Mateyu 13 - Tonga Bible 1986

Ntharika ya wakumija mbeu

¹ Pazuŵa lenilo wangutuwa Yesu ku nyumba, ndipo wanguja pasi mumphepete mu nyanja.

² Ndipo kunguwungirana kwaku iyo mizinda yikuru, viyo kuti wangusere iyo mu ngaraŵa, wanguja pasi; ndipo mzinda wose wamanga pa likumba.

³ Ndipo wanguŵakambiya vinandi mu zintharika, wakuti, “Awonani; wakumija wangutuliya kwachimija.

⁴ Ndipo wachimijma zinyake zinguwa mumphepete mu nthowa, ndipo tuyuni tunguza ndi tunguzirgha.

⁵ Zinyake zinguwa pa malo ghajarawi penipo pengavi nyata yinandi: ruŵi zinguŵalika ndipo, chifukwa zinguŵavi mtota wa nyaata;

⁶ lati lakwera dazi zinguŵauka; ndipo chifukwa zengavi nkhorozu, zingumira.

⁷ Zinyake zinguwa mu minga; ndipo minga yo yingubuka, ndi yinguzifinyirizga.

⁸ Kweni zinyake zinguwa pa nyata yamampha, ndipo zingupasa vipasi, zinyake machumi pe chumi, zinyake machumi ghankhonde ndi limoza, ndi zinyake machumi ghatatu.

⁹ Wakuŵa ndi makutu yo, wavwe.”

Uratu wa zintharika

¹⁰ Ndipo ŵanguza ŵasambizi, ŵangunena nayo, “Chifukwa chine murongoro kwaku wo mu zintharika?”

¹¹ Ndipo iyo wakwamuka wanguti kwaku wo, “Kwaku imwe kwapaskika kuziŵa mangari gha ufumu wakuchanya, kweni kwaku ŵa kuti kwapasikika cha.

¹² Chifukwa yose yo wenacho, kwaku iyo kupasikikenge, ndipo waŵenge ndi uzari: kweni yose yo walive, chingana ndi cho wenacho, chikwamphulikenge kwaku iyo.

¹³ Chifukwa chenichi ndirongoro kwaku wo mu zintharika; chifukwa ŵawona kweni kuti ŵawoneseska cha, ŵatuvwa kweni kuti ŵavwisiska cha, chingana nkhuwamo.

¹⁴ Ndipo kwaku iwo ufiskika umchimi waku Yesaya, wakuti, ‘Nadi kuvwa mukavwanga, ndipo kuti muwengemo kose cha. Nadi kulereska mulereskenge, ndipo kuti muthoŵenge kose cha.

¹⁵ Chifukwa watutuŵa mtima wa khamu lenili, ndipo makutu ghawo ghatuvwa chizituzitu, ndi maso ghawo ŵajara; vinu kokuli ŵangathoŵa ndi maso ghawo, ŵangapulikizga ndi makutu ghawo, ndipo ndi mtima wawo ŵangawamo, ndi ŵangang'anamuka ndipo ndingaŵachizga.’

¹⁶ “Kweni ngakutumbikika maso ghinu, pakuti ghalereska; ndi makutu ghinu, pakuti ghapulikizga.

¹⁷ Chifukwa nadidi ndikuneniyani kuti ŵanandi ŵamchimi ndi ŵarunji ŵangunweka kuwona vyo mulereska, ndipo kuti ŵanguviwona cha; ndi kuvwa vyo mulereska, ndipo kuti ŵanguviwona cha; ndi kuvwa vyo mutuvwa, kweni kuti ŵanguvivwa cha.

Yesu wakonkhoma ntharika ya wakumija mbeu

¹⁸ “Viyo vwaninga imwe ntharika yo ya wakumija.

¹⁹ Wachivwa munthu mazu gho gha ufumu, ndipo kuti wawamo cha, watuza mheni yo, ndipo wapoka cho chamijika mu mtima wake. Iya ndiyo yingumijika mumphepete mu nthowa.

