Mateyu 24 - Tonga Bible 1986

Yesu wakamba ndi kubwanganduka kwa kasopi

¹ Ndipo Yesu wangutuwako kukasopi, ndi warutanga; ndipo wasambizi ŵake ŵanguza kwaku iyo kumurongo mazengedu gha kasopi yo.

² Kweni wakwamuka wanguŵanene, “Asi muwona vyose vyenivi? Ndikuneneskiyani, kuti usiyikengepo cha panu mwa pa mwa, wo urekenge kupong'eka pasi.”

Visuzgu ndi viŵembu

³ Ndipo wachija pasi pa phiri la Olivete, ŵanguza kwake wasambizi wo kuubende, ŵakuti, “Tineniyeni, viŵengepo vyenivyo zuŵanji? Ndipo chiŵenge chine chisimikizgu cha uzi winu, ndi cha umari wa mgonezi wo?”

⁴ Ndipo Yesu wakwamuka wanguŵanene, “Chenjeni vinu yumoza wangakurandizgani.

⁵ Chifukwa ŵanandi ŵaziyenge mu zina langu, ŵakuti, ‘Ine ndine Kristu yo’: ndipo ŵarandizgenge ŵanandi.

⁶ Ndipo muvwenge zinkhondo ndi mbiri za zinkhondo; wonani, mungopanga cha: chifukwa vikaŵangapo vyenivyo; kweni kamaridu kuti ndikeniko cha.

⁷ Chifukwa mtundu uyukiyenge pa mtundu, ndi ufumu pa ufumu: ndipo viŵengepo vilala ndi viyeuyeu mu malo ndi malo;

⁸ vyose ivi nchiyambo cha maurwirwi.

⁹ “Penipo ŵamkukukomboleni ku suzgu, ŵamkukubayani: ndipo muŵenge ŵakutinkhika ndi mitundu yose pa chifukwa cha zina langu.

¹⁰ Ndipo penipo ŵaguŵiskikenge ŵanandi, ŵapachiyanenge, ndipo ŵatinkhanenge.

¹¹ Ndipo ŵamchimi ŵatesi ŵanandi ŵayukenge, ndipo ŵarandizgenge ŵanandi.

¹² Ndipo pakuti wandaniskikenge uchikana marangu, chizizirenge chanju cha ŵanandi.

¹³ Kweni wakukunthiyapo mpaka umari, mweniyo wataskikenge.

¹⁴ Ndipo evangeli wenuwu wa ufumu umemezekenge mu charu chose chapasi uli mbukaboni ku mitundu yose; pavuli ndipo ukazanga umari wo.

Chimutimbaheka chakofya

¹⁵ “Viyo penipo muwonenge unyakazi wa mapopa, wakukambika ndi Danyele mchimi yo, uchima mu malo ghakupaturika (yo waŵerenga wawemo),

¹⁶ po ndipo ŵamu Yuda ŵathaŵiyenge ku mapiri;

¹⁷ wapa nyumba pachanya wangasika cha kwachito vyamu nyumba yake;

¹⁸ ndipo wamu munda wangawere vuli cha kwachito munjirira wake.

¹⁹ Kweni owe kwaku wo mbanthumbo ndi ŵakonkheska mu mazuŵa ghenigha!

²⁰ Ndipo murombe kuti kuthaŵa kwinu kungaŵako mu chipwepwe cha, chingana mpha Sabata cha.

²¹ Chifukwa chiŵengeko penipo chisuzgu chikuru, chakuti chengavi kuŵapo chaviyo kutuwa ku mtendeku wa charu mpaka kuno ku le, chingana nkhuti chikaŵangapo so cha.

²² Ndipo asani ghengavi kufupiskika mazuŵa gha, mphanyi kuti chingana njumoza watinge wataskikenge cha: kweni chifukwa cha ŵakusankhika ghafupiskikenge mazuŵa gha.

²³ Penipo asani yumoza wangakuneniyani, ‘Awonani, panu pe Kristu’; pamwenga, ‘Panu ndipo’; mungavwananga cha.

²⁴ Chifukwa ŵayukenge ŵanthu ŵanyake wo ŵajiŵikengemo kuti ndiwo Kristu ndi ŵanyake kuti mbamchimi. Ndipo wapaskenge visimikizgu vikuru ndi minthondwe, kwachirandizga (asani kwenga kwamachitika chingana mbakusankhika nawo)

²⁵ onani, ndakukambiyani limu.

²⁶ Viyo asani ŵangakuneniyani, ‘Onani, wemu bozwa’; mungatuliyangako cha: ‘Onani, we muvipinda vyamukati’; mungavwananga cha.

²⁷ Chifukwa uli ndimo limphezi limwetukiya ku utuli wa dazi, ndipo liwoneka mpaka kuuserere; viyo ndimu uŵiyenge uzi wa Mwana wa munthu.

