Marko 1 - Tonga Bible 1986

Kusambizga kwaku Yohane Mbatizi

¹ Chiyambo cha evangeli waku Yesu Kristu, Mwana waku Chiuta.

² Uli ndimo kwalembeke mwaku Yesaya mchimi yo, “Awona, ine ndituma thenga langu paurongo pa chisku chako. Lo likakongorenga nthowa yako;

³ liu la wakukambura mu bozwa, Rongosoni nthowa ya Ambuya nyoroskani ŵagurwi wake.”

⁴ Kunguŵa kuti Yohane wabatizanga mu bozwa lo, ndi wamemezanga ubatizo wa ching'anamuka cha ku chireke cha vilakwa.

⁵ Ndipo ŵazanga kwaku iyo kutuliya charu chose cha Yuda, ndi wose ŵamu Yerusalemu: ŵabatizikanga ndi iyo mu msinji Yordane, ŵakusumuwa vilakwa vyawo.

⁶ Kweni Yohane wavwaranga weya wa gamila, ndi likwamba la chikoŵe mu chiunu mwake, ndipo warghanga ŵazombe ndi uchi wa mumdondo.

⁷ Ndipo wangumemeza, wakuti, “Watuza pavuli pangu wanthazi kwakuruska ine, nthambo za viyatu vyaku mweniyo kuti nditene ine cha kukotama ndi kufwatuwa.

⁸ Ine ndikubatizani ndi maji; kweni iyo wamkubatizani ndi Mzimu Wakupaturika.”

Kubatizika kwaku Yesu ndi kweseka kwake mu mapopa

⁹ Ndipo kunguŵa mu mazuŵa ghenigho Yesu wangutuwa ku Nazarete waku Galile, wangubatizika ndi Yohane mu Yordane.

¹⁰ Ndipo sosonukweni wati wazuwuka mu maji, wanguwona machanya kuparuka, ndi Mzimu ulaka ndi nkhunda kusikiya paku iyo,

¹¹ ndipo lingutuwa kuchanya liu, lakuti, “Iwe ndiwe Mwana wangu Wakwanjiwa, mwaku iwe ndikondwere.”

¹² Ndipo sosonukweni Mzimu ungumugumizgiya ku bozwa.

¹³ Wengamo mu bozwa lo mazuŵa machumi ghanayi, wakweseka ndi Satana; ndipo wenga pamoza ndi vikoku; ndipo ŵangelo ŵamumiriyanga.

Yesu wadana ŵarovi ŵasomba ŵanayi

¹⁴ Kweni wati wakomboleka Yohane, Yesu wanguza mu Galile, wakumemezamemeza evangeli waku Chiuta,

¹⁵ wakuti, “Nyengo yafiskika, ndipo waŵandika ufumu waku Chiuta: ng'anamukani ndi vwanani mu evangeli.”

¹⁶ Ndipo wachenda mumphepete mu nyanja ya Galile, wanguwona Simoni ndi Andreya, mhurwa waku Simoni, wakupong'a mkwau mu nyanja yo; pakuti ŵenga ŵarovi.

¹⁷ Ndipo Yesu wanguŵanene, “Rondoni ine, ndipo ndichitenge imwe ŵarovi ŵa ŵanthu.”

¹⁸ Ndipo sosonukweni ŵangujowo mikwau, ndi ŵangumrondo.

¹⁹ Ndipo wati warutiriyapo pamanavi, wanguwona Yakobe, mwana waku Zebediya, ndi Yohane, mhurwa wake, wo nawo mu ngaraŵa ŵatandanga mukwau.

²⁰ Ndipo sosonukweni wanguŵadana: ndipo ŵangumusiya uskeu Zebediya mu ngaraŵa, pamoza ndi ŵanchitu ŵamphotu ndipo ŵangumurondo.

Munthurumi yo wenga ndi mzimu wauyu

²¹ Wangusere mu Kapernaumu; ndipo sosonukweni pa Sabata wangusere mu sinagoge, ndipo wasambizganga.

²² Ndipo ŵarwitanga pa chisambizgu chake: pakuti wawasambizganga nge ngwakuŵa ndi mazaza, nge mbalembi wo cha.

