Mateyu 12 - Tonga Bible 1986

Fumbu ndi za Sabata

¹ Pa nyengo yeniyo waporotanga Yesu pa Sabata mu minda ya trigu; ndipo ŵasambizi ŵake ŵanguvwa nja, ndipo ŵangwamba kupontho masoyu, ndi kughargha.

² Ndipo ŵaFarisi ŵachiwona ŵanguti kwaku iyo, “Awonani, ŵasambizi ŵinu ŵachita cho nchambura kuyamu kuchita pa Sabata.”

³ Ndipo iyo wanguti kwaku wo, “Asi mwaŵerenga cho wanguchita Davidi, po wanguvwa nja, ndi wo ŵapamoza nayo;

⁴ mo wanguserere mu nyumba yaku Chiuta, ndi kurgha viŵandi vyakujarikika, vyenivyo kuti kungwenere iyo cha kurgha, chingana mbeniwo ŵenga nayo, kweni ŵazukuru pe ŵija?

⁵ Pamwenga asi mwaŵerenga mu langulu lo kuti pa Sabata ŵazukuru mu kasopi ŵananga Sabata, ndipo mbazirakalema?

⁶ Kweni ndikuneniyani kuti mura wakuruska kasopiyo we panu.

⁷ Kweni asani munguziŵa mo chiriri chenichi, ‘Lisungu ndikhumba, ndi chisopu cha,’ mphanyi kuti mwaŵasuska cha wo mbambura kalema.

⁸ Chifukwa Mwana wa munthu ndi mweni-sabata.”

Yesu wachizga munthu wajanja lakuphapha

⁹ Ndipo wangutuwa kweniko, wangusere mu sinagoge lawo:

¹⁰ ndipo, wonani, mwenga munthu wakuŵa ndi janja lakuphapa. Ndipo ŵangumfumba, “Kumbi kuyamu kuchizga pa zuŵa la Sabata?” alinga kuti ŵamsaniye kafukwa.

¹¹ Iyo wanguŵanene, “Njani mwaku imwe waŵenge ndi mberere yimoza, ndipo asani yingawa mu mbuna pa zuŵa la Sabata, asi wayikonge ndi kuyituzga?

¹² Na uli ukongwako asi munthu waruska mberere! Viyo kutenere kuchita umampha pa Sabata.”

¹³ Sono watiti kwaku yo munthu, “Tambaruwajanja lako.” Ndipo wangulitambaruwa; ndipo linguweremu lanthazi nge ndi linyake.

¹⁴ Kweni ŵafarisi, ŵangutuwamo, ŵangupangirana upu paku iyo, mo ŵamunangiyenge.

Mteŵeti wakusankhika waku Chiuta

¹⁵ Kweni Yesu pakuchiziŵa ichi wangutuwako: ŵangumrondo ŵanandi; ndipo wose wanguŵachizga,

¹⁶ ndipo wanguŵalanguliya kuti ŵareke kumumemeza,

¹⁷ mwakuti ghafiskike mazu mwaku Yesaya mchimi ghakuti,

¹⁸ “Awonani, Mwana wangu, yo ndasankha, nkhwanjiwa wangu mwaku mweniyo mzimu wangu ukondwere: ndiŵikenge paku iyo mzimu wangu, ndipo watauliyenge mitundu cheruzgu.

¹⁹ Kuti walimbalimbenge cha; Chingana nkhukambura; chingana nkhuti yumoza wavwenge mazu ghake mu miseu cha.

²⁰ Dete lakuphwanyika kuti wakafyonga cha, ndipo chisunda chakusunkha kuti wazimwenge cha, npaka po watoriyenge cheruzgu ku upundi.

²¹ Ndipo mu zina lake ndimo mitundu yigomekezgenge.”

Yesu ndi Belzebule

²² Penipo wangutoleke kwaku iyo wademone, wachiburumutiya ndi wambuwu: ndipo wangumchizga, viyo kuti wambuwu yo wangurongoro ndi wangulereska.

²³ Ndipo mzinda yose yarwitanga, ndi yatinge, “Kumbi mwenuyu ndi mwana waku Davidi?”

²⁴ Kweni ŵati ŵavwa ŵaFarisi ŵanguti, “Uyu kuti watuzga ŵademone ndi kanthu kanyake cha kweni ndi Belzebule, fumu ya ŵademone.”

²⁵ Kweni Yesu, pakuziŵa marunguruku ghawo, wanguti kwaku wo, “Ufumu wose wakugaŵikana paku wija upopeskeka; ndipo muzi wose pamwenga nyumba yakugaŵikana paku yija, kuti yingama cha,

²⁶ ndipo asani Satana wamtuzga Satana, wagaukana mwaku yija; na ufumu wake umenge uli?

²⁷ Ndipo asani ine ndituzgiya ŵademone ndi Belzebule, ŵana ŵinu ŵatiŵatuzgiya mwaku yani? Viyo ŵaŵenge yiwo ŵeruzgi ŵinu.

²⁸ Kweni asani ine ndituzgiya ŵademone wo mu Mzimu waku Chiuta, iku waza nadi paku imwe ufumu waku Chiuta.

