Marko 3 - Tonga Bible 1986

Yesu wachizga munthu wajanja lakuphapha

¹ Ndipo wangusere mu sinagoge lo, ndipo mwenimuwa mwenga munthu wa janja lakuphapa.

² Ndipo ŵamukhazganga, vinu wamuchizgenge pa Sabata, alinga kuti wamusaniye kafukwa.

³ Ndipo watiti ku munthu wakuŵa ndi janja lakuphapa yo, “Yiza kuno.”

⁴ Ndipo wanguŵafumba, “Kumbi kuyamu pa Sabata kuchita umampha, pamwenga kuchita uheni? Kutaska uzima, pamwenga kubaya?” Kweni iwo ŵanguja chete.

⁵ Ndipo wakuŵalereska kwakuzunguliya ndi chikwiya, wangukwininika pa unononu wa mitima yawo, ndipo watiti ku munthu yo, “Tambasuwa janja lako lo.” Ndipo wachatambasuwa, janja lake linguweremo.

⁶ Ndipo wachituwamo ŵaFarisi, sosonukweni pamoza ndi ŵaHerode ŵachitanga upu paku iyo, mo ŵangamunangiya.

Mzinda pa likumba la nyanja

⁷ Yesu pamoza ndi ŵasambizi ŵake ŵanguwere ku nyanja; ndipo ungumrondo urapasi ukuru wa ŵanthu kutuwa ku Galile: ku Yuda,

⁸ ku Yerusalemu, ku Idumeya, ndi kusirgha ku Yordane, mpaka ku Turo ndi Sidoni, urapasi ukuru, pakuvwa vyo vyose wachitanga, ŵanguza kwaku iyo.

⁹ Ndipo wanguŵanene ŵasambizi ŵake kuti kangaraŵa kamulinde, pa chifwa cha mzinda wo, kuti vinu ŵangamufinyikizga.

¹⁰ Chifukwa wanguŵachizga ŵanandi, viyo kuti ŵangumumotoke wose ŵakuŵa ndi zinthenda mwakuti ŵamukwaske.

¹¹ Ndipo wose ŵakuŵa ndi mizimu yawiyu, ŵachimuwona, ŵaŵanga paurongo pake, ndipo ŵabongonga kuti, “Iwe ndiwe Mwana waku Chiuta.”

¹² Ndipo wangwalanguliya ukongwa kuti ŵangamuwandiskanga cha.

Yesu wasankha ŵasambizi chumi ndi ŵaŵi (12)

¹³ Ndipo ŵangukwera mu phiri lo, ndipo wangudana ŵeniwo wakhumbanga iyo: ndipo ŵanguza kwaku iyo.

¹⁴ Ndipo wangumika chumi ndi ŵaŵi, alinga kuti ŵaŵenge pamoza nayo, ndi kuti waŵatumenge kwachitaula,

¹⁵ ndi kuŵa ndi mtufu kwachituzga ŵademone.

¹⁶ Simoni yo wangudana Petro;

¹⁷ Yakobe mwana waku Zebediya, ndi Yohane mhurwa waku Yakobe; ndipo wanguŵapaska zina Boanergesi, ndiku kuti, ŵana ŵa chidiririzi,

¹⁸ Andreya, ndi Filipu, Bartolomeyu, ndi Mateyu, Tomase, ndi Yakobe, mwana waku Alifeyu, ndi Simoni mKanane,

¹⁹ ndi Yuda mkeriote, mweniyo nayo wangumpachiya.

Yesu ndi Belzebule

²⁰ Ndipo wangusere mu nyumba. Ndipo mzinda wo unguwungirana pamoza so, viyo kuti wanguziŵa chingana nkhurgha cha.

²¹ Ndipo ŵachivwa ŵabali ŵake ŵanguruta kwachimuko; chifukwa ŵatinge, “Wahereuka.”

²² Ndipo ŵalembi wo ŵangusika ku Yerusalemu ŵatinge, “We ndi Belzebule; ndikuti, ndi fumu yo ŵademone waŵatuzga ŵademone.”

²³ Ndipo pakuŵandana wawaneniyanga mu zintharika, “Ngwanthazi uli Satana kumtuzga Satana?

²⁴ Asani ufumu ungagaukana mwaku wija, kuti ngwanthazi ku ufumu wo cha.

²⁵ Asani nyumba yingagaukana paku yija, kuti yiŵenge yanthazi kuma cha nyumba yeniyo.

²⁶ Ndipo asani Satana wayukiya paku yija, ndi wagaukana, kuti waziŵa kuma cha, kweni wendi umari.

²⁷ Palive yumoza wangaŵa wanthazi kusere mu nyumba ya chilimbi, kwachiskoŵa viyaŵi vyake, kwambura kuti wadanga wamanga chilimbi yo; sono ndipo waskoŵenge nyumba yake.

²⁸ “Nadidi ndikuneniyani, vilakwa vyose virekekiyenge pa ŵana ŵa ŵanthu, ndi matuka ghenigho ŵangatuka?

²⁹ Kweni yose yo wangatuka Mzimu Wakupaturika, walive chireke muyaya, kweni wendi kalema ka chilakwa chamuyaya:”

³⁰ pakuti ŵanenanga, “We nawo mzimu wawiyu.”

Anyina ndi ŵabali ŵaku Yesu

³¹ Ndipo ŵanguza anyina ndi ŵahurwa ŵake; Ndipo, pakuma kubwaro ŵangutuma kwaku iyo, kumudana.

³² Ndipo watekangapo mzinda wo kwakumukwetere; ndipo watiti kwaku iyo, “Awona, anyoko ndi ŵahurwa ŵako kubwaro ŵatulembe.”

³³ Ndipo wakuwamuka watiti, “Mbayani ama ndi ŵahurwa ŵangu?”

³⁴ Pakulereska kwakuzunguliya paku ŵeniwo ŵatekanga kwakumukwetere, watiti, “Awoni, ama ndi ŵahurwa ŵangu!

³⁵ Chifukwa yose yo wachitenge khumbu laku Chiuta, mweniyo ndi muhurwa wangu, ndi mzichi, ndi ama.”