Marko 13 - Tonga Bible 1986

Yesu wakamba ndi kupasuka kwa Yerusalemu

¹ Ndipo wachiporota iyo kutuwa ku kasopi, yumoza wa ŵasambizi ŵake watiti kwaku iyo, “Msambizgi, awonani, vimya navyo ndi mazengedu kunozga!”

² Yesu wangumnene, “Uwona kumbi mauzengi ghenigho ghakuru? Kuti usiyikengepo panu cha mwa pa mwa, wo urekenge kupong'eka pasi.”

Visuzgu ndi viŵembu

³ Ndipo wachija iyo pa phiri la Olivete pakuthyana ndi kasopi, Petro, Yakobe, Yohane ndi Andreya wangumfumba pa ubende,

⁴ “Tineniyeni, vyenivyo vikaŵangapo zuŵanji? Ndipo chisimikizgu chikaŵanga chine chakuti vyenivyo vyose vitenere kufiskika?”

⁵ Ndipo Yesu wangwamba kuŵanene, “Cheŵani vinu yumoza wangakurandizgani.

⁶ Wanandi ŵakaziyanga mu zina langu ŵakuti, ‘Ndine iyo’; ndipo wamrandizga ŵanandi.

⁷ Kweni muchivwa zinkhondo ndi mbiri za mahomwa, mungopanga cha: vitenere kuŵapo vyenivyo; kweni umari wo undaze.

⁸ Chifukwa mtundu ukayukiyanga pa mtundu, ndi ufumu pa ufumu vikaŵangapo viyeuyeu malo ghanandi vikaŵangapo vilala: vyose nchiyambu cha maurwirwi.

⁹ “Kweni juchenjeriyeni: chifukwa ŵakakombolenga imwe ku maupu; ndipo mukakwechulikanga mu masinagoge; ndipo paurongo pa mafumu ndi ŵakaronga mukamiyanga pa chifwa changu, uli nchisimikizgu kwaku wo.

¹⁰ Ndipo mu mitundu yose kutenere danga kumemezeka evangeli, wo.

¹¹ Ndipo penipo ŵamkukugumizgani kwachikukomboni, mungakweŵekanga ndi cho mwamurongoro cha: kweni chose cho chingapskika kwaku imwe mu ora leniliya, chenicho rongoroni. Chifukwa kuti ndimwe cha mwamurongoro, kweni Mzimu Wakupaturika ndiyo.

¹² Ndipo mbali wapachiyenge mbali ku nyifwa, ndi wiske mwana wake: ndipo ŵana ŵayukiyenga pa ŵapapi; ndipo ŵaŵabayiskenge.

¹³ Ndipo mukaŵanga ŵakutinkhika ndi wose chifukwa cha zina langu. Kweni yo wakunthiyengepo mpaka umari, mweniyo wakataskikanga.

Chimutimbaheka chakofya

¹⁴ “Kweni penipo muwona unyakazi wa phasulu kuma pa malo gho kuti utenere kumapo cha (wakuŵerenga yo wawemo) sono wamu Yuda wathaŵiye ku mapiri;

¹⁵ ndipo yo we pa bagha pachanya wangasika cha, chingana nkhusere kwachito kanthu mu nyumba yake:

¹⁶ ndipo waku ulimi wangawere ku nyumba cha kwachito munjirira wake.

¹⁷ Kweni owe kwaku wo mbakuŵa ndi nthumbo ndi ku ŵakonkheska mu mazuŵa gho!

¹⁸ Viyo rombani kuti chingaŵapo ichi mu chipwepwe cha.

¹⁹ Chifukwa mu mazuŵa ghenigho kuŵenge suzgu, yakuti yindaŵepo yaviyo kutuwa ku mtendeku wa ulengi wo wangulenga Chiuta, mpaka ku sono, ndi kuti yikaŵangapo so cha.

²⁰ Ndipo asani Ambuya awurengevi kufupikiska mazuŵa gho, mphanyi kuti yatinge yipozomoskekenge cha nyama ye yose: kweni pa chifwa cha ŵakusankhika wo ŵakusankha, ŵakufupikiska mazuŵa gho.

²¹ Ndipo penipa asani yumoza wanganene imwe, ‘Awonani, panu pe Kristu yo’; pamwenga, ‘Awonani, we kuwa’; mungavwananga cha.

²² Chifukwa ŵakayukanga ŵanthu ŵanyake wo ŵajiŵikengemo kuti ndiwo Kristu, ndi ŵanyake kuti mbamchimi, ndipo ŵapaskenge visimikizgu ndi minthondwi kwachirandizga ŵakusankhika nawo (asani nchamachitika).

²³ Kweni cheŵani imwe, awonani, ndakukambiyani limu vyose.

Kuza kwa Mwana wa munthu

²⁴ “Kweni mu mazuŵa ghenigha, pavuli pa suzgu iya, dazi likafipiskikanga, ndi mwezi kuti ukapaskanga uŵali wake cha,

²⁵ ndipo nyenyezi zikambotokanga kuchanya, ndi vyanthazi vyamu machanya vikasukung'ikanga.

²⁶ Ndipo sono ŵakawonanga Mwana wa munthu wakuziya mu mitambo ndi nthazi yikuru ndi unkhankhu.

²⁷ Ndipo sono ŵakatumanga ŵangelo, ndipo ŵakawungang'iskanga ŵakusankhika ŵake ku mphepu zinayi, kutuwa ku chigoti chapasi mpaka ku chigoti chakuchanya.

Chisambizgu cha mkuyu

²⁸ “Kweni ku mkuyu wo sambiraniko ntharika: penipo mphanda yake sono yiri tefwatefwa, ndipo yivwalira mane, muziŵa kuti chihanya che pafupi.

²⁹ Viyo namwe so, penipo mwazamuwona vyenivyo kuŵapo, muziŵe kuti we kufupi, pa khomu yipu.

³⁰ Ndikuneneskiyani, mgonezi uno kuti ukarutanga waka cha, vyenga vindaŵepo vyose ivi.

³¹ Kuchanya ndi pasi vikarutanga: kweni mazu ghangu kuti ghakarutanga cha.

Palivi yumoza waziŵa zuŵa pamwenga ora

³² “Kweni vya zuŵa liya pamwenga ora lo palive yumoza waziŵa, chingana mbangelo kuchanya, chingana ndi Mwana yo, kweni Ada pe.

³³ Cheŵani, khazgani ndi rombani, chifukwa kuti muziŵa cha kufika kwa nyengo yo.

³⁴ Uli ndimo munthu wakuŵa pa ulendo, wachisiya nyumba yake, ndi wachipaska mtufu ku ŵaŵanda ŵake, ku yumoza ndi yumoza nchitu yake, walanguliya mlindakhomu nayo kuti wakhazge.

³⁵ Khazgani viyo: chifukwa kuti muziŵa cha po mweni-nyumba wakaziyanga, manyi nkhu mazuro, manyi ndi usiku pakati, pamwe pa tambala kokoŵereka, pamwe ku mlenji,

³⁶ vinu pakuza kwambuchibuchi wangakusaniyani mwara tulo.

³⁷ Kweni chenicho ndinene imwe, ndinene wose: Khazgani.”