Mateyu 20 - Tonga Bible 1986

Ntharika ya ŵanchitu ŵa munda wa mphereska

¹ “Chifukwa ufumu wa kuchanya ukozgana ndi munthu, mweninyumba, yo wangutuwa pa nyengo ya mlenji kwachilembera ŵanchitu ku munda wake wa mphereska.

² Ndipo wati wapangana nawo kwa tambala yumoza pa zuŵa, wanguŵatuma ku munda wake wamphereska.

³ Ndipo wangutuwa pafupi pa ora lachitatu, wanguwona ŵanyake ŵakuma ŵaka mu luluwa la maronda;

⁴ ndipo kwaku ŵeniwo wanguti, ‘Kaninga namwe so ku munda wo wa mphereska, ndipo cho chingaŵa chakurunjika, ndikupaskeninge.’ Ndipo ŵanguruta.

⁵ Ndipo wachituwa so pafupi pa ora lachinkhonde ndi chimoza ndi pa lachinkhonde ndi chinayi, wanguchita kwakulingana.

⁶ Ndipo wakutuwa pafupi pa ora lachichumi ndi chimoza, wangusaniya ŵanyake ŵakuma ŵaka jo ndipo watiti kwaku wo, ‘Mwamiyanji ŵaka panu msana wose?’

⁷ Wangumunene, ‘Chifukwa paŵavi yumoza yo watilemba.’ Waŵanene, ‘Kaninga mwe so ku mundawo wa mphereska.’

⁸ Kweni ghati ghaŵa mazuro, mwenimunda wangumunene mlinda wake, ‘Dana ŵanchitu, uŵalipire mphotu, kwanda ku ŵakumariya mpaka ku ŵakudanga.’

⁹ Ndipo po ŵanguza wo ŵa pafupi pa ora lachichumi ndi chimoza ŵanguronde munthu yose tambala.

¹⁰ Ndipo ŵachiza ŵakudanga wo ŵangugomezga kuti ŵarondenge kwakuruska. Kweni ŵanguronde nawo so yumoza ndi yumoza tambala.

¹¹ Ndipo ŵati ŵaronde ŵajumiyanga pa mweninyumba,

¹² ŵakuti, ‘Yaŵa ŵakumariya, wo ŵangutakataka ora limoza pe, waŵalinganizga ndi ifwe, taŵakukomwa ndi uzitu wa msana ndi chifundizi chake.’

¹³ Kweni wakwamuka wangunena ndi yumoza waku wo, ‘Bwezi, kuti nditukwanangiya cha: asi ungupangana nane tambala yumoza?

¹⁴ Ujitole cho nchako, rutanga; ndikhumba kupaska ku wakumariya yo nge nkhwaku iwe nawe.

¹⁵ Asi kuyiyamu ine kuchita cho ndikhumba pa vyaku ndamweni? Pamwenga vinu uchita sanji chifukwa nde wamampha ine?’

¹⁶ Viyo ŵakumariya ŵaŵenge ŵakudanga, ndi ŵakudanga ŵakumariya.”

Wakamba so ndi nyifwa yake nyengo ya chitatu

¹⁷ Ndipo wachikwera Yesu ku Yerusalemu, wanguŵatole ŵasambizi chumi ndi ŵaŵi ku ubende, ndipo mu nthowa wanguŵanene,

¹⁸ “Awonani, tikwere ku Yerusalemu; ndipo mwana wa munthu wakomborekenge ku ŵazukuru ŵara ndi ŵalembi; ndipo ŵamweruzgiyenge ku nyifwa,

¹⁹ ndipo ŵamkombolenge ku Mitundu kumtombozga ndi kumukwechuwa ndikumpayika; ndipo pa zuŵa lachitatu wayukenge.”

Fumbo la anyina aku Yakobe ndi Yohane

²⁰ Sono wanguza kwaku iyo nyinawo waŵana ŵaku Zebediya pamoza ndiŵana ŵake, wakumlambiya ndi wakumpemphe kakuti.

²¹ Ndipo wangumfumba, “Ukhumbanji?” Wamnene, “Kambani kuti ŵaje ŵana ŵangu ŵaŵi yaŵa, yumoza ku marghe kwinu ndi munyake ku maze, mu ufumu winu.”

²² Kweni Yesu wakwamuka wanguti, “Kuti muziŵa cha cho mupempha. Kumbi muziŵa kumwa nkhombo yo ine nditenere kumwa?” Wamunene, “Tiziŵa.”

²³ Waŵanene, “Nkhombo yangu mu mwenge, kweni kuja ku marghe kwangu ndi kumaze, kuti nkhwaku ine cha kupaska kweni kwaku wo kwaŵarongosoleke ndi Ada.”

²⁴ Ndipo ŵanguti ŵavwa wo chumi, ŵangutundiya pa ŵabali wo ŵaŵi.

²⁵ Kweni Yesu pakuŵadana wanguti, “Muziŵa kuti ŵakuwusa mitundu ŵayichitiya mtufu, ndipo ŵaraŵara ŵawo ŵaŵatufuliya.

²⁶ Kuti kukaŵanga viyo cha mwaku imwe: kweni yose yo wakhumba kuŵa mura mwaku imwe, waŵenge mteŵeti winu;

²⁷ ndipo yose wakukhumba kuŵa wachimoza mwaku imwe, waŵe muŵanda winu;

²⁸ ulaka ndimo Mwana wa munthu kuti wanguziya kwachiteŵeteke cha, kweni kwachiteŵete ndi kupereka umoyo wake thumba lapa ŵanandi.”

Yesu wachizga ŵachiburumutira ŵaŵi

²⁹ Ndipo ŵachituwa iwo ku Yeriko, kungumrondo mzinda ukuru.

³⁰ Ndipo, ŵachiburumutiya ŵaŵi ŵakuja mumphepete mu nthowa, ŵati ŵavwa kuti Yesu wajumphapo ŵangubongo ŵakuti, “Ambuya, tifwiyeni lisungu, mwaMwana waku Davidi.”

³¹ Kweni mzinda wo unguŵachenya, kuti ŵachetame. Kweni iwo ŵabongonga ukongwako, ŵakuti, “Ambuya, tifwiyeni lisungu, mwaMwana waku Davidi.”

³² Ndipo wanguma Yesu, wanguŵadana, wanguti, “Mukhumba kuti ndikuchitiyeninje?”

³³ Wamunene, “Ambuya, kuti maso ghidu ghajurike.”

³⁴ Ndipo Yesu, wakukoreka lisungu wangukwaska maso ghawo: ndipo sosonukweni ŵangulereska so, ndipo ŵangumrondo.