Marangu 33 - Tonga Bible 1986

Mosese watumbika mafuka chumi ndi ghaŵi ghaku Yisraele

¹ Ili ndilo thumbiku lo Mosese munthu waku Chiuta wangutumbika ŵana ŵaku Yisraele wenga wandafwe.

² Wanguti, “Ambuya angutuwa ku Sinai, ndipo anguvumbukwa kwaku ifwe kutuwa Seiri, anguwana kutuwa ku phiri Parani. Angutuwa ku vikwi chumi (10,000) vya wakupaturika ndi ŵanguto moto wakulipuka ku janja lawo la marghe.

³ Inya, anguŵanja ŵanthu ŵawo, wose wo ŵangupaturiskikiya kwaku iwo ŵenga mu janja lawo, viyo ŵangundondoroska mu marundi ghinu, ŵakuronde kurongozga kwinu,

⁴ penipo Mosese wangutilanguliya dangu ili nge nchihara cha umba waku Yakobe.

⁵ Mwa viyo Ambuya anguŵa karonga mu Jeshuruni, penipo ŵachirongozgi ŵa ŵanguwungana, makhamu ghose ghaku Yisraele pamoza.

⁶ “Iku Rubene waje wamoyo, kufwa cha, ndi kuti ŵanthu ŵake ŵaŵe ŵamana cha.”

⁷ Ndipo ichi ndicho wangukamba chaku Yuda, “Avwani Ambuya mazu ghaku Yuda, ndipo mumserezge mu ŵanthu ŵake. Ndi janja linu mumulimbalimbiye, ndipo mumovye wachimikana ndi ŵarwani ŵake.”

⁸ Ndipo ghaku Levi wanguti, “Mupaskeni Levi Tumimi winu, ndi Urimi winu mupaske ku mutuŵa winu, yo mungumwesa pa Masa, mungulimbalimba ndi iyo pa maji gha Meriba,

⁹ mweniyo wangukamba gha awiske ndi anyina, ‘Ndituŵagomezga cha.’ Wangukwamphuwa vya ŵana ŵanyake ndi wanguŵaruwa ŵana ŵake, pakuti iwo ŵanguphwere mazu ghinu, ndi ŵangusunga phanganu linu.

¹⁰ Ŵakarunguchizganga Yakobe vyeruzgu vinu ndi Yisraele dangu linu, wakaperekanga vya chema paurongo pinu ndi sembe yose yakocha pa jochero linu.

¹¹ Ambuya tumbikani uromba wake ndipo muronde nchitu ya manja ghake. Swani viunu vya ŵarwani ŵake, viunu vyaku wo ŵatumutinkha, alinga kuti ŵareke kuyuka so.”

¹² Gha paku Benjamini wanguti, “Nkhwanjiwa wa Ambuya, waja mu chimangu pamoza nayo. Watumuzunguliya zuŵa lose ndipo wamujariska pakati pa maphewa ghake.”

¹³ Ndipo ghaku Yosefe wanguti, “Ambuya atumbike charu chake ndi vyawezi vyakusankhika vya kuchanya, ndi vya ndimba vyo vikula pasi,

¹⁴ vipasi vyakusankhika vya lumwi, ndi vipasi vyakuzara vya myezi,

¹⁵ vipasi vyamampha vya mapiri gha mwaka, ndi uzari wa mitunthu ya muyaya,

¹⁶ ndi vyawezi vyakuruska vya charu chapasi ndi uzari wake, ndi mwaŵi wakuyo wajanga mu thundu. Mphanyi ivi vyose vyaza pa mutu waku Yosefe, ndi pa mphumphu yaku mutu waku yo ndi fumu mu ŵana ŵanyake.

¹⁷ Nkhuzi yake ya umwali yendi uchiyembwe. Masengwe ghake ndi masengwe gha njati, ndi ghenagha wakafwenkhuliyanga ŵanthu wose, kwachifika ku vigoti vya charu chapasi. Viyo ndimo ŵalili vikwi chumi (10,000) ŵaku Efraimu, ndimo so ŵalili vikwi chumi (10,000) ŵaku Manase.”

¹⁸ Ndipo ghaku Zebuluni wanguti, “Kondwa Zebuluni, uchiruta, kondwa Isakara mu mahema ghako.

¹⁹ Wakadaniyanga ŵanthu ku Phiri lawo, penipo ŵapereka sembe zakwenere, pakuti ŵatonkha usambasi wa zinyanja ndi mbiku zakubisika zamu muchenga.”

²⁰ Ndipo ghaku Gadi wanguti, “Watumbikike yo wakuzga Gadi. Gadi wala pasi uli ndi nkharamu, waparuwa janja ndi mutu.

²¹ Wangujisankhiya charu chamampha ukongwa, pakuti mwenimuwa chigaŵa cha wakulamula chinguŵikika. Wanguza ku ŵarongozgi ŵa ŵanthu, pamoza ndi Yisraele wangufiska marangu ndi malamulu ghakurunjika gha Ambuya.”

²² Ndipo ghaku Dani wanguti, “Dani ndi mwana wa nkharamu, yo wachiripuka kutuwa ku Bashani.”

²³ Ndipo ghaku Naftali wanguti, “Owe, Naftali wakukhorwa ndi mwaŵi, ndi wakuguta thumbiku la Ambuya, yiŵe yako nyanja ndi vinthu vya kumwera.”

²⁴ Ndipo ghaku Ashere wanguti, “Ashere utumbikike pachanya pa ŵana ŵanthurumi mphanyi wanjika ndi ŵana ŵanyako, ndipo wabizgenge rundi lake mu mafuta.

²⁵ Vikhozgeru vyako vikaŵanga chisulo ndi mkuŵa, ndipo uli ndi mazuŵa ghako, ndimo kukaŵiyanga kulimba kwako.

²⁶ “Palivi nanga njumoza yo we uli ndi Chiuta, Jeshuruni we, mweniyo wasika mu machanya kuzachovya iwe, ndi mu uchiyembwe wake waziya mumdengwendi.

²⁷ Chiuta wa muyaya ndiyo malo ghako ghakujamo, ndipo kusi kwe manja ghake gha muyaya. Ndipo wadikiska ŵakupindikana ŵinu paurongo pinu, ndipo watiti, ‘Parghang'a’.

²⁸ Viyo Yisraele wanguja mu chimangu, chisima chaku Yakobe yija, mu charu cha chakurgha ndi vinyo, inya, machanya ghake ghanthona dungwi.

²⁹ Wakukondwa ndiwe Yisraele we! Ndiyani yo wenge ndiwe? Mwa ŵanthu ŵakutaskika ndi Ambuya. Iwo ndi nguru ya chovyo chinu, ndi lupanga la upundi winu! Ŵamawongo ŵinu ŵakazanga kunyengere imwe; ndipo mukaphwatanga pa malo ghawo ghakusopiyapo.”