Marko 14 - Tonga Bible 1986

Ŵazukuru ŵara ŵapenja kumbaya Yesu

¹ Kweni pavuli pa mazuŵa ghaŵi linguŵapo dghera la phaska, ndi la chiŵande chambura chimera: ndipo ŵazukuru ŵara ndi ŵalembi ŵapenjanga mo wambayiyenge, wachimko kwa uchenjezi:

² chifukwa watinge, “Mu dghera lo cha, vinu chingaŵapo chivulupi cha khamu lo.”

Wapakika mafuta ku Betaniya

³ Ndipo pakuŵa iyo mu Betaniya, mu nyumba yaku Simone wamakhate, wachija pa kurgha, kunguza munthukazi wakuŵa ndi supa ya sangarawe ya mafuta ghachema cheneko gha mtengo ukuru; ndipo wati waswa supa, wangupunguliya mafuta pa mutu waku Yesu.

⁴ Kweni ŵengapo ŵanyake ŵakutundiriya mwaku ŵija, ŵakuti, “Chaŵiyanji chitayiku chaviyo cha mafuta gho?

⁵ Chifukwa mafuta yagha ghangaziŵa kusaskika kwakuruska matambala machumi pe chumi ghatatu, ndi kupaskika ku ŵakavu.” Ndipo ŵajumiyanga paku iyo.

⁶ Kweni Yesu wanguti, “Mlekeni; mumsuzgiyanji? Wandichitiya mlimu weneko.

⁷ Pakuti nyengo zose mwe nawo ŵakavu pamoza namwe, ndipo penipo pose mukhumbiya muziŵa kuŵachitiya umampha; kweni kuti mwe ndi ine nyengo zose cha.

⁸ Wachita cho wangukhumba kuchita: watukutizgiya limu liŵavu langu kwachindiŵika.

⁹ Ndipo ndikuneneskiyani, kweniko kose limemezekenge evangeli mu charu chose, ichi nacho cho wachita uyu, chikataulikanga, uli nchikumbusku chaku cho wachita.”

Yuda wazomera kumkombo Yesu

¹⁰ Ndipo Yuda mkeriote, yumoza wa chumi ndi ŵaŵi, wanguruta ku ŵazukuru ŵara, alinga wampachiriye kwaku wo.

¹¹ Ndipo ŵachivwa ŵangukondwere, ndipo ŵangupangana kumpaska ndrama. Ndipo ŵapenjanga mo ŵampachiriyenge pa nyengo yakwenere.

Yesu waturgha Njonesku ndi ŵasambizi ŵake

¹² Ndipo pa zuŵa lakudanga la chiŵande chambura chimera, penipo ŵabayanga phasku lo, ŵasambizi, ŵake ŵanguti kwaku iyo, “Mukhumba tikamrongosoleyeni nunkhu kuti mukarghe phaska?”

¹³ Ndipo wangutuma ŵaŵi ŵa ŵasambizi ŵake, watiti kwaku wo, “Kaninga ku msumba wo, ndipo wakumanenge namwe munthu wakunyamuwa chiŵiya cha maji: murondoni;

¹⁴ ndipo kweniko kose wangasere, muneniyeni mweninyumba yo, ‘Msambizgi watiti, Che pani chipinda changu cha ŵalendo, mwenimo ndingargha phaska pamoza ndi ŵasambizi ŵangu?’

¹⁵ Ndipo iyo wakukurongoni chipinda chamuchanya chikuru, chakuyarika ndi chakurongosolaka: ndimu tirongosoliyeni.”

¹⁶ Ndipo ŵasambizi wo ŵangutuwa, ŵanguruta ku msumba wo, ndipo ŵangusaniya uli ndimo wanguŵanene: ndipo ŵangurongoso phaska.

¹⁷ Ndipo ghanguti ghaza mazuro wanguza, pamoza ndi chumi ndi ŵaŵi wo.

¹⁸ Ndipo wachija pa gome ndi kurgha, Yesu wanguti, “Ndikuneneskiyani, yumoza waku imwe wandipachiyenge yo nayo waturgha nane pamoza.”

¹⁹ Wangwamba iwo kuŵa ndi chisungu, ndi kunena kwaku iyo yumoza ndi yumoza, “Kumbi ndine?”

²⁰ Kweni iyo wanguŵanene, “Njumoza wamu chumi ndi ŵaŵi, wakubwenga chiŵande mu mbali paoza nane.

²¹ Pakuti Mwana wa munthu waruta viyo, uli ndimo kwalembeke paku iyo: kweni owe ku munthu mwaku mweniyo Mwana wa munthu wapachirika! Mphanyi kwenga kwamampha ku munthu yo, asani wengavi kupapika.”

