Marko 15 - Tonga Bible 1986

Yesu watoreke kwaku Pilato

¹ Ndipo sosonukweni ku mlenji-lenji ŵangupanga upu ŵazukuru ŵara pamoza ndi ŵara ndi ŵalembi, ndi upu wose, ndipo ŵangumumanga Yesu ndi kuruta nayo, kwaku Pilato,

² Pilato wangumfumba, “Kumbi ndiwe Karonga wa ŵaYuda?” Ndipo wangwamuka, wangumnene, “Ukamba ndiwe.”

³ Ndipo ŵazukuru ŵara ŵangumusumuwa vinandi.

⁴ Ndipo Pilato wangumfumba so, wakuti, “Asi utamuka kanthu? Awona, ndi vinandi vyo ŵakusumuliya.”

⁵ Kweni Yesu kuti wangwamukapo so kanthu cha; viyo kuti wanguzizwa Pilato.

Yesu wakomboreke ku nyifwa

⁶ Kweni pa dghere ŵanguziŵiriya kuŵafwatuliya wakumangika yumoza, mweniyo ŵangampempha.

⁷ Ndipo wengako yumoza wakuzumbulika Baraba, wakumangika pamoza ndi ŵakugaruka, ŵeniwo mu chigaruka cho ŵanguchita umbanda.

⁸ Ndipo mzinda unguza ungwamba kumromba kuti wawachitiye uli ndimo wanguziŵiriya.

⁹ Ndipo Pilato wanguŵamuka wakuti, “Mukhumba kwari kuti ndikufwatuliyeni Karonga wa ŵaYuda?”

¹⁰ Chifukwa wanguteska kuti pa chifukwa cha bina ndicho ŵazukuru ŵara ŵangumkombole.

¹¹ Kweni ŵazukuru ŵara ŵangusonkhezga mzinda, alinga kuti waŵafwatuliye Baraba.

¹² Ndipo Pilato wakwamuka wanguŵanene, “Viyo ndichitengenji ndi yo mutumzumbuwa Karonga wa ŵaYuda?”

¹³ Ndipo iwo ŵangukambura so, “Mpayike!”

¹⁴ Pilato wangunena nawo, “Kwati, wachita chiheni chakutunji?” Kweni iwo ŵangukambura ukongwa, “Mpayike!”

¹⁵ Ndipo Pilato, pakukhumba kuŵakhorweska, wanguŵafwatuliya Baraba, ndipo wangukombo Yesu, wati wamukwechuwa, kuti wapayikike.

Ŵankhondo ŵanyoza Yesu

¹⁶ Ndipo ŵankhondo ŵangumgumizgiya mu mphara mukati, yo ndi Praitorio; ndipo ŵanguwunganiska pamoza liŵanja lose.

¹⁷ Ndipo ŵangumuvwalika ropa, ndipo wati ŵapika ndumbu ya minga ŵangumuvwalika;

¹⁸ ndipo wangwamba kumtauzga, “Mauleni, Karonga mwe wa ŵaYuda!”

¹⁹ Ndipo wamkosonga ku mutu ndi dete, ndi kumfunyiya mata, ndipo pakujikama pasi makongonu ŵangumlambiya.

²⁰ Ndipo ŵati ŵamtombozga, ŵangumzuwa ropa lo, ŵangumuvwalika minjirira yake. Ndipo ŵangumgumizgiya kubwaro, kwachipayikika.

Yesu wapayikika pa mphinjika

²¹ Ndipo wangukakamizga mwenda-nthowa yumoza, wakutuwa ku viŵera, Simoni waku Kurene, uskeu waku Alekezandara ndi Rufu, kuti ŵanyamuwe mphinjika yake.

²² Ndipo ŵangumtole ku malo Golgota, (ko nkhuti, pakung'anamuka, Malo gha bwaza).

²³ Ndipo ŵampaskanga vinyo wakukasiya muro: kweni iyo kuti wanguronde cha.

²⁴ Wangumpayika, ndipo ŵangugaŵana minjirira yake pakuchita mphenduzga mwakuti ŵapanikizge cho yumoza ndi yumoza wangato.

²⁵ Ndipo lenga ora lechitatu, po ŵangumpayikiya.