²³ Ndipo mu sinagoge mwenga munthu wakuŵa ndi mzimu wawiyu;

²⁴ ndipo wangukambura, kuti, “Te ndi chine ndi iwe, Yesu waku Nazarete? Kumbi waziya kuzachitinanga? Nditukuziŵa mo uliri, Wakupaturika we, waku Chiuta.”

²⁵ Ndipo Yesu wanguwuchenya, wakuti, “Chetama, tuwamo mwake.”

²⁶ Ndipo Mzimu wo wawiyu wati wamziririska, ndi kuliya ndi mazu ghakuru ungutuwamo mwake.

²⁷ Ndipo wose ŵanguzizwa, viyo kuti ŵangufumbana mwaku ŵija, “Nchine chenichi? Nchisambizgu chifya! Ndi mtufu wayichenya chingana ndi mizimu yawiyu, ndipo yitumvwiya.”

²⁸ Ndipo sosonukweni thenthe lake lingutuliya kosekose mu charu chose chakuzunguliya Galile.

Yesu wachizga ŵanthu ŵanandi

²⁹ Wati watuwa mu sinagoge lo, wanguza mu nyumba yaku Simoni ndi Andreya, pamoza ndi Yakobe ndi Yohane.

³⁰ Ndipo mpongozi waku Simoni wangura wakutama ndi mu liŵavu. Ndipo ŵangumnene vya pakuiyo.

³¹ Ndipo wanguza, wangumko janja, wangumuyuska; sono muliŵavu mungumtaya, ndipo waŵateŵetiyanga.

³² Ndipo ku mazuro, pakusere kwa dazi, ŵangumtole wose ŵakuŵa ndi matenda ndi ŵa ŵademone.

³³ Ndipo muzi wose unguwunjikika pa khomu lo.

³⁴ Ndipo wanguchizga ŵanandi ŵakutama ndi matenda ghakupambanapambana, wangutuzga ŵademone ŵanandi ndipo kuti wanguzomerezga ŵademone wo kurongoro cha, pakuti ŵangumziŵa.

Yesu wasambizga mu Galile

³⁵ Ndipo ndi mlenji, kweche usiku, wanguyuka ndi kutuwa, wanguruta ku malo gha bozwa, warombanga kweniko.

³⁶ Ndipo ŵangumundondoloska mvuli Simoni ndi ŵapamoza nayo, ŵakumpenja.

³⁷ Penipo ŵangumusaniya ŵanguti, “We yose wakulembeni.”

³⁸ Ndipo watiti kwaku wo, “Tiyeni tiye ku mizi yakuthoŵezgana, mwakuti kweniko nako nditauleko; pakuti chenichi ndicho ndikuziya.”

³⁹ Ndipo wangusere mu masinagoge ghawo mu Galile yose, wakutaula ndi wakutuzga ŵademone.

Yesu wachizga munthu wamakhati

⁴⁰ Ndipo ŵangumziya ŵamakhate, ŵakumuŵeyere ndi ŵakumlambiya, ŵangunena nayo, “Asani mukhumba, mwe ŵanthazi kunditozga.”

⁴¹ Ndipo ŵakufwiya lisungu, Yesu wangutambaruwa janja ndi wangumukwaska, ndipo wanguti, “Ndikhumba; utozgeke.”

⁴² Ndipo sosonukweni makhate gho ghanguzirimitiya, ndipo wangutozgeka.

⁴³ Ndipo wanguti wamuchinyiya limu, wangumunene warutenge.

⁴⁴ Ndi watiti kwaku iyo, “Awona, unganeniyapo munthu cha: kweni kanga, kajirongo ku mzukuru, ndipo pa chifwa cha kutozgeka kwako kapereke vyo Mosese wangulangula, nge nchisimikizgu ku ŵanthu wo.”

⁴⁵ Kweni wachituwa iyo, wangwamba kumemeza ukongwa ndi kubuska makani gho, viyo Yesu kuti wanguziŵa so cha kusere pakweru mu muzi, kweni wajanga kubwaro mu malo gha bozwa: ndipo ŵanthu ŵamziyanga kutuwa kosekose.