²⁰ Ndipo yo yingumijika pa malo ghajarawi; uyu ndi mweniyo watuvwa mazu, ndipo ruŵi ndi chimwemwe watigharonde;

²¹ kweni walive nkhorozu mwaku yija, wakunthiyapo kwa kanyengo; ndipo pakuŵapo suzgu pamwenga fingu pachifwa cha mazu, ruŵi waguŵiskika.

²² Ndipo yo yingumijika mu minga uyu ndi mweniyo watuvwa mazu; ndipo phuruputiro la mgonezi uwu ndi fuvyu la usambasi vifinyirizga mazu, ndipo watuŵa wambura vipasi.

²³ Kweni yo yingumijika pa nyata yamampha, uyu ndi mweniyo ngwakuvwa mazu ndi wakuwamo; mweniyo ndiyu wapasa, ndi wachita, uyu vya machumi pe chumi, uyu vya machumi ghankhonde ndi limoza, uyu vya machumi ghatatu.”

Ntharika ya duru

²⁴ Ntharika yinyake wanguŵakambiya, wakuti, “Ufumu wakuchanya ukozgana ndi munthu wakumija mbeu yamampha mu munda wake;

²⁵ kweni ŵachira ŵanthu, kinguza wamawongu wake ndi wangumija maduru mukati mu trigu, ndipo wanguruta.

²⁶ Kweni penipo mani ghangutunda, ndipo wangupasa, sono ghanguwoneka maduru nagho.

²⁷ Ndipo ŵachiza ŵaŵanda ŵa mweninyumba yo, ŵangunena nayo, ‘Mbuya, asi mungumija mbeu yamampha mu munda winu? Na ghatuliya pani maduru gho we nagho?’

²⁸ Ndipo iyo wanguti kwaku wo, ‘Munthu wamawongu wachita chenichi.’ Ndipo ŵaŵanda wo ŵanguti kwaku iyo, ‘Kumbi asi mukhumba kuti tirute tighawunjike?’

²⁹ Kweni iyo wali, ‘Awa, vinu kokuli muchiwunjika maduru, mungazuliya trigu yo pamoza nagho.

³⁰ Virekeni vyose viŵi vikuliye pamoza mpaka chivuna: ndipo mu nyengo ya kuvuna ndiŵaneniyenge ŵakuvuna, Unjikani danga maduru, ghamangeni nchindanchinda kwachighocha: kweni trigu yo rongani mu nkhokwe yangu.’”

Ntharika ya kamganje

³¹ Ntharika yinyake wanguŵakambiya, wakuti, “Ufumu wakuchanya ngwakukozgana ndi nje ya kamganje, yeniyo munthu wanguto, ndi wangumija mu munda wake:

³² yo nadi njidokudoku ku mbeu zose; kweni yati yakuwa, njikuruku ya tusungwi, ndipo yituwa chivwati, viyo kuti tuyuni twamude tuzenga vivimbu vyawo mu mphanda zake.”

Ntharika ya mtupu

³³ Ntharika yinyake wanguŵakambiya. “Ufumu wakuchanya ngwakukozgana ndi mtupu, weniwo munthukazi wanguto ndi wanguwusazga mu myesu yitatu ya ufwa, mpaka ungutupiskika wose.”

Kakambidu kaku Yesu mu ntharika

³⁴ Vyose ivi wangurongoro Yesu ku mizinda yo mu zintharika; ndipo kwambura ntharika kuti wangurongoro kanthu kwaku wo cha.

³⁵ Alinga kuti lifiskike nenedu lamu mchimi, yo, wakuti, “Ndibanuliyenge mu zintharika mlomo wangu; ndikambenge vyo vikubisika kutuwa kukujarikika kwa charu.”

Yesu wakonkhoska ntharika ya duru

³⁶ Sono wangusiya mizinda yo, ndipo wangusere mu nyumba; ndipo ŵanguza kwake ŵasambizi ŵake, ŵakuti, “Ting'anamuliyeni ntharika yo ya maduru gha mu munda wo.”

