Marko 9 - Tonga Bible 1986

¹ Ndipo wanguti kwaku wo, “Nadidi ndikuneniyani, Alipo ŵanyake ŵaku wo ŵatuma panu wo kuti ŵakesanga nyifwa cha, mpaka po ŵawona ufumu waku Chiuta uchiza ndi nthazi.”

Kusanduka kwaku Yesu

² Ndipo pavuli pa mazuŵa ghankhonde ndi limoza Yesu wangupatuwapo Petro, Yakobe ndi Yohane, ndipo wanguŵatole paku ŵija mu ghiri litali; ndipo wangusanduka paurongo pawo.

³ Ndipo minjirira yake yaŵanga yakung'anima, yakutowa ukongwa; uli ndimo mtozgi-saru panupasi kuti wangaziŵa kuyitozga viyo cha.

⁴ Ndipo kunguŵawoneke Eliya pamoza ndi Mosese; ndipo ŵarongoronga ndi Yesu.

⁵ Ndipo pakwamuka Petro watiti kwaku Yesu, “Rabi, nkhwamampha kuŵa panu ifwe: tiyeni tichite mahema ghatatu, kwaku imwe limoza, kwaku Mosese limoza, ndi kwaku Eliya limoza.”

⁶ Chifukwa kuti waziŵanga cha cho wangamuka; pakuti wenga wamantha ukongwa.

⁷ Ndipo mtambo unguŵavimba: ndipo lingutuwa mu mtambo liyowozi, “Mwenuyu ndi Mwana wangu wakwanjiwa: muvweni iyo.”

⁸ Ndipo kwamabuchibuchi ŵachilereska kwakuzunguliya, kuti ŵanguwona so munyake cha, kweni Yesu pe pamoza ndi iwo ŵija.

⁹ Ndipo wachisika ku phiri lo, wanguŵalanguliya kuti ŵangachineniyapo yumoza cha paku vyo ŵanguwona, mpaka penipo Mwana wa munthu wayuka ku ŵakufwa.

¹⁰ Viyo ŵangughasunga gho mazu, kweni ŵakufumbana mwaku ŵija, “Nkhune kuyuka ko ku ŵakufwa?”

¹¹ Ndipo ŵamfumbanga, ŵakuti, “Chifukwa chine ŵalembi ŵatiti Eliya watenere kuza danga?”

¹² Wakwamuka wanguŵanene, “Eliya wadangenge nadi kuza, mwakuti wanozge vinthu vyose; kweni na uli po kwalembeka ghapa Mwana wa munthu, kuti wavwiyepo vinandi, ndikuyuyulika?

¹³ Kweni ndikuneniyani, kuti Eliya nayo waza, ndipo wamuchitiya chose cho wangukhumba, uli ndimo kwalembeke paku iyo.”

Yesu wachizga muhurwa wakufuntha

¹⁴ Ndipo ŵati ŵaza ku ŵasambizi ŵanguwona mzinda ukuru kuzunguliya iwo, ndi ŵalembi ŵakufumbana nawo.

¹⁵ Ndipo sosonukweni mzinda wose wo pakumuwona ungurwita ukongwa, ndipo ŵangumuchimbiriya ndi kumutauzga.

¹⁶ Ndipo wanguŵafumba, “Mufumbananji nawo?”

¹⁷ Ndipo yumoza waku mzinda wo wangwamuka, “Msambizgi, ndingutole kwinu mwana wangu uyu wakuŵa ndi demone wambuwu;

¹⁸ ndipo kose kweniko wamtole, utumtesuwa: ndipo wamokoka phovu ndi kukukuta minyu, ndipo ngwakonda: ndipo ndingufumba ŵasambizi ŵinu kuti ŵamtuzge; kweni kuti ŵenga ŵanthazi cha.”

¹⁹ Ndipo wakuŵamuka wanguti, “A mphapu yambura chivwanu, mpaka zuŵanji nkhajanga namwe? Mpaka zuŵanji nkhakunthiyangapo namwe? Mtoleni kwaku ine.”

²⁰ Ndipo ŵangumtole kwaku iyo: ndipo wachimuwona, demone yo sosonukweni wangumparuwa ukongwa; wanguwa pasi, wakukunkhuruka ndi wakumokoka phovu.

²¹ Ndipo wangufumba awiske, “Kutuwa zuŵanji waŵa ndi nthenda iyi?” Wanguti iyo, “Kutuwa ku wana.

²² Ndipo panandi wampong'a ku moto ndi mu maji, kuti wabayike: kweni asani muziŵa kuchita kanthu, mutifwiye lisungu, tovyeni.”

²³ Ndipo Yesu wangumnene, “Asani iwe uziŵa! Vyose vyamachitika ku wakuvwana.”

²⁴ Sosonukweni wiske wa mwana yo, wakubongo wanguti, “Ndivwana; wovyani uwura chivwanu wangu.”

