Marangu 28 - Tonga Bible 1986

Vitumbiku vyakupaskika chifukwa chakuvwiya Ambuya

¹ “Ndipo asani mukavwiyanga mazu gha Ambuya Chiuta winu, mwa kuphwere kuchita marangu ghose gho nditumulanguliyani msana unu, Ambuya Chiuta winu wakamusoskaninga kuŵa pachanya pa mitundu yose yamu charu chapasi.

² Ndipo vitumbiku ivi vyose vizenge paku imwe ndi kuja mwinu, asani mukavwiyanga mazu gha Ambuya Chiuta winu.

³ Mukaŵanga ŵakutumbikika mu msumba, ndi ŵakutumbikika mu munda.

⁴ Vikatumbikikanga vipasi vyamu liŵavu linu, ndi vipasi vya nyata yinu, ndi vipasi vya viŵetu vinu, kwandana kwa ng'ombe zinu, ndi ŵana ŵa mberere zinu.

⁵ Yikaŵanga yakutumbikika sokora yinu ndi chakukanyiyamo chiŵande chinu.

⁶ Mukatumbikikanga pakusere kwinu, ndi mukatumbikikanga pakutuwa kwinu.

⁷ “Ambuya akachitanga kuti ŵamawongo ŵinu ŵapundike paurongo pinu; ŵakazanga kumikana namwe nthowa yimoza, ndipo ŵazamuthaŵa paurongo pinu nthowa zinkhonde ndi ziŵi.

⁸ Ambuya akalangulanga chitumbiku paku imwe munkhokwe zinu ndi mwaku vyose vyo muchita, ndipo, akamutumbikaninga mu charu cho Ambuya Chiuta winu watumupaskani.

⁹ Ambuya akamikanga imwe kuŵa mtundu wakupaturika kwaku iwo ŵeneko, nge ndimo ŵarapiya imwe, asani musunga marangu gha Ambuya Chiuta winu ndi kwenda mu nthowa zake.

¹⁰ Ndipo ŵanthu wose ŵamu charu chapasi ŵakaziŵanga kuti mudanika ndi zina la Ambuya, ndipo ŵakakuwopaninga.

¹¹ Ndipo Ambuya akamusambaskaninga ndi vipasi vya liŵavu linu, ndi vipasi vya ng'ombe zinu, ndi vipasi vya nyata yinu, mu charu cho Ambuya angurapiya ku auskemwe kumupaskani.

¹² Ambuya akakujuriyaninga usambasi wawo wamampha mu machanya, kukupaskani vuwa pa charu chinu mu nyengo yake, ndi kutumbika nchitu yose ya manja ghinu. Ndipo mukateuliskanga mitundu yinandi, kweni imwe kuti mukateuwanga cha.

¹³ Ambuya akamuchitaninga kuŵa mutu, muchiya cha, ndipo mukaŵanga pachanya pe, pasi cha, asani muvwiya marangu gha Ambuya Chiuta winu gho ndimutauliyani zuŵa ili, mu kuphwere pakughachita,

¹⁴ asani kuti murandiya ku janja la marghe pamwenga ku maze cha, kusiya vyo ndikutauliyani zuŵa ili, ndi kurondo ŵachiuta ŵanyake ndi kuŵateŵete.

Matembo ghakuza paku iwo pakureka kuvwiya

¹⁵ “Kweni asani kuti mukavwiyanga cha mazu gha Ambuya Chiuta winu, pamwenga kuphwere kuchita marangu ghake ghose ndi malangulu ghake gho ndikutauliyani zuŵa ili, iku matembo ghose yagha ghakazanga paku imwe ndi kumunangani.

¹⁶ Mukatembekanga mu msumba, mukatembekanga mu munda,

¹⁷ yikatembekanga sokora yinu ndi chakukanyiyapo chiŵande chinu.

¹⁸ Vipasi vya liŵavu linu vikatembekanga, ndi vipasi vya nyata yinu, kwandana kwa ng'ombe zinu, ndi twana twa mberere zinu.

¹⁹ Mukatembekanga mu chisere, ndi mu chituwa.

