Mateyu 22 - Tonga Bible 1986

Ntharika ya chiphikiro cha nthengwa

¹ Ndipo Yesu wanguŵakambiya so mu zintharika, wakuti,

² “Ufumu wa kuchanya ukozgana ndi munthu karonga, mweniyo wangubikiya mwana wake zowara,

³ wangutuma ŵaŵanda ŵake kwachiŵadana ŵakudanika ku zowara zo: kweni kuti ŵangukhumba kuzako cha.

⁴ Wangutuma so ŵaŵanda ŵanyake, wakuti, ‘Kaŵaneniyeni ŵakudanika wo, Onani, mrauku wangu ndarongoso; ng'ombe zangu ndi vyakununa vyangu vyabayika, ndipo vyose vyarongosoreka: zaninga ku zowara.’

⁵ Kweni iwo, ŵakuyeya, ŵangutuwako, uyu ku munda wake, yuwa ku maronda ghake;

⁶ ndipo ŵakujapo ŵanguŵako ŵaŵanda ŵake, ŵanguŵachitiya uheni, ndi ŵanguŵabaya.

⁷ Karonga wangukalipa; ndipo wati watuma nkhondu zake, wangwananga ŵambandaŵa, ndipo wangocha muzi wawo.

⁸ Sono watiti ku ŵaŵanda ŵake, ‘Nthengwa yarongosoleka kale, kweni ŵakudanika ŵengavi kwene.

⁹ Viyo kaninga mu nthowa zamu utuliye; ndipo wose wo mungasaniya, ŵadaniyeni ku zowara zo.’

¹⁰ Ndipo ŵachituwa ŵaŵanda ŵa ku nthowa zo wanguto wose wo ŵangusaniya, ŵaheni ndi ŵamampha: ndipo nthengwa yo yinguzara nawo ŵazowara.

¹¹ “Kweni wachisere karonga kwachiŵawona ŵazowara, wanguwona mwenimo munthu wambura kuvwara chivwaru cha nthengwa:

¹² ndipo watiti kwaku iyo, ‘Bwezi, wasere uli muno wambura chivwaru cha nthengwa?’ Ndipo wanguchetama chete.

¹³ Sono karonga yo wangunene ŵakuteŵeta, ‘Mumangeni marundi ndi manja, ndi mpong'eni ku mdima wakubwaro; kweniko kuŵenge nkhuta ndi mkukutu wa minyu.’

¹⁴ Chifukwa mbanandi ŵakudanika, kweni ŵakusankhika mbamanavi.”

Fumbo la kasonkhedu ka msonkhu

¹⁵ Penipo ŵaFarisi ŵanguruta ndipo ŵangupangana upu, mo ŵangamkole mu mazu.

¹⁶ Ndipo ŵangumtumiya ŵasambizi ŵawo pamoza ndi ŵaHerode, wo ŵanguti, “Msambizi, tiziŵa kuti mwe ŵaneneska, ndipo nthowa yaku Chiuta musambizga mu uneneska, ndipo kuti muphwere ndi yumoza cha, chifukwa kuti mulereska chisku cha ŵanthu cha.

¹⁷ Viyo tineniyeni, Mupima uli? Kumbi kuyamu kupereka msonkhu kwaku Kaisare, pamwenga awa?”

¹⁸ Kweni Yesu, pakuziŵa uheni wawo, wanguti, “Mutindesiyanji, mwaŵakufuvya?

¹⁹ Ndirongoni ndrama ya msonkhu.” Ndipo ŵangumtole tambala.

²⁰ Ndipo Yesu wanguŵafumba, “Vyaku yani chithuzituzi ichi ndi kalembedu yaka?”

²¹ Ŵamnene, “Vyaku Kaisare.” Sono waŵanene, “Wezgani viyo vyaku Kaisare kwaku Kaisare; ndi vyaku Chiuta kwaku Chiuta.”