Njonesku ya Ambuya

²² Ndipo ŵachirgha iwo, wanguto chiŵande, wati watumbika, wangumenya, ndipo wangupaska kwaku wo, ndi wanguti, “Rondani: ichi ndi liŵavu langu.”

²³ Ndipo wanguto nkhombo, wati wawonga, wangupaska kwaku wo: ndipo ŵangumwapo wose.

²⁴ Ndipo wanguŵanene, “Chenichi ndi ndopa zangu, za phanganu, zakudikiya pa ŵanandi.

²⁵ Ndikuneneskiyani, kuti nkhamwangapo so cha vya chipasi cha mphereska, mpaka zuŵa leniliya, penipo ndikamwanga lifya mu ufumu waku Chiuta.”

²⁶ Ndipo wanguti wamba lisumu wangutuliya ku phiri la Olivete.

Yesu wakamba ndi kumkana kwaku Petro

²⁷ Yesu watiti kwaku wo, “Mose muguŵiskikenge; pakuti kwalembeka, ‘Ndipumenge mliska, ndipo ziparghang'ikenge mberere.’

²⁸ Kweni nditakuti ndayuka ine, ndamkukudanjiriyani ku Galile.”

²⁹ Petro wanguti kwaku iyo, “Chingana wose ŵangaguŵiskika, ine pe cha.”

³⁰ Ndipo Yesu wangumnene, “Ndikuneneske kuti le, usiku uno, tambala wandakokoŵereke kaŵi, iwe undikanenge katatu.”

³¹ Kweni iyo warongoronga kwanthazi ukongwa, “Asani nkhufwa nkhafwanga pamoza namwe, ndipo kuti nkhakananga imwe awa.” Kwakukozgana nako ŵakambanga wose.

Yesu waromba mu Gesemane

³² Ŵanguza ku malo, zina lake Gesemane; ndipo watiti ku ŵasambizi ŵake, “Tekani panu, mpaka ndaromba.”

³³ Ndipo wato pamoza nayo Petro, Yakobe ndi Yohane, ndipo wangwanda kusuzgika ukongwa, ndi kukoŵeke limu.

³⁴ Watiti kwaku wo, “Mzimu wangu ngwachisungu ukongwa mpaka ku nyifwa; jani panu, ndipo cherezgani.”

³⁵ Ndipo wangurutiriya kamanavi, wanguwa pasi, ndipo wanguromba wakuti, asani kungachitika, ora lo limurutiiriye.

³⁶ Ndipo watinge, “Atate, Ada, vyose vyamachitika ndi imwe; mutuzgepo pangu nkhombo iyi; ndi kweni cho ndikhumba ine cha, kweni cho mukhumba imwe.”

³⁷ Ndipo wachiza, wanguŵasaniya ŵara tulo, ndipo watiti kwaku Petro, “Simoni, ura kumbi? Asi wenga ndi nthazi kwa chicherezga ora limoza?

³⁸ Cherezgani ndi rombani mwakuti mureke kusere mu kesedu; mzimu nadi ngwakukhumba kuromba, kweni liŵavu ndakutomboroka.”

³⁹ Ndipo wanguruta, so ndi wanguromba, wakukamba mazu ghenigho pe.

⁴⁰ Ndipo wachiza so, wanguŵasaniya ŵaratulo, chifukwa maso ghawo ghanguzitiskika ndipo ŵaziŵanga cha cho ŵangamwamuka.

⁴¹ Ndipo watuza kachitatu, ndipo watiti, kwaku wo, “Kumbi mweche kura kuti mujipumuzge? Mbwenu sono, ora lo laza; Mwana wa munthu wapachirikiya mu manja gha ŵalakwi,

⁴² yukani, tirutenge: onani, wakundipachiya yo waŵandika.”

Yesu wakoreka

⁴³ Ndipo sosonukweni, wacharongoro iyo wanguza Yuda, yumoza wa chumi ndi ŵaŵi wo, ndi pamoza nayo mzinda ndi malipanga ndi zindodo, wakutuliya ku ŵazukuru ŵara ndi ŵalembi ndi ŵara.

⁴⁴ Kweni wakumpachiya yo wanguŵapaska chisimikizgu, wakuti, “Mweniyo ndimufyofyonthenge, ndiyo: mukoni, ndi mugumizgeni!”

⁴⁵ Ndipo wachiza, sosonukweni wangufika kwaku iyo, ndipo watiti, “Rabi”; ndipo wangumufyofyontha.

⁴⁶ Ndipo wanguŵika manja paku iyo, ndipo wangumko.

⁴⁷ Kweni ngana, yumoza wa ŵakumapo, wanguwewepuwa lipanga lake, ndipo wangukoso muŵanda wa mzukuru mura, wangudumuwa gutu lake.