²⁰ “Ambuya akatumanga paku imwe matembo, chimutimbaheka, ndi kandundu, mwaku vyose vyo muchita, mpaka penipo mwaparghang'ika ndi mwamara ruŵiruŵi; chifukwa cha machitidu ghinu ghaheni, pakuti mwandikana.

²¹ Ambuya akatumanga nthenda ya chidelu kujaliriya paku imwe mpaka penipo amumarani mose mu charu chenicho museremo kuchironda kuŵa chinu.

²² Ambuya akamupumaninga ndi nthenda ya kamphumu, ndi ya kufunda mu liŵavu, ya kutupa, ndi yakocha ukongwa liŵavu, ndi chilangalanga, chimphunga, ndi chuku. Ivi vikamurondoninga mpaka mumare.

²³ Mtambo wo we pachanya pa mutu winu ukaŵanga nge ndi mkuŵa, ndi charu cho che pasi pinu chikaŵanga nge ndi chisulo.

²⁴ Ambuya akachitanga vuwa ya charu chinu livuvu ndi fuvu kutuwa ku mtambo yikang'anga paku imwe mpaka penipo mwamalika.

²⁵ “Ambuya akamuchitaninga kuti mupundike paurongo pa ŵamawongo ŵinu, mukaŵayukiyanga nthowa yimoza ndipo mukathaŵanga nthowa zinkhonde ndi ziŵi paurongo pawo, ndipo mukagwedukiyanga pasi pa maufumu ghose gha charu chapasi.

²⁶ Thupi linu likaŵanga kurgha kwa viyuni vyose mude, ndi vinyama vyamu charu, ndipo pakaŵangavi munthu yo wakavidikiskiyanga kutali.

²⁷ Ambuya akamupamaninga ndi nthenda ya mapumba ghaku Egipiti; ndi vironda, ndi viphere, ndi kamukono, kwaku zo kuti muziŵa kuchizgika cha.

²⁸ Ambuya akamupumaninga ndi vifusi ndi uchibulumatiya, ndipo akatimbanizganga maghanaghano ghinu.

²⁹ Mukawurawuranga pa msana pakati, uli ndimo wachiburumutiya wawurawuriya mu mdima. Kuti mukasakatanga cha mu nthowa zinu, mukanyekezgekanga ndi mukaskoŵekanga rutaruta, ndipo pakaŵangavi yumoza wakukuwovyani.

³⁰ Mukajariyanga munthukazi, ndipo munthurumi munyake wakagonanga nayo; mukazenganga nyumba kweni kuti mukajangamo cha mwaku yo, mukapandanga munda wa mphereska, kweni kuti vipasi vyake vikaŵanga vinu cha.

³¹ Ng'ombe yinu yikabayikanga pa maso pinu, kweni kuti mukarghanga nyama yake cha. Mbunda yinu yikakwamphulikanga pa maso pinu, kweni kuti yikawezgekiyanga kwaku mwaŵeni cha. Mberere zinu zikapaskikanga ku ŵamawongo ŵinu ndipo pakaŵangavi wakumovyani.

³² Ŵana ŵinu ŵanthurumi ndi ŵana ŵinu ŵanthukazi ŵakaŵanga ŵaŵanda kunyake kweniko mwakuŵawona, kweni mukatondekanga kuya kwaku wo zuŵa lose, ndipo kuti manja ghinu ghakaŵanga ndi nthazi cha kuŵataska.

³³ Mtundu wo mulivi kuziŵa ukarghanga vipasi vya nyata yinu ndi vya kutakataka kwinu kose. Ndipo mukazitiskikanga ndi kuphwanyika rutaruta;

³⁴ viyo kuti mukafunthanga chifukwa cha vinthu vyo maso ghakawonanga.

³⁵ Ambuya akamupumaninga pa makongono ndi pa musolonthi ndi mapumba ghakuŵaŵa ukongwa kwaku gho kuti mungaziŵa kuchizgika cha, kutuwa ku phazi la rundi linu kufika pachanya pa mutu winu.

³⁶ “Ambuya akamuperekaninga pamoza ndi karonga winu yo mwamika pachanya pinu ku mtundu wo imwe nanga mbauskemwe ŵalivi kuwuziŵa, ndipo kwenikuwa mwamuteŵete ŵachiuta ŵanyake ŵa muti ndi ŵa mwa.

