Marko 6 - Tonga Bible 1986

Yesu wakanika ku Nazarete

¹ Ndipo wangutuwa kweniko; wanguza ku charu cha kwake; ndipo ŵasambizi ŵake ŵangumrondo.

² Pa Sabata, wangwamba kusambizga mu sinagoge; ndipo ŵanandi ŵakumuvwa ŵazizwanga, “Wativito nunkhu vyenivi? Ndi zeru uli yo yapaskika kwaku iyo? Ndi vine vyanthazi vyo vyachitika ndi manja ghake!

³ Asi uyu ndi muwomba-miti, mwana waku Mariya, mku waku Yakobe ndi Yose ndi Yuda ndi Simoni? Ndipo asi ŵazichi ŵake ŵe panu pamoza nafwe?” Ndipo ŵaguŵiskikanga mwaku iyo.

⁴ Ndipo Yesu wanenanga nawo, “Mchimi kuti ngwambura thumbiku cha, kweni mu charu chakwake, mu ŵabali ŵake, ndi mu nyumba yake.”

⁵ Ndipo kuti wanguziŵa kuchita nchitu zanthazi cha, kweni wanguŵika manja ghake pa ŵarwali ŵamanavi, wanguŵachizga.

⁶ Ndipo ŵanguzizwa chifukwa cha uwura chivwanu wawo.

Yesu watuma ŵasambizgi ŵake chumi ndi ŵaŵi (12)

⁷ Ndipo wazunguliyanga mu mizi yo kusambizga. Ndipo wangudana chumi ndi ŵaŵi wo, wangwamba kuŵatuma ŵaŵi-ŵaŵi; ndipo wanguŵapaska mtufu wapa mizimu yauyu.

⁸ Wanguŵalanguliya kuti ŵangapinganga kanthu kapa nthowa cha, kweni ndodu pe, chaukurgha cha, katiri cha, ndrama cha mu likwamba;

⁹ kweni kuvwara viyatu; mungavwaranga minjirira yiŵi cha.

¹⁰ Ndipo wangunena nawo, “Kose kweniko mungasere mu nyumba tandarani kweniko mpaka kutuweko.

¹¹ Ndipo ku malo kose ko ŵareka kukurondeni, chingana nkhukuvwani, muchituwa kweniko, kung'unthani fuvu la kusi ku marwayo ghinu, nge nchisimisimi kwaku wo.”

¹² Ndipo ŵangutuwa, ŵangumemeza kuti ŵanthu ŵang'anamuke.

¹³ Ndipo ŵatuzganga ŵademone ŵanandi, ndi kutukutizga ŵarwali ŵanandi ndi mafuta, ŵaŵachizganga.

Nyifwa yaku Yohane Mbatizi

¹⁴ Herode karonga wanguvwa vyenivyo; chifukwa zina lake linguŵa lakuvwika. Ŵanyake ŵanguti, “Yohane Mbatizi yo wayuka ku ŵakufwa, ndipo chifukwa chenicho vyanthazi vyo vitataliya mwake.”

¹⁵ Ŵanyake ŵanguti, “Ndi Eliya.” Ndipo ŵanyake ŵanguti, “Ndi mchimi, nge njumoza wa ŵamchimi,”

¹⁶ kweni wachivwa Herode, wanguti, “Mwenuyu ndi Yohane yo ndingumdumuwa mutu; wayuka ku ŵakufwa.”

¹⁷ Chifukwa Herode iyo wangutuma ndi kumko Yohane, ndipo wangumuŵika mu ulinda, pa chifwa chaku Herodiya, muwoli waku Filipu mkuwake; akuti wangamto.

¹⁸ Chifukwa Yohane wanguti kwaku Herode, “Kuti kutenere iwe cha kuŵa ndi muwoli wa mku wako.”

¹⁹ Ndipo Herodiya wangumfinga wakhumbanga kumbaya; kweni wengavi nthazi;

²⁰ chifukwa Herode wamopanga Yohane, pakumziŵa kuti wenga munthu murunji ndi wakupaturika, wamsungirizganga waka. Ndipo wachimuvwa wazizikikanga ukongwa; kweni wamuvwanga kwakukondwere.

²¹ Ndipo pakuŵapo zuŵa lakwenere, Herode pa zuŵa la kawi wanguchitiya dghera ŵara ŵake ndi nduna zake ndi ŵarongozgi ŵa ŵaGalile.

²² Ndipo wati waseremo mwana munthukazi waku Herodiya ndi kuvina, wangukondweska Herode ndi wo ŵajanga nayo pa kurgha; ndipo karonga yo wangumnene-msungwana, “Undipemphe chose cho ungakhumba, ndipo ndikupaskenge.”

²³ Ndipo wangumrapiya, kuti, “Chose cho ungandipempha ndikupaskenge, chingana chingaŵa chigaŵa chapaŵi cha ufumu wangu.”

²⁴ Ndipo wangutuwa ndi kunena ndi anyina, “Ndikapemphe chine?” Anyina ŵangunena nayo, “Mutu waku Yohane Mbatizi.”

²⁵ Ndipo wangusere kwakutinthimika ku karonga, wangumpempha wakuti, “Ndikhumba kuti mundipaske ruŵi pa mbale iyi mutu waku Yohane Mbatizi.”

²⁶ Ndipo karonga wanguŵa wachitima ukongwa, kweni chifukwa cha marapu gho, ndi chifukwa cha ŵakuja pa kurgha, kuti wangukhumba kumkaniya cha.

²⁷ Ndipo sosonukweni karonga yo wangutumizga wankhondomlinda, ndi wangumlanguliya kuto mutu wake: ndipo wanguruta, ndi wangumdumuwa mutu mu ulinda mo,

²⁸ ndipo wanguto mutu wake pa mbale, ndi wanguwupaska ku msungwana yo; ndipo msungwana wanguwupaska ku nyina.