²⁸ Kose ko chingaŵa chiŵanda, kweniko ndiku ghaunjikanenge makuŵi.

Kuza kwa Mwana wa munthu

²⁹ “Kweni sosonukweni pavuli pa suzgu ya mazuŵa gho dazi lifipiskikenge, mwezi urekenge kupaska kuŵala kwake, ndipo nyenyezi zimbotokenge kuchanya, ndi vyanthazi vyamu machanya visukuniskikenge;

³⁰ sono chiwonekenge chisimikizgu cha Mwana wa munthu kuchanya: ndipo mafuku ghose gha charu ghatenjenge, ndipo ghawonenge Mwana wa munthu wachiza pa mitambo ya kuchanya ndi nthazi ndi unkhankhu ukuru.

³¹ Ndipo watumenge ŵangelo ŵake ndi chizozu chikuru cha mbata, ndipo ŵawungang'enge ŵakusankhika ŵake ku mphepu zinayi, kutuwa ku vigoti vyakuti vya machanya mpaka ku vigoti vinyake.

Chisambizgu cha chimuti cha mkuyu

³² “Kweni ku mkuyu sambiraniko ntharika yake: penipo mphanda yake njakutefwatefwa, ndi yibuska liwondwe, muziŵa kuti chihanya che pafupi.

³³ Kwakulingana namwe so penipo muwona vyenivyo vyose, ziŵani kuti we pafupi, pa khomu ipu.

³⁴ Nadidi ndikuneniyani, mgonezi uwu kuti urutengepo cha, mpaka penipo ivi vyose vyafiskika.

³⁵ Kuchanya ndi pasi virutenge, kweni mazu ghangu kuti gharutenge cha.

Palivi yo waziŵa zuŵa ndi ora

³⁶ “Kweni vya zuŵa lo ndi ora lake palive yumoza waziŵa, chingana mbangelo ŵa kuchanya, chingana ndi Mwana iyo, kweni Ada pe ŵija.

³⁷ Kweni uli ndi mu mazuŵa ghaku Nowa, viyo ndimu uŵiyenge uzi wa Mwana wa munthu.

³⁸ Chifukwa mu mazuŵa gho, chengachindaze chazandi cho ŵarghanga, ŵamwanga, ŵatonga ndi ŵaŵirwanga, mpaka ku zuŵa lo wanguserere Nowa mu chingaraŵa cho,

³⁹ ndipo kuti ŵanguziŵa kanthu cha mpaka chazandi cho chinguza, ndi chinguŵakukurwiska wose; viyo ndimu uŵiyenge uzi wa Mwana wa munthu.

⁴⁰ Muŵenge ŵanthurumi ŵaŵi mu munda; yumoza watolekenge, ndipo yumoza wasiyikenge,

⁴¹ ŵanthukazi ŵaŵi ŵaperenge pa mphe; yumoza watolekenge, ndipo yumoza wasiyikenge.

⁴² Viyo khazgani: pakuti mulive kuziŵa zuŵa mwaku lenilo Ambuyamwe ŵaziyenge.

⁴³ Kweni chenichi ziŵani, kuti asani mweni-nyumba wanguziŵa lindu mwaku lenilo munkhungu wangaziya mphanyi wangukhazga, ndipo kuti watinge wazomerezgenge cha kubukutulika nyumba yake.

⁴⁴ Chifukwa chenichi imwe namwe muŵe ŵakurongosoleka: chifukwa Mwana wa munthu wazenge mu ora lenilo mulive kurunguruka.

Mteŵete wamagomekezgeka, ndi wambura magomekezgeka

⁴⁵ “Na, ndiyani muŵanda wamagomekezgeka yo ndi wakuwamo, asi ndimweniyo mbuyake wamuŵika pa ŵamunyumba yake kwachiŵapaska chaukurgha pa nyengo yake?

⁴⁶ Ngwamwaŵi muŵanda yo, mweniyo mbuyake wachiza wamsaniyenge ngwakuchita viyo!

⁴⁷ Nadidi ndikuneniyani kuti wamuŵikenge pa vyake vyose.

⁴⁸ Kweni asani muŵanda mweniyo mheni wanenenge mu mtima wake, ‘Ambuya ŵaswera,’

⁴⁹ ndipo wambenge kuŵapuma ŵaŵanda ŵanyake, ndi warghenge ndi kumwa pamoza ndi ŵaloŵevu,

⁵⁰ wazenge mbuya wa muŵanda yo muzuŵa lenilo walive kulereze, ndi mu ora lenilo walive kuziŵa.

⁵¹ Ndipo wamulangenge, ndi wamtemiyenge chigaŵa chake pamoza ndi ŵafuzi: kweniko kukaŵanga kuliya ndi mkukutu wa minyu.