²² Ndipo ŵati ŵavwa, ŵanguzizwa, ndipo ŵakumleka ŵangutuwako.

Fumbu lapa chiyuka

²³ Pa zuŵa lenilo pe ŵangumziya ŵaSaduki wo ŵatiti, Chiyuka kulive: ndipo ŵangumfumba,

²⁴ kuti, “Msambizgi, Mosese wangukamba, ‘Asani munthu wafwa wambura ŵana, mhurwa wake wahare muwoli wake, mwakuti wamyuskiye mkuwake mbeu.’

²⁵ Kwidu kwenga ŵabali ŵankhonde ndi ŵaŵi; wakudanga, wati wato, wangufwa, ndipo waku ŵavi mwana, wangusiya muwoli wake ku mhurwa wake.

²⁶ Kwakulingana wachiŵi nayo, ndi wachitatu, mpaka ku ŵankhonde ndi ŵaŵi wo.

²⁷ Ndipo pavuli paku wose wangufwa munthukazi nayo.

²⁸ Mu chiyuka viyo wakaŵanga muwoli waku nunju waku wo ŵankhonde ndi ŵaŵi? Chifukwa wose ŵenga nayo.”

²⁹ Kweni Yesu wakwamuka wanguti kwaku wo, “Muranda, pakureka kuziŵa malembo, chingana ndi nthazi yaku Chiuta.

³⁰ Chifukwa mu chiyuka kuti ŵato cha, chingana nkhuti ŵaŵirwa cha, kweni ŵe nge mbangelo kuchanya.

³¹ Kweni kwakulingana ndi chiyuka cha ŵakufwa asi mwaŵerenga chakukambikiya imwe ndi Chiuta,

³² yo watiti, ‘Ine ndine Chiuta waku Abrahamu, Chiuta waku Yisaki, ndi Chiuta waku Yakobe?’ Chiuta kuti nchiuta wa ŵakufwa cha, kweni wa ŵamoyo.”

³³ Ndipo yinguti yavwa mizinda, yo, yingurwita pa chisambizgu chake.

Dangu likuru

³⁴ ŴaFarisi, ŵati ŵavwa kuti waŵachetamiska ŵaSaduki, ŵanguwungana pamoza.

³⁵ Ndipo yumoza waku wo, wamarangu, wakumwesa, wangufumba,

³⁶ “Msambizgi, dangu nili ndikuru mu chilangulu?”

³⁷ Ndipo wangumnene, “Ukamwanjanga Mbuya Chiuta wako ndi mtima wako wose, ndi ndi mzimu wako wose, ndi ndi chinjeru chako chose.

³⁸ Lenili ndi dangu likuru ndi lachimoza.

³⁹ Ndipo lachiŵi, lakukozgana nalo, ndenili, Ukamwanjanga munyako nge ndiwe wamweni.

⁴⁰ Mu marangu gho ghaŵi mupayikika chilangulu chose, ndi ŵamchimi.”

Fumbu lapaku Mesiya

⁴¹ Kweni ŵachiwungana ŵaFarisi wo, Yesu wanguŵafumba,

⁴² wakuti, “Mutitinji ndi Kristu? Ndi mwana waku yani?” Ŵamnene, “Waku Davidi.”

⁴³ Waŵanene, “Na, Davidi pakuzazika ndi Mzimu wamtamula uli Mbuya, wakuti,

⁴⁴ ‘Mbuya wamnene Mbuyangu, Uje ku janja langu la marghe, mpaka po ndiŵika ŵarwani ŵako kusi ku marwayo ghako?’

⁴⁵ “Viyo asani Davidi wamtamula Mbuya, na ndi mwana wake uli?”

⁴⁶ Ndipo pengavi yumoza wanguŵa wanthazi kumwamuka mazu, chingana nkhuti yumoza wangukhwima mtima cha kumfumbapo so kutuwa ku zuŵa liya.