³⁷ Ndipo wa munthu;

³⁸ ndipo munda wo ncharu; mbeu yamampha, mbana ŵa ufumu; ndi maduru mbana ŵa mheni yo,

³⁹ wamawongu yo wakughamija ndi diabolo ndipo kuvuna ko nkhamaridu ka mgonezi wo; ndi ŵakuvuna mbangelo.

⁴⁰ Viyo nge ndimo maduru gho ghawunjikikiya ndi kocheka ndi moto; ndimu kuŵiyenge mu kamaridu ka mgonezi wo.

⁴¹ Mwana wa munthu watumenge ŵangelo ŵake, ndipo ku ufumu wake waunjikenge ndi kutuzga vyose vyakuguŵiska ndi wo mbakuchita uchikana marangu,

⁴² ndipo waŵapong'enge mu ng'anjo ya moto: kweniko kuŵenge kuliya ndi kukukuta kwa minyu.

⁴³ Penipo ŵarunji ŵaŵalenge nge ndi dazi mu ufumu wa Auskeu. Wakuŵa ndi makutu yo, wavwe.

Ntharika ya usambasi wakubisika

⁴⁴ “Ufumu wakuchanya ngwakukozgana ndi mbiku yakubisika mu munda; yeniyo, munthu, wati wayibowozga, wajarapo; ndipo ndi chimwemwe chake waruta, wasaska vyose vyo we navyo, ndi wagula munda muwa.

Ntharika ya maperile

⁴⁵ “Panyake, ufumu wakuchanya ukozgana ndi munthu wa maronda, wakupenja mya yakuzirwa:

⁴⁶ ndipo wanguti wasaniya umoza wa mtengu ukuru, wanguruta ndi wangusaska vyose vyo wenga navyo, ndipo wangugula weniwo.

Ntharikaya mukwau

⁴⁷ “Panyake, ufumu wakuchanya ukozgana ndi mukwau wakupong'eka mu nyanja, ndi wakuzinga za mtundu we wose,

⁴⁸ weniwo, penipo unguzazika, ŵanguwukwauliya pa likumba; ndipo ŵachija pasi ŵanguwunjika zamampha mu viyaŵi, kweni ziheni ŵangutaya ku dondo.

⁴⁹ Kwakulingana, ndimu kuŵiyenge pa umari wa mgonezi. Ŵangelo ŵatuwenge, ndipo ŵapatuwengemo ŵaheni mukati mu ŵarunji,

⁵⁰ ndipo ŵaŵapong'enge ku ng'anjo ya moto; kweniko kuŵenge kuliya ndi kukukuta kwa minyu.

⁵¹ “Kumbi mwawamo mwaku vyenivyo vyose?” Atiti kwaku iyo, “Inya.”

⁵² Ndipo wanguti kwaku wo, “Chifukwa chenichi mlembi yose yo wasambizgika vya ufumu wakuchanya ngwakukozgana ndi munthu mweninyumba, yo watuzga mu mbiku yake vifyandi vyakale.”

Yesu wakanika ku Nazarete

⁵³ Ndipo kunguŵa, Yesu wanguti wamara ntharika zo, wangutuwako kweniko.

⁵⁴ Ndipo wati waza mu charu chakwake, waŵasambizganga mu sinagoge lawo, viyo kuti ŵangurwita iwo, ndipo ŵatinge, “Zeru izi ndi nthazi iyi watuliya navyo nunkhu?

⁵⁵ Asi uyu ndi mwana wa muwomba-miti yo? Asi nyina wazumbulika Mariya? Ahurwa ŵake ndi Yakobe, Yosefe, Simone, ndi Yuda?

⁵⁶ Ndipo ŵazichi ŵake asi wose ŵe pamoza nafwe? Na vyose yivi wativito pani?”

⁵⁷ Ndipo ŵanguguŵiskika mwaku iyo. Kweni Yesu wanguti kwaku wo, “Mchimi kuti ngwambura thumbiku cha kosekose, kweni mu charu chakwake, ndi mu nyumba yake.”

⁵⁸ Ndipo kuti wanguchita kweniko vyanthazi vinandi cha, pa chifwa cha uzira chivwanu wawo.