²⁹ Ndipo ŵati ŵavwa ŵasambizi ŵake ŵanguza, ŵanguto thupi lake, ndipo ŵanguliŵika mu muunda.

Yesu waliska ŵanthu vikwi vinkhonde (5,000)

³⁰ Ndipo ŵakutumika wo ŵanguwungana kwaku Yesu; ŵangumtauliya vyose vyo ŵanguchita ndi ŵangusambizga.

³¹ Ndipo watiti kwaku wo, “Muzenge imwe mwija ku udeke ku malo ghabozwa, ndipo mujipumuzge kamanavi.” Chifukwa ŵanandi ŵazanga ndi kuruta, ndipo ŵengavi nyengo chingana njakurghiya.

³² Ndipo ŵanguruta mu ngaraŵa ku malo ghabozwa ku ubende.

³³ Ndipo ŵanthu ŵanguŵawona ŵachiruta, ndipo ŵanandi ŵanguŵaziŵa, ndipo ŵanguchimbiya pasi kuruta kweniko kutuwa ku mizi yose, ndipo ŵanguŵarutiriya.

³⁴ Ndipo wachituwa Yesu wanguwona mzinda ukuru, mwakuti wanguŵafwiya lisungu, pakuti ŵenga uli ndi mberere zakuwura mliska: Ndipo wangwamba kuŵasambizga vinandi.

³⁵ Ndipo lati lateghama dazi ŵasambizi ŵake ŵanguti, “Malo ghano ndi bozwa, ndipo dazi laruta;

³⁶ ŵawezgeni, kuti ŵarutenge ku minda ndi mizi yakuzunguliya, ŵakajiguliye vyakurgha.”

³⁷ Kweni wakwamuka wanguŵanene, “Wapaskeni imwe vyakurgha.” Ndipo watiti kwaku iyo, “Kumbi tirutenge kwachigula viŵande vya matambala machumi pe chumi ghaŵi, kuti tiŵapaske ŵarghe?”

³⁸ Kweni iyo wanena nawo, “Mwe navyo viŵande viringa? Kaninga, mukaone.” Ndipo ŵati waziŵa ŵatiti, “Vinkhonde ndi somba ziŵi.”

³⁹ Wanguŵalanguliya kuteka pasi, mabungwi mabungwi, pa uteka uŵisi.

⁴⁰ Ndipo ŵanguja pasi mizere-mizere, mu machumi pe chumi ndi mu machumi ghankhonde.

⁴¹ Ndipo wati wato viŵande vinkhonde vyo ndi somba zo ziŵi, wangulereska kuchanya, wangutumbika, ndipo wangumenya viŵande vyo; wangupaska ku ŵasambizi kuti waŵajarikiye; ndi somba ziŵi zo wangugaŵiya wose.

⁴² Wose ŵangurgha, ndiŵanguguta.

⁴³ Ndipo ŵanguyora marivuvu ghakuzaza sokora chumi ndi ziŵi, ndi so gha somba.

⁴⁴ Ndipo ŵakurgha viŵande vyo ŵenga akhumba ŵanthurumi vikwi vinkhonde.

Yesu watenda pa maji pa nyanja

⁴⁵ Ndipo sosonukweni wanguŵachiska ŵasambizi ŵake kusere mu ngaraŵa, ndi kumdanjiriya kusirgha ku Betesaida, iyo wachiwezga mzinda wo.

⁴⁶ Ndipo pakuŵarayira, wanguruta ku phiri kwachiromba.

⁴⁷ Ndipo ghati ghaŵa mazuro, ngaraŵa yenga mukati mu nyanja, ndi mweneko wenga yija pa mtunda.

⁴⁸ Ndipo wachiŵawona ŵakusuzgika mu kuvuŵa, chifukwa mphepu yenga ku musu pafupi pa lindu lachinayi la usiku watuza kwaku wo, wakwenda pa nyanja; ndipo wakhumbanga kuŵarutiriya,

⁴⁹ kweni iwo ŵachimuwona wakwenda pa nyanja ŵangurunguruka kuti ndi muzguka, ndipo ŵangukambura;

⁵⁰ chifukwa wose ŵangumuwona, ndipo ŵangumbwambwanthiya. Kweni wangurongoro nawo, wanguti, “Chinthani mtima; ndine; mungopanga.”

⁵¹ Ndipo wangukwera mu ngaraŵa ndi yingureka mphepu, ndipo ŵangurwita ukongwa mwaku ŵija:

⁵² chifukwa kuti ŵanguwamo cha ghapa viŵande vyo, mtima wawo ungunonopeskeka.

Yesu wachizga ŵakutama mu Genesarete

⁵³ Ndipo ŵati ŵalowoka, ŵanguza ku charu chaku Genesarete, ndipo ŵangukwezga pa likumba.

⁵⁴ Ndipo ŵachituwa iwo mu ngaraŵa yo, ruŵi ŵanthu ŵangumziŵa,

⁵⁵ ndipo ŵachimbiyanga kwakuzunguliya charu chiya chose, ndipo ŵangwamba kunyamulika ŵarwali pa vita kweniko ŵanguvwa kuti ndiku wenga.

⁵⁶ Ndipo kweniko kose wangusere mu muzi, pamwenga mu misumba, pamwenga mu minda, ŵajarikanga ŵakutama mu maluluwa gha maronda, ndipo wangumuŵeyere kuti ŵakwaske chingana ndi mphonji pe za munjirira wake: ndipo so wose ŵazikwaskanga, ŵachizgikanga.