³⁷ Ndipo mukaŵanga ŵamantha, ŵantharika ndi ŵakunyozeka, mukati mu ŵanthu wose kweniko Ambuya akamurongozgiyaninga.

³⁸ Mukapingiyanga ku munda mbeu zinandi kweni mukavunanga zimanavi, pakuti zikarghikanga ndi zombe.

³⁹ Mukapandanga minda ya mphereska ndi kuyirimiriya, kweni kuti mukamwanga cha vinyo wake, nanga nkhupontho vipasi, pakuti vikarghikanga ndi viwungu.

⁴⁰ Mukaŵanga ndi miti ya maolive mu charu chinu chose, kweni kuti mukatukutizganga mafuta ghake cha, chifukwa vipasi vya maolive ghinu vikapururukanga.

⁴¹ Mukapapanga ŵana ŵanthurumi ndi ŵanthukazi, kweni kuti ŵakaŵanga ŵinu cha, chifukwa ŵakakorekanga mu uŵanda.

⁴² Miti yinu yose ndi vipasi vya mu charu chinu vikarghikanga ndi zombe.

⁴³ Mlendo wakuŵa mukati mwinu wakaŵanga pachanya pinu, ndipo imwe mukasikiyanga pasi.

⁴⁴ Iyo wamuteuliskeninge, kweni imwe kuti mumuteuliskenge cha, wakaŵanga mutu kweni imwe mukaŵanga muchiya.

⁴⁵ Matembo ghose yagha ghakaŵanga paku imwe, ghakamundondoloskaninga ndi kumusaniyani, mpaka penipo mose mwanangika, pakuti mungureka kuvwiya mazu gha Ambuya Chiuta winu, kusunga marangu ghake, ndi visambizgu vyake vyo wangumulanguliyani.

⁴⁶ Ghakaŵanga paku imwe ndi pa ŵana ŵinu nge nchizindikilo ndi chakuziziswa nyengo zose.

⁴⁷ “Chifukwa cha unandi wa vinthu vyo mwenga navyo, mwengavi kuŵateŵete Ambuya Chiuta winu ndi chimwemwe ndi likondwa la mu mtima;

⁴⁸ chifukwa ichi mukatewetiyanga ŵamawongo ŵinu ŵeniwo Ambuya akatumanga kurwana namwe, mu nja, mu nyota, mu ukavu, ndi mu usauchi wa vinthu vyose; akaŵikanga goli la chisulo mu khosi linu, mpaka penipo amuparghang'ani.

⁴⁹ Ambuya akazanga ndi mtundu wa ŵanthu kutuwa ku mpherekezgu za charu chapasi, upusu wawo nge nkhaphururukidu ka nombo, mtundu wo mazu ghake kuti mungavwa cha,

⁵⁰ mtundu wa chisku cha kofya weniwo kuti ukaphwerenga unthu wa mura cha pamwenga kuchita lisungu ku mumana cha,

⁵¹ ndipo ukarghanga ŵana ŵa ng'ombe zinu, ndi vipasi vya charu chinu, mpaka penipo mwaparghanika; weniwo kuti ukamusiyaninga kurgha, vinyu, mafuta, mwandanu wa ng'ombe zinu, pamwenga ŵana ŵa mberere zinu cha mpaka penipo wamuparghanani.

⁵² Ŵakamuzinganinga mu mizi yinu yose, mpaka malinga ghinu ghakukho gho ghawe pasi mu charu chinu chose; ndipo ŵakamuzingiyaninga mu mizi yinu yose yamu charu chinu, chenicho Ambuya Chiuta winu wakupaskani.

⁵³ Ndipo mukarghanga chipasi cha liŵavu linu, nyama ya ŵana ŵinu ŵanthurumi ndi ŵanthukazi ŵeniwo Ambuya Chiuta winu ŵakupaskani mu ugoŵi ndi mukuyuzgika ko ŵarwani ŵinu ŵakamusuzganinga nako.

