Marangu 22 - Tonga Bible 1986

Vyakuŵeta vyakusoŵa nthowa

¹ “Kuti mukayilekanga waka ng'ombe pamwenga mberere ya mwana munyinu cha yichilandiya kwa waka, pakureka kuyovya. Mukaziwezgiyanga ku mwana munyinu.

² Ndipo asani kuti we pafupi namwe cha, pamwenga asani mulivi kumuziŵa, muzenge nayo kwinu ku muzi ku nyumba yinu. Yikaŵanga ndi imwe mpaka penipo mwana munyinu watiyipenja, sono po ndipo, mukamuwezgiyanga yo.

³ Ndipo viyo so mukachitiyanga ndi mbunda yake, ndimo mukachitiyanga so ndi chivwalo chake. Ndimo mukachitiyanga so ndi kanthu ke kose kakusoŵa ka mwana munyinu, keniko wasovya ndipo mwakabowozga ndimwe, mungarekanga kumovya cha.

⁴ Kuti muyiwonenge mbunda ya mwana munyinu, pamwenga ng'ombe yake yawa pasi pa nthowa, ndi kureka kovya zo, mumovyenge kuzinyamuwa so.

⁵ “Munthukazi wangavwaranga che chose cho ncha chinthurumi cha, pamwenga munthurumi wangavwaranga vya chinthukazi cha; pakuti Ambuya Chiuta winu watinkha munthu yose wakuchita vinthu ivi.

⁶ “Asani mwawona chizimbu cha kayuni mu muti we wose pamwenga pasi, mo mwe twana pamwenga mazira, ndipo nyina wavumbata twana pamwenga mazira, mungatonga nyina pamoza ndi twana cha;

⁷ mumureke nyina warutenge, kweni twana mungajitole, alinga kuti kukuŵiyeninga umampha imwe, ndi kuti muŵe wamoyo nyengo yitali.

⁸ “Muchizenga nyumba yifya, muyichitiyenge chiguŵa cha pa mutenje winu, alinga kuti mureke kutole kalema ka ndopa pa nyumba yinu, asani weyose wangawa kutuwa paku yo.

⁹ “Kuti mumijenge mu munda winu wa mphereska mbeu za mitundu yiŵi cha, vinu mbeu yeniyo mwamija ndi vipasi vya munda wamphereska yiperekekenge ku nyumba yakupaturika.

¹⁰ Mungalimanga ndi ng'ombe ndi mbunda pamoza cha.

¹¹ Kuti muvwarenge saru ya masazga weya ndi mtatavu cha.

¹² “Mujichitiyenge zimphonje pa visongo vinayi vya chiphemeska chinu chenicho mutijivwinkha nacho.

¹³ “Asani munthu we yose wato munthukazi, ndi waseremo ndipo watimujowole nkhaza,

¹⁴ ndipo watimutundula ndi maŵiru ghaheni, ndipo watole zina liheni paku iyo, kunena kuti, ‘Ndinguto munthukazi uyu, ndipo penipo ndingundere pafupi nayo, kuti ndikusaniyamo ghakurongo umwali cha’,

¹⁵ sono wiske wa mwali yo ndi nyina ŵatonge vya umwali wake ndi kuza navyo ku ŵara ŵa msumba pa likomo.

¹⁶ Ndipo wiske wa mwali yo wakakambanga ku ŵara, ‘Ndingupereka mwana wangu munthukazi kwaku uyu munthurumi kuti waŵe muwoli wake, ndipo iyo watimulambwaza.

¹⁷ Wamutundula ndi vyakulengeska, kunena kuti, “Ndilivi kusaniyamo vyakurongo umwali wake mu mwana wako.” Kweni ehe vya umwali vya mwana wangu ndi ivi.’ Ndipo wakatandikanga chivwalo cho paurongo pa ŵara ŵa msumba.

¹⁸ Sono ŵara ŵa msumba ŵakatonga munthurumi yo ndi kumukwechuwa;

¹⁹ ndipo ŵakamulipiskanga ndrama za siliva machumi pe chumi (100) ndi kuzipaska ku wiske wa mwali yo, chifukwa watole zina liheni pa mwali wa ŵaYisraele. Ndipo iyo mwali wakaŵanga muwoli wake; wamupatenge cha mu mazuŵa ghose gha umoyo wake.

²⁰ Kweni asani chinthu cho nchakuneneska, ndipo vyakurongo umwali vilivi kusanirika mu mwali yo,

²¹ po ndipo wakatolenga mwali yo ku khomo la nyumba ya wiske. Ndipo ŵanthurumi ŵamu msumba wake ŵakamudinanga ndi mya mpaka wafwe, chifukwa wachita cha lilengu mu Yisraele pakuchita ureŵi mu nyumba ya wiske. Viyo mukapeyanga uheni mukati mwinu.

²² “Asani munthu wasanirika wachila ndi muwoli wa munthu munyake, wose ŵaŵi ŵakafwanga, munthurumi yo wangula ndi munthukazi, ndi munthukazi viyo. Viyo mukapeyanga uheni mwaku Yisraele.

²³ “Asani pe mwali wakujaririka ndi munthurumi, ndipo munthu munyake wakumana nayo mu msumba ndi wala nayo,

²⁴ sono muŵatuzgenge wose ŵaŵi kuza nawo ku likomo la msumba wuwa. Ndipo mukaŵadinanga ndi mya mpaka nyifwa, mwali yo chifukwa wengavi kukuta kuti wovyeke chingana wenga mukati mu msumba, munthurumi nayo chifukwa watimbanizga muwoli wa muzengezgani wake. Viyo mukapeyanga uheni mukati mwinu.

²⁵ “Kweni asani nkhu dondo munthurumi wakumanenge ndi mwali wakujaririka ndi munthurumi, ndipo munthurumi yuwa watimuko ndi kula nayo, sono ndi munthurumi pe yo wangula ndi munthukazi yo wakafwanga.

²⁶ Kweni ku mwali yo kuti muchitenge kanthu cha, yo walivi kulakwa kwakulangikiya ku nyifwa, pakuti mrandu uwu ukozgana ndi wuwa wa munthu wakupuma ndi kubaya muzengezgani wake;

²⁷ chifukwa wangumusaniya ku dondo, ndipo chingana mwali yo wakujaririka ndi munthurumi wanguliliya chovyo, pengavi yumoza wakuti wangamupozomoska.

²⁸ “Asani munthurumi wakumana ndi mwali wambura kujaririka ndi munthurumi, ndipo watimuko ndi kula nayo, ndi ŵasanirika,

²⁹ sono munthurumi yo wangula nayo wakaperekanga ku wiske wa mwali yo ndrama za siliva machumi ghankhonde (50) ndipo munthukazi waŵenge muwoli wake, chifukwa wamutimbanizga; wareke kamupata mu mazuŵa ghake ghose.

³⁰ “Munthu kuti wakatonga muwoli wa wiske cha, pamwenga chingana nkhumuzuwa mweniyo ngwa wiske.