⁴⁸ Yesu wangwamuka, wanguŵanene, “Kumbi mwaza nge mpha wakupoka, malipanga ndi zindodo kundiko?

⁴⁹ Zuŵa ndi zuŵa ndaŵanga namwe ku kasopi, wakusambizga; ndipo kuti mungundiko cha: kweni nkhuti malembo ghafiskike.”

⁵⁰ Ndipo wose ŵangumsiya, ndipo ŵanguthaŵa.

⁵¹ Ndipo jaha ngana wangurongozgana nayo, wakuphemeska bafuta pa liŵavu lake; ndipo wangumko.

⁵² Kweni iyo wakusiya bafuta lo, wanguthaŵa wankhuli.

Yesu wateruzgika ndi upu wa ŵaYuda

⁵³ Ndipo ŵangumugumizgiya Yesu ku mzukuru mura: ndipo ŵanguwugana kwaku iyo wose ŵazukuru ŵara ndi ŵara ndi ŵalembi.

⁵⁴ Ndipo Petro wangumrondo kutaliku, mpaka mukati mu mphara ya mzukuru mura; ndipo wanguja pamoza ndi ŵalinda, wakota moto.

⁵⁵ Ndipo ŵazukuru ŵara wo ndi upu wose ŵapenjanga ukaboni paku iyo, wakumukombole kunyifwa; ndipo kuti ŵanguwubowozga cha.

⁵⁶ Chifukwa ŵanandi ŵangupereka ukaboni wa utesi paku iyo, ndipo maukaboni ghawo ghengavi kuyana.

⁵⁷ Ndipo ŵanyake ŵangusoka ŵakambanga utesi paku iyo, ŵakuti,

⁵⁸ “Ifwe tingumuvwa wachikamba kuti, ‘Ine nkhabwanganduwanga kasopi uyu wakuzengeka ndi manja, ndipo mu mazuŵa ghatatu nkhazenganga munyake wambura kuzengeka ndi manja.’ ”

⁵⁹ Ndipo chingana ndi viyo kuti ukaboni wawo unguyana cha.

⁶⁰ Ndipo mzukuru mura wangusoka mukati mo, wangumfumba Yesu, wakuti, “Asi utamuka kanthu? Nchine cho ŵatukusimikizgiya yaŵa?”

⁶¹ Kweni wanguchetama iyo, kuti wangwamukapo kanthu cha. Mzukuru mura yo wangumfumba so, watiti kwaku iyo, “Kumbi iwe ndiwe Kristu, Mwana wa Mtumbikiki Yo?”

⁶² Ndipo Yesu wanguti, “Ndine: ndipo mukawonanga Mwana wa munthu kuja ku janja la marghe la Nthazi, ndi kuza pa mitambo ya kuchanya.”

⁶³ Ndipo mzukuru mura wanguparuwa munjirira wake, ndi wanguti, “Teche so kukavukiyanji ŵakaboni?

⁶⁴ Mwavwa kutuka ko: mutitinji imwe?” Ndipo wose ŵangumsuska kuti wangwenere nyifwa.

⁶⁵ Ndipo wangwamba ŵanyake kumfunyiya mata, kumujara ku maso, kumpafuwa, ndi kumnene, “Loskanga”: ndipo ŵalinda ŵangumronde ndi inakofe.

Petro wakana Yesu

⁶⁶ Ndipo wachija Petro mu mphara yo, wanguza yumoza wa ŵasungwana ŵa mzukuru mura;

⁶⁷ wachiwona Petro wakotha moto, wangumlereska, ndipo wali, “Iwe nawe wenga ndi muNazarete yo, Yesu.”

⁶⁸ Kweni wangukana iyo, wakuti, “Kuti ndiziŵa, chingana nkhuwamu cha, cho ukamba.” Ndipo wangutuliya ku khonde;

⁶⁹ ndipo msungwana wangumuwona, ndi wangwamba so kuŵanene ŵakumapo, “Mwenuyu njumoza wa mwaku wo.”

⁷⁰ Kweni iyo wangukana so. Jepu kamanavi wakumapo wangunena so ndi Petro, “Kwakuneneska iwe we waku wo; chifukwa ndiwe muGalile.”

⁷¹ Kweni wangwamba iyo kutemba ndi kurapa, “Kuti ndimziŵa cha munthu uyu, yo ukamba.”

⁷² Ndipo soso nukweni tambala wangukokoŵereka kachiŵi. Sono Petro wangukumbuka nenedu lo, mo wangumnene Yesu, “Wandakokoŵereke kaŵi tambala, undikanenge katatu.” Ndipo wangusweka mtima, wanguliya masozi.