⁵⁴ Munthurumi yo ngwakurombotoka ndi wakupapika wakuropwa mwaku imwe, wakanoranga kurgha mbali wake, ndi muwoli wake wapa mtima wake ndi mwana wake yo wamujaliyako.

⁵⁵ Viyo kuti wakapaskangako cha nyama ya ŵana ŵake wo iyo waturgha, chifukwa walivi kakumujaliyako, mukuzingika ndi mkuyuzgika ko ŵarwani ŵinu ŵakamusuzganinga nako.

⁵⁶ Munthukazi wakoloŵa ndi wamasango mukati mwinu, yo kuti watesa kukanda pasi rundi lake cha chifukwa ngwakoloŵa ndi ngwa masango, wakanoranga murumi wake wapa mtima wake, mwana wake munthurumi ndi mwana wake munthukazi,

⁵⁷ chibali chake cho chituza pakati pa nthangala zake pavuli pakubara ŵana wo wabala. Chifukwa wakaŵarghanga ku ubendi, pakusoŵa vunthu vyose vinyake, mu kuzingika ko ndi muyuzgu weniwo ŵakupindikana ŵinu ŵakamuyuzganinga nawo mu mizi yinu.

⁵⁸ “Asani mukaŵanga ŵambura kuphwere kuchita mazu ghose gha dangu ili ghenigho ghakulembeka mu buku ili, kuti mopenge zina la unkhankhu ndi lakofya, Ambuya Chiuta winu,

⁵⁹ po sono Ambuya akatoliyanga paku imwe ndi mphapu yinu masuzgu ghazitu, masuzgu ghakuŵaŵa ndi ghakukiyakiya, ndi matenda gha chitima ndi ghakukiyakiya.

⁶⁰ Ndipo akatoliyanga so paku imwe nthenda zose za mu Egipiti ziya mwawopanga, ndipo zikamukaniriyaninga.

⁶¹ Nthenda ye yose, ndi suzgu ye yose yeniyo yilivi kurembeka mu buku la dangu ili, Ambuya akatoliyanga paku imwe mpaka mwamarika.

⁶² Nanga mungwandana uli ndi nyenyezi za kuchanya, mukajangako mwaŵamanavi mukaŵerengekanga, chifukwa mwengavi kuvwiya mazu gha Ambuya Chiuta winu.

⁶³ Ndipuuli ndimo wangukondwere kumuchitiyani umampha ndi kumwandaniskani, ndimo Ambuya akakondwiyanga mu kutole pharghang'iku pinu ndi kumumarani, ndipo mukazuwikanga mu charu chenicho mukaserengamo kwachiŵa chinu.

⁶⁴ Ndipo Ambuya akamumbininiskiyaninga mukati mu ŵanthu wose kwamba ku umari wa charu chapasi, kuya ku unyake, ndipo mwenimuwa mwamuteŵete ŵachiuta ŵamwenga, ŵa muti ndi mwa, ŵeniwo chingana ndimwe chingana mbauskemwe ŵengavi kuŵaziŵa kali.

⁶⁵ Ndipo mukati mu mitundu iyi kuti mukasaniyanga uyuyu cha, ndipo kuti mwazamupumuwa cha, kweni Ambuya akamupaskaninga muwa mtima wakumbwambwantha ndi maso gha ndandi ndi umoyo wakusuzgika.

⁶⁶ Mukakangang'anga ndi umoyo winu usiku ndi msana mukaŵanga ŵamantha, ndipo kuti mukagomezganga umoyo winu cha.

⁶⁷ Asani kwacha ndi mlenji mukambenge kuti, ‘Mphanyi kungufipa,’ ndipo ndi mazulo mukambenge kuti, ‘Mphanyi kwenga mlenji!’ Chifukwa cha chofyo cho mtima winu uwopenge, ndi vyakuwoneka vyo maso ghinu ghawonenga.

⁶⁸ Ndipo Ambuya akamuwezgiyaninga ku Egipiti mu zingaraŵa, ulendo weniwo ndingupangana kuti mukawendanga so cha, mwenimuwa mwakujiguliska ku ŵakupindikana ŵinu kuŵa ŵaŵanda ŵanthurumi ndi ŵaŵanda ŵanthukazi, kweni pamuwulavi munthu yo wakumugulani.”