Marko 2 - Tonga Bible 1986

Yesu wachizga munthu wavinjenji

¹ Ndipo wachisere so mu Kapernaumu pavuli pa mazuŵa ghanyake, wanguvwika kuti we mu nyumba.

² Ndipo ŵanguwungana ŵanandi, viyo kuti mwengavi so malo chingana mpha khomu; ndipo warongoronga nawo mazu gho.

³ Ndipo ŵanguza, ŵakumtole wavinjenje, wakutembezeka ndi ŵanayi.

⁴ Ndipo po kuti ŵanguziŵa cha kundere kwaku iyo kufupi, chifukwa cha mzinda wo, ŵangweuwa bagha po wenga; ndipo ŵanguliphwatuwa, ndi ŵangusiska chita cho wangurapo wavinjenji yo.

⁵ Ndipo Yesu, wachiwona chivwanu chawo, watiti ku wavinjenje yo, “Wamwana, vyarekeka vilakwa vyako.”

⁶ Kweni mwenga ŵanyake ŵalembi mwenimo, wo ŵangurunguruka mu mitima yawo,

⁷ “Chifukwa chine warongoro viyo mwenuyo? Watuka: ngwanthazi yani kureke vilakwa, kweni Chiuta pe?”

⁸ Ndipo sosonukweni Yesu, wakuziŵa mu mzimu wake kuti ŵarungurukanga viyo mwaku ŵija, watiti kwaku wo, “Chifukwa chine murunguruka vyenivyo mu mitima yinu?

⁹ Chiyuyu ninchi, kumnene wavinjenje yo, ‘Vyarekeka vilakwa vyako’, pamwenga kumnene, ‘Yuka nyamuwa chita chako, ndi wendenge’?

¹⁰ Kweni kuti muziŵe kuti Mwana wa munthu we nawo mtufu panupasi kwachireke vilakwa” (watiti ku wavinjenje yo),

¹¹ “Kwaku iwe ndititi, yuka, nyamuwa chita chako, rutanga ku nyumba yako.”

¹² Ndipo wanguyuka, ndi sosonukweni wangunyamuwa chita, wangutuwa paurongo paku wose; viyo kuti wose ŵanguzizwa ndipo ŵamukankhuskanga Chiuta, ŵakuti, “Kali kose kuti tachiona chaviyo cha.”

Yesu wadana Levi

¹³ Ndipo wanguruta so mu mphepete mu nyanja; ndi mzinda wose unguwungana kwake, ndipo waŵasambizganga.

¹⁴ Ndipo wachirutiriyapo wanguwona Levi, mwana waku Alifeyu, pasi je pa malo gha msonkho, ndipo watiti kwaku iyo, “Rondo ine!” Ndipo wangusoka, wangumrondo.

¹⁵ Ndipo wati waja iyo pa kurgha mu nyumba yake, ŵanandi ŵamsonkhu ndi ŵakulakwa ŵajarizgananga pamoza ndi Yesu ndi ŵasambizi ŵake: pakuti kwenga ŵanandi, wo ŵangumrondo.

¹⁶ Ndipo ŵalembi ŵa ŵaFarisi wachiwona kuti warghanga pamoza ndi ŵakulakwa ndi ŵamsonkhu, ŵangunene ŵasambizi ŵake, “Chifukwa chine waturgha ndi watumwa pamoza ndi ŵamsonkhu ndi ŵakulakwa?”

¹⁷ Ndipo wachivwa Yesu wanguŵanene, “Wo ŵe umampha kuti ŵapenja ng'anga cha, kweni ŵarwali ndiwo; kuti ndinguza kwazidana ŵarunji cha, kweni ŵakulakwa.”

Fumbu ndi kufunga

¹⁸ Ŵasambizi ŵaku Yohane ndi ŵa ŵaFarisi ŵafunganga: ndipo ŵanthu ŵanguza, ŵangumufumba, “Chifukwa chine ŵasambizi ŵaku Yohane ndi wasambizi ŵa ŵaFarisi ŵafunga, kweni ŵasambizi ŵinu kuti ŵafunga cha?”

¹⁹ Ndipo Yesu wangunena nawo, “Kumbi wangaziŵa uli kufunga ŵana ŵa nkholi, ŵeche pamoza nawo mweni-nthengwa? Nyengo yose yo mweni-nthengwa we pamoza nawo, kuti ŵaziŵa kufunga cha.

²⁰ Kweni ghakazanga mazuŵa, penipo mweni-nthengwa wakatuzgikangako kwaku wo, penipo ndipo ŵafungenge mu zuŵa liya.

²¹ Palive yumoza wagambika pa raya lakale chigamba cha saru yifya: iku chigamba cho chifya chirundumukenge ku lakale, ndipo kuparuka ko kuŵenge kuheniku.

²² Ndipo palive yumoza wapunguliya vinyo mufya mu vikuli vyakale: iku vinyo yo waphwatuwenge vikuli viyo, vinyo wadikenge, ndi vikuli viphwatukenge! Kweni vinyo mufya ŵapunguliya mu vikuli vifya.”

Fumbu ndi za Sabata

²³ Zuŵa limoza pa sabata wadumuwanga mukati mu minda; ndipo ŵasambizi ŵake ŵachenda ŵangwamba kudemphuwa masoyo.

²⁴ Ndipo ŵaFarisi ŵanguti kwaku iyo, “Awona, chifukwa chine ŵachita pa Sabata cho nchambura kuyamo?”

²⁵ Ndipo wanguti kwaku wo, “Asi mwaŵerenga kale cho wanguchita Davidi, po wangukavuka ndi wanguvwa nja, iyo ndi wo ŵapamoza nayo,

²⁶ mo wanguserere mu nyumba yaku Chiuta, po Abiatara wenga mzukuru mura, ndipo wangurgha viŵande vyakujarika, vyenivyo kuti kunguyiyamu kurgha cha, kweni ku ŵazukuru pe, ndipo so wangupaska kwaku wo ŵapamoza nayo?”

²⁷ Ndipo wanguti kwaku wo, “Sabata linguŵiya pa chifwa cha munthu, kuti, munthu pa chifwa cha Sabata cha:

²⁸ viyo Mwana wa munthu ndi mweneko wa Sabata nalo.”