²⁶ Ndipo lembo la kafukwa kake lingulembekapo pachanya, “KARONGA WA ŴAYUDA.”

²⁷ Ndipo pamoza nayo ŵangupayikika ŵakupoka ŵaŵi: yumoza ku janja lake lamarghe, ndi yumoza ku maze, [

²⁸ Penipo lingufiskika nenedu lamwaku mchimi, “Wangupendeke pamoza ndi waziradangu.”]

²⁹ Ndipo ŵakudumuwapo ŵamtukanga, ŵakupuking'a mitu yawo, ŵakuti, “Aha! Wakubwanganduwa kasopi we, ndi wakumuzenga mu mazuŵa ghatatu;

³⁰ ujipozomoske, ndi upawukeko ku mphinjika yo!”

³¹ Viyo so ŵazukuru ŵara nawo, ŵakumtombozga pamoza ndi ŵalembi, ŵanenanga, “Wangupozomoska ŵanyake; kweni kuti ngwanthazi kujipozomoska cha.

³² Kristu yo, Karonga waku Yisraele, wasike sono ku mphinjika yo, alinga tiwone ndi tivwane.” Ndipo wo ŵangupayikika pamoza nayo nawo ŵamuweranga.

Nyifwa yaku Yesu

³³ Ndipo linguti laza ora lachinkhonde ndi chimoza, panguŵa mdima pa charu chose mpaka ora lachinkhonde ndi chinayi.

³⁴ Ndipo pa ora lachinkhonde ndi chinayi Yesu wangubongo ndi mazu ghakuru, “Eloi, Eloi, lama sabaktani?” Ghenigho pakung'anamuwa ghatiti, “Chiuta wangu Chiuta wangu, mwandisiyanji?”

³⁵ Ndipo ŵanyake ŵaku wo ŵanguma kweniko, ŵanguti ŵavwa, ŵatinge, “Awonani, wadana Eliya.”

³⁶ Ndipo wanguchimbiya yumoza, wanguzaza buwura ndi vinyo wakusasa, wanguweska ku dete wamumweskanga, wakuti, “Dekani, tiwone asani watuza Eliya kuzachimpawuska.”

³⁷ Kweni Yesu wangukambura mazu ghakuru, ndipo wangumara mtima.

³⁸ Ndipo saru yakuchinga mu kasopi yinguparuka pakati, kutuwa pachanya pasi mbwitu.

³⁹ Ndipo wachiwona Kenturione, yo wanguma pakuthyana nayo, kuti wamara mtima viyo, wangutamulizga, kuti, “Nadidi munthu uyu wenga Mwana waku Chiuta.”

⁴⁰ Ndipo kwenga so ŵanthukazi ŵakulereska patari, mwaku ŵeniwo ŵenga Mariya waku Magdala, Mariya nyina waku Yakobe mumana, ndi waku Yose, ndi Salome,

⁴¹ ŵeniwo, po wenga mu Galile, ŵendanga nayo pamoza ndi ŵamteŵetiyanga; ndi ŵanthukazi ŵanyake ŵanandi wo ŵangukwere nayo ku Yerusalemu.

Kuŵikika kwa thupi laku Yesu

⁴² Ndipo ghanguti ghaŵa mazuro, pakuti lenga la Chirongoso, lo ndi zuŵa lakudanga ndi Sabata,

⁴³ kunguza Yosefe waku Arimatiya, waupu wa mbiri yakuvwika, mweniyo nayo wenga wakulereze ufumu waku Chiuta; wangusere kwachiganga kwaku Pilato, ndipo wangupempha thupi laku Yesu.

⁴⁴ Pilato wanguzizwa asani wafwadi: ndipo wati wadana Kenturione, wangumfumba kuti vinu wafwa kale.

⁴⁵ Ndipo wanguti wavwa kwaku Kenturione kuti wafwa, wanguninkha thupi lo kwaku Yosefe.

⁴⁶ Ndipo wangugulasaru ya bafuta, ndipo wati walipawuwa wangulivunga mu bafuta yo, ndipo wanguliŵika mu muunda, wo unguchongeka mu jarawe; ndipo wangugadabuliyako mwa ku khomu la muunda.

⁴⁷ Ndipo Mariya waku Magdala ndi Mariya nyina waku Yose wawonanga po wanguŵikika.