²⁵ Ndipo Yesu wachiwona kuti mzinda uchimbiriya pamoza, wanguchenya mzimu wo wawiyu, wakunena nawo, “Mzimu wambura kurongoro ndi wamgota we, ndikulanguliya, tuwamo mwake, ungaserengamo so cha.”

²⁶ Viyo wabongo ndi kumuparuwa ukongwa, ungutuwa: ndipo mwana yo wanguwa nge ngwakufwa; mwakuti ŵanandi ŵatinge, “Wafwa.”

²⁷ Kweni Yesu wanguriko janja, wangumsoska, ndipo wanguyuka.

²⁸ Ndipo wati wafikamu nyumba ŵasambizi ŵake ŵangumfumba pa ubende, “Chifukwa chine ifwe tatodeka kuwutuzga?”

²⁹ Ndipo wanguŵanene, “Mtundu uwu kuti uziŵa kutuwa ndi kanthu kanyake cha, kweni ndi kuromba pe.”

Yesu wakamba so ndi nyifwa yake

³⁰ Wangutuwa kweniko, ŵanguporota mu Galile; ndipo kuti wakhumbanga cha kuti yumoza waziŵe.

³¹ Chifukwa wasambizganga ŵasambizi ŵake, kuŵanene, “Kuti Mwana wa munthu waperekekenge mu manja gha ŵanthu, ndipo ŵambayenge; ndipo wati wabayika, pavuli pa mazuŵa ghatatu wakayukanga.”

³² Kweni iwo kuti ŵanguwamo kakambidu ko cha, ndipo wopanga kumfumba.

Mura ndiyani?

³³ Wanguza ku Kapernaumu: ndipo pakuŵa mu nyumba wanguŵafumba, “Mwasuskanananganji mu nthowa?”

³⁴ Kweni ŵanguchetama iwo: chifukwa munthowa ŵasuskananga kuti mura ndi yani.

³⁵ Ndipo wachija pasi, wangudana chumi ndi ŵaŵi, watiti kwaku wo, “Asani yumoza wakhumba kuŵa wachimoza, waŵe wakumariya limu waku wose, ndi mteŵeti waku wose.”

³⁶ Ndipo wanguto kana, wangukamika mukati mwawo; ndipo pakukapakata wanguŵanene,

³⁷ “Yose yo wangaronde kamoza ka twana twaviyo mu zina langu, waronde ine; yo wangaronde ine, kuti waronde ine cha, kweni wakundituma yo.”

We yose yo kuti wamikana nafwe cha we kwaku ifwe

³⁸ Yohane wanguti kwaku iyo, “Msambizgi, tinguwona yumoza kutuzgiya ŵademone mu zina linu; ndipo tingumkanizga, chifukwa kuti warondonga ifwe cha.”

³⁹ Yesu wangunena, “Mungamkanizganga cha: chifukwa palive munthu yo wachitiya vyanthazi mu zina langu, pavuli waziŵenge so ruŵi kurongorole uheni paku ine.

⁴⁰ Chifukwa yose yo kuti wamikana nafwe cha, we kuchiri kwaku ifwe.

⁴¹ Chifukwa yose yo wangamweska imwe nkhombo ya maji mu zina lakuti mwe ŵaku Kristu, ndikuneneskiyani kuti watayenge mphotu yake cha.

Kweseka ku kwananga

⁴² “Ndipo yose yo wangaguŵiska kamoza ka tumana to twakuvwana mwaku ine, mphanyi nkwamampha kwaku iyo kuti chimphe chimangike mu khose lake, ndi wapong'eke mu nyanja.

⁴³ Ndipo asani janja lako lingakuguŵiska, lidumuweko; nkhwamampha kusere iwe wakupunduka mu umoyo, kwakuruska wakuŵa nagho manja ghaŵi; kuruta ku Gehena ku moto wo wambura mazimwika. [

⁴⁴ Kweni fusi yawo kuti yitufwa cha, ndi moto kuti uzimwa cha.]

⁴⁵ Ndipo asani rundi lako lingakuguŵiska, lidumuweko; nkhwamampha kusere iwe wakuganthiya mu umoyo, kwakuruska wakuŵa ndi marundi ghaŵi, kupong'eka mu Gehena. [

⁴⁶ Kweniko fusi yawo kuti yitufwa cha, ndi moto kuti uzimwa cha.]

⁴⁷ Ndipo asani jiso lako lingakuguŵiska likorowo; nkhwamampha kusere iwe wa jiso limoza mu ufumu waku Chiuta, kwakuruska, kuŵa ndi maso ghaŵi, kupong'eka mu Gehena;

⁴⁸ kweniko fusi yawo kuti yitufwa cha, ndi moto kuti uzimwa cha.

⁴⁹ Chifukwa yose wakacherekekanga ndi moto.

⁵⁰ Mche ngwamampha: kweni asani mche wo wasukuruka, muwunoweskenge ndi chine? Muŵe ndi mche mwaku mwaŵeni, ndipo mujariyane mu chimangu.”