²⁹ Pamwenga munthu wangaziŵa uli kusere mu nyumba ya wanthazi, ndi kuskoŵa vyuma vyake, kwambura kuti wadanga chamanga munthu wanthazi yo? Penipo ndipo waskoŵenge nyumba yake.

³⁰ Yo kuti we pamoza nane cha, wamikana nane; ndipo yo walive kuwunjika pamoza nane, waparghang'a.

³¹ Viyo ndikuneniyani, kulakwa kose ndi kutuka kungagowokeleka ku ŵanthu, kweni kutuka kwapa Mzimu Wakupaturika kuti kugowokelekenge cha.

³² Ndipo yose yo wanganena mazu ghaheni pa Mwana wa munthu, kugowokelekiyenge iyo; kweni yose yo wangakamba pa Mzimu Wakupaturika yo, kuti kugowokelekiyenge iyo cha, chingana ndi mu umoyo uno, chingana ndi mwaku wo utuza.

Chimuti ndi vipasi vyake

³³ “Kuŵa ndi chipasi chamampha, nkhuŵa ndi chimuti chamampha; pamwenga asani chimuti nchakuwo, chipasi chake chikaŵanga chakuwo; chifukwa chimuti chiziŵikwa ndi chipasi chake.

³⁴ Mphapu za vipiriŵiza, mwa ŵakuŵa ŵaheni mungaziŵa uli kurongoro vyamampha? Chifukwa kutuwa ku ufurwi wa mtima mlomo urongoro.

³⁵ Munthu wamampha kutuliya ku mbiku yake yamampha watuzga vyamampha: ndipo munthu muheni kutuliya ku mbiku yake yiheni watuzga viheni.

³⁶ Kweni ndikuneniyani, kuti pa mazu ghose ghawaka gho wangakamba ŵanthu, ŵazamukughakamba mu zuŵa la cheruzgu.

³⁷ Chifukwa ndi mazu ghako urunjiskikenge, ndipo ndi mazu ghako ususkikenge.”

Ŵapenja chisimikizgu

³⁸ Penipo ŵangwamuka ŵanyake ŵa ŵalembi ndi ŵaFarisi, ŵakuti, “Msambizgi, tikhumba kuwona chisimikizgu kwako.”

³⁹ Kweni wakwamuka wanguti kwaku wo, “Mgonezi uheni ndi ureŵi upenja chisimikizgu; ndipo kuti chisimikizgu chipaskikenge kwaku wo cha, kweni cho chaku Yona mchimi yo.

⁴⁰ Chifukwa uli ndimo Yona wanguŵiya mumoyu mwa chisomba cho mazuŵa ghatatu ndi mausiku ghatatu; viyo so ndimu Mwana wa munthu waŵiyenge mukati mu charu mazuŵa ghatatu ndi mausiku ghatatu.

⁴¹ Ŵanthu ŵaku Nineve ŵayukenge mu cheruzgu pamoza ndi mgonezi uwu, ndipo ŵawususkenge: pakuti ŵangung'anamuka pa chitaula chaku Yona; ndipo awonani, wakuruska Yona we panu.

⁴² Fumukazi yaku Maraŵi yiyukenge mu cheruzgu pamoza ndi mgonezi uwu, ndipo yiususkenge; pakuti yingutuwa ku vigoti vya charu kuvwa zeru yaku Solomone; ndipo ehe, wakuruska Solomone we panu.

Kuwe kwa mzimu wauyu

⁴³ “Kweni penipo mzimu wawiyu watuwa mu munthu, uporota mu malo ghambura maji, wakupenja chipumulu, ndipo kuti utichisaniya cha.

⁴⁴ Sono utiti, ‘Ndiwerenge mu nyumba yangu, mo ndingutuwa’; ndipo uchiza utiyisaniya yamwazi, yakupeyeka ndi yakutozgeka.

⁴⁵ Sono uruta ndi utole pamoza nawo mizimu yinkhonde ndi yiŵi yinyake yiheni ku kwakuruska iwo, ndipo yiseremo yijaririya mwenimo: ndipo vyaumari vya munthu yuwa vituŵa viheniku ku vyakudanga vyo. Viyo ndimu so kuŵiyenge ku mgonezi uheni uwu.”

Anyina ndi ŵabali ŵaku Yesu

⁴⁶ Wacharongoro iyo ku mizinda yo, anyina ndi ŵabali ŵake ŵanguma kubwaro ŵakupenja kurongoro nayo.

⁴⁷ Ndipo yumoza wa ŵanthu wangumunene, “Awona! Anyoko ndi ŵabali ŵako ŵama kubwaro, ŵakhumba kurongoro nawe.”

⁴⁸ Kweni iyo wakwamuka wanguti ku wakumunene, “Mbayani ama? Ndipo mbayani ŵabali ŵangu?”

⁴⁹ Ndipo wati watambaruliya janja lake kuchiri ku ŵasambizi ŵake, wanguti, “Onani, ama wo ndi ŵabali wo.

⁵⁰ Chifukwa yose yo wachita khumbo la Ada ŵakuchanya mweniyo ndi mbali wangu, ndi mzichi ndi ama.”