Ndipo wangu­kana so ndi rapu, “Kuti ndimziŵa yo munthu cha.”

⁷³ Jepu kamanavi wo ŵangumapo ŵanguza, ndipo ŵangunena ndi Petro, “Kwakuneneska iwe nawe we waku wo; chifukwa karongoroledu kako katukupanikizga.”

⁷⁴ Sono wangwamba kutemba ndi kurapa, kuti, kuti, “Ndimziŵa cha yo munthu.” Ndipo sosonukweni wangukokoŵereka tambala.

⁷⁵ Ndipo wangukumbuka Petro mazu ghaku Yesu, ghakuti, “Wandakokoŵereke tambala, undikanenge katatu.” Ndipo wakutuliya kubwaro, wanguliya kwakuŵaŵa.