Marko 7 - Tonga Bible 1986

Kusambizga mudauku wa ŵamwaka

¹ Ŵanguza kwaku iyo ŵaFarisi, ndiŵanyake ŵa ŵalembi, wo ŵangutuwa ku Yerusalemu,

² ndipo ŵanguwona kuti ŵanyake ŵa ŵasambizi ŵake ŵarghanga viŵande ndi manja ghamwikhu, uku nkhuti, ghambura kusamba.

³ Chifukwa ŵaFarisi ndi wose ŵaYuda, kwambura kuti ŵasamba manja, kuti ŵaturgha cha, pakukoreze mdauku wa ŵara;

⁴ ndipo pakuwe ku vyamaronda, kwambura kuti asamba, kuti ŵaturgha cha; ndipo vinyake vinandi viripo vyenivyo ŵaronde kukoreze, masukidu gha vyandi ndi viŵiya ndi viyaŵi vya mkuŵa.

⁵ Ndipo ŵangumfumba ŵaFarisi ndi ŵalembi, “Chifukwa chine ŵasambizi ŵako ŵareka kuvwiya mdauku wa ŵara, kweni ndi manja ghamwikhu ŵaturgha chiŵande?”

⁶ Ndipo wanguŵanene, “Yesaya wanguloske umampha ndi imwe mwafuzi, uli ndi mo kwalembeke, ‘Khamu lenili litindirumba ndi milomo yawo, kweni mtima wawo we kutari ndi ine.

⁷ Ŵatindisopa kwa waka, pakusambizga uli ndi visambizgu marangu gha ŵanthu.’

⁸ Mwaŵakureka dangu laku Chiuta, Mukoreze ukongwa mdauku wa ŵanthu.”

⁹ Ndipo wanguŵanene, “Mutijikaniya mbwenu dangu laku Chiuta, mwakuti musunge mdauku winu.

¹⁰ Chifukwa Mosese wanguti, ‘Tumbika ausu ndi anyoko’; ndipo, ‘Wakukambiya uheni awiske ndi anyina, wafwe nyifwa’;

¹¹ kweni imwe munena, ‘Asani munthu waneniyenge wiske pamwenga nyina, ndi Korbane’ (nkhuti, mpasku), chose cho ungovyeka nane;

¹² kuti mumzomerezga so cha kuŵachitiya kanthu awiske pamwenga anyina;

¹³ ndipo mupenevya mazu ghaku Chiuta ndi mdauku winu, wo mwapereka; ndipo muchita vinandi vyakulingana ndi vyaviyo.”

Vyo vinanga munthu

¹⁴ Ndipo wangudana so mzinda wo, wanguti, “Ndivwiyeni mose ndi wanimo:

¹⁵ kulive kanthu kubwaro ku munthu, ko nkhanthazi kumkazuzga, kachisere mumoyo mwake; kweni vyakutuliya mukati mwake ndivyo vikazuzga munthu. [

¹⁶ Viyo legherezgani asani mwe ndi makutu ghakuvwiya!]”

¹⁷ Ndipo wati wasere mu nyumba kutuwa ku mzinda wo, ŵasambizi ŵake ŵangumfumba vyapa ntharika yo.

¹⁸ Ndipo watiti kwaku wo, “Kumbi namwe so mwe ŵambura kuwamo? Asi muteska kuti chose chakubwaro chakusere mu munthu chirive nthazi kumkazuzga;

¹⁹ pakuti kuti chisere mu mtima wake cha, kweni mu chifu chake, ndipo chituliya ku zenji?” Viyo wangutozga vyakurgha vyose.

²⁰ Ndipo wanguti, “Cho chituwa mu munthu ndicho chikazuzga munthu.

²¹ Chifukwa kutuwa mukati, mu mtima wa munthu, ghatuwa marunguruku ghaheni, mauyaya, maunkhungu, zimbanda, maureŵi,

²² viŵinu, mauheni, fuvyu, ulakalaka, jiso liheni, mautusi, jani, uzereza,

²³ viheni vyose ivi, vituwa mukati, ndipo vikazuzga munthu.”

Chigomezgu cha munthukazi yo mwana wake wenga ndi mzimu wauyu

²⁴ Ndipo wati wasoka pa wangurutiriya mu mphaka zaku Turo ndi Sidoni. Ndipo wachisere mu nyumba kuti wakhumbanga yumoza kuziŵa cha; ndipo kuti wanguziŵa kubisika cha.

²⁵ Kweni sosonukweni, wati wavwa ndi iyo, munthukazi mweniyo mwana wake msungwana wenga ndi mzimu wawiyu, wanguza ndi wanguwa pa marundi ghake.

²⁶ Munthukazi yo wenga muGriki, muSurofonike mtundu wake. Ndipo wamuŵeyerenga kuti watuzge demone mu mwana munthukazi wake.

²⁷ Yesu wanguti kwaku iyo, “Wadange ŵanakugutiskika: chifukwa kuti kuyamucha kuto chiŵande cha ŵana kupong'e twagaru.”

²⁸ Kweni munthukazi wanguti, “Nadi, Ambuya: twagaru natu pasi pa gome turghapo marivuvu gha ŵana.”

²⁹ Yesu wangumnene, “Chifukwa cha mazu yagha ruta, demone watuwamo mu mwana-msungwana wako.”

³⁰ Ndipo wanguruta ku nyumba yake, wangusaniya mwana yo wara pa chita, kweni demone watuwamo.

Yesu wachizga wamgota-wachimama

³¹ Wangutuwa so ku mphaka zaku Turo, wanguporota mu Sidoni kuza ku nyanja ya Galile, mukati mu mphaka za Dekapoli.

³² Ndipo ŵangumtole wamgota wachimama, ŵangumuŵeyere kuti waŵikepo pake janja lake.

³³ Ndipo pakumto payija ku ubende wanguŵika minwiyake mu makutu ghake, ndipo pakufunyamata wangukwaska lilime lake,

³⁴ ndipo, wati walereska kuchanya, wangusiska mtima, ndipo wanguti kwaku iyo, “Efata, ko nkhuti, Banuka.”

³⁵ Makutu ghake ghangubanuka, lidada la lilime lake lingufwatulika, ndipo wangurongoro kaunthu.

³⁶ Ndipo wanguŵachinyiya kuti ŵangachinene munthu cha: kweni mo mose wanguŵachinyiya iyo, iwo ŵakondeskanga ukongwa kwakuruska.

³⁷ Ndipo ŵazizwanga ukongwa limu ŵatinge, “Vyose wachita urusu; ŵamgota wati ŵasanduska ŵakuvwa, ndipo ŵambuwu ŵarongoro.”