Mateyu 17 - Tonga Bible 1986

Kusanduka kwaku Yesu

¹ Ndipo pavuli pa mazuŵa ghankhonde ndi limoza Yesu wanguto Petro, Yakobe, ndi Yohane, muhurwa wake, wangukwera nawo mu phiri litali ku ubende.

² Ndipo wangusanduka paurongo pawo, chisku chake chinguwara nge ndi dazi, minjirira yake yinguŵa yituŵa nge mbukweru.

³ Ndipo wonani ŵanguŵawoneke Mosese ndi Eliya, wakurongoro nayo.

⁴ Ndipo Petro, wakwamuka, wanguti kwaku Yesu, “Ambuya, nkhwamampha kwaku ifwe kuŵa panu: asani mukhumba, ndichitenge panu visakara vitatu, kwaku imwe chimoza, kwaku Mosese chimoza, ndi kwaku Eliya chimoza.”

⁵ Wacharongoro iyo, wonani, mtambo wakuŵara unguŵabenekere: ndipo mazu ghakutuwa ku mtambo wo, ghenga ghakuti, “Mwenuyu ndi Mwana wangu, wakwanjiwa, mwaku mweniyo ndikondwere; muvweni iyo.”

⁶ Ndipo ŵanguti ŵavwa ŵasambizi wo ŵanguwa kavunama, ndipo ŵangopa ukongwa.

⁷ Ndipo wanguza Yesu, wanguŵakwaska, wakuti, “Yukani, mungopanga cha.”

⁸ Ndipo ŵachiyinuska maso ŵengavi kuwona yumoza, kweni Yesu pe.

⁹ Ndipo ŵachisika ku phiri lo, Yesu wanguŵachinyiya, “Munganene yumoza cha chachiwona cho, mpaka penipo Mwana wa munthu wayuka ku ŵakufwa.”

¹⁰ Ndipo ŵasambizi ŵake ŵangumfumba, kuti, “Na, chifukwa chine ŵalembi ŵakamba kuti Eliya watenere kuza danga?”

¹¹ Wakwamuka wanguti iyo, “Eliya nadi watuza, ndipo wawerezgengemo vinthu vyose;

¹² kweni ndikuneniyani kuti Eliya wakuza kali, ndipo kuti ŵangumuziŵa cha, kweni ŵangumuchitiya vyose vyo ŵangukhumba. Viyo so Mwana wa munthu nayo wazamukomwa kwaku wo.”

¹³ Sono ŵanguwamo ŵasambizi kuti wanguŵanene vyapaku Yohane Mbatizi yo.

Yesu wachizga muhurwa wakufuntha

¹⁴ Ndipo ŵanguti ŵaza ku mzinda wo, kunguza kwaku iyo munthu wakumlambiya, wakuti,

¹⁵ “Ambuya, mumchitiye lisungu mwana wangu, pakuti wafuntha ndi wakomwa uheni: chifukwa panandi watuwa mu moto, panandi watuwa mu maji.

¹⁶ Ndipo ndingumtole ku ŵasambizi ŵinu, kweni ŵangutondeka kumuchizga.”

¹⁷ Yesu wakwamuka wanguti, “Mgonezi wambura chivwanu ndi wakubende, mpaka zuŵanji nkhaŵanga namwe? Mpaka zuŵanji ndikunthiyengepo namwe? Mtoleni kuno kwaku ine.”

¹⁸ Yesu wangumchenya, ndipo wangutuwamo mwake demone yo: ndipo wanguchizgika mhurwa yo kutuwa ku ora leniliya.

¹⁹ Sono wanguza wasambizi wo kwaku Yesu kuudeke, ŵanguti, “Chifukwa chine ifwe tengavi nthazi kumutuzga?”

²⁰ Iyo wanguŵanene, “Chifukwa cha chivwanu chinu chimana: chifukwa ndikuneneskiyani, asani mwenacho chivwanu nge ndi nje ya kamganje muneniyenge phiri ili, ‘Nyamuka panu kawi kuwa,’ linyamukenge; ndipo kanthu kose kuti katondekenge kwaku imwe cha. [

²¹ Kweni kuromba ndi kufunga pe ndivyo viziŵa kutuzgapo chinthu cha mtundu uwo; palivi kanthu kanyake ko kangaziŵa kutuzgapo.]”

Yesu wakamba so ndi nyifwa yake

²² Ndipo ŵachiwungana iwo mu Galile, Yesu wanguŵanene, “Mwana wa munthu wakaperekekanga mu manja gha ŵanthu,

²³ ŵambayenge ndipo pa zuŵa lachitatu wayuskikenge.” Ndipo ŵanguchita chitima ukongwa.

Yesu wasonkha msonkhu

²⁴ Kweni ŵachiza mu Kapernaumu, ŵanguza kwaku Petro ŵakuronde msonkho, ndipo ŵanguti, “Asi Msambizi winu walipa msonkho wo?”

²⁵ Watiti, “Inya.” Ndipo ŵanguti ŵaza mu nyumba, Yesu wangumdanganizga, wanguti, “Upima uli, Simoni? Wakaronga ŵapanupasi ŵaronde msonkho pamwenga mthulu kwaku yani? Ku ŵana ŵawo, pamwenga ku ŵalendo?”

²⁶ Ndipo penipo wanguti, “Ku ŵalendo,” Yesu wanguti kwaku iyo, “Viyo ipo ŵana mbanangwa!

²⁷ Kweni, vinu tingaŵaguŵiska, rutanga ku nyanja, kaŵeje, ndipo somba yakudanga kubuka to; ndipo utakuti wapambanuwa mlomo wake, usaniyengemo shekelu to lenilo ndi uŵapaske paku ine ndi iwe.”