Marangu 21 - Tonga Bible 1986

Ŵakubayika ŵambura kuziŵika yo waŵabaya

¹ “Asani mu charu chenicho Ambuya Chiuta winu watukupaskani kuŵa chinu, we yose wasanirika wakubayika, wakula pasi pakweru, ndipo kulivi kuziŵika njani wamubaya,

² iku ŵaraŵara ŵinu ndi ŵeruzgi ŵinu ŵakazanga penipo. Ŵakapimanga utali kwachifika ku mizi yeniyo yizunguliya wakubayika yo,

³ ndipo ŵara ŵa muzi weniwo wepafupi ukongwa ndi munthu wakubayika yo, ŵakatonga kang'ombe kanthukazi keniko kalivi kutatapo nchitu ndi keniko kandaguguzepo goŵa.

⁴ Ndipo ŵara ŵa msumba wo ŵakazanga ndi kang'ombe ko ku dambo la maji ghakwenda, lenilo lilivi kulimika pamwenga kupandikamo kanthu ndipo ŵakafyonga singu la kang'ombe ko mwenimuwa mu dambo.

⁵ Ndipo ŵazukuru ŵaLevi ŵakazanga kunthazi, pakuti Ambuya ŵinu ŵakuŵasankhiya kuteŵete iyo ndi kutumbika mu zina la Ambuya, ndipo pa mazu ghawo suskanu yose ndi kupuma kose vyeruzgikenge.

⁶ Ndipo ŵara wose ŵa muzi wa pafupi ukongwa ndi munthu wakubayika yo ŵakasambiyanga manja ghawo pa kang'ombe ko, keniko khosi lake lafyoreka mu bozwa.

⁷ Ŵakasimikanga, ‘Manja ghidu kuti ghangudiska ndopa izi cha, chingana ndi maso ghidu ghengavi kuwona zichidika.

⁸ Gowokiyani, Ambuya, ŵanthu ŵinu ŵaYisraele, ŵeniwo mukuwombo; ndipo rekani kuŵika kalema ka ndopa zambura kalema mukati muŵanthu ŵinu ŵaYisraele, kweni chitani kuti kalema ka ndopa zo kagowokeleke kwaku wo.’

⁹ Mwa viyo mukapeyanga kalema ka ndopa zambura kalema mukati mwinu, muchichita chenicho nchakurunjika mu maso gha Ambuya.

¹⁰ “Muchiruta ku dondo kwachimikana ndi wakupindikana winu, ndipo Ambuya Chiuta winu wati ŵapereka mu manja ghinu, imwe mutiŵayora kuŵa ŵamikoli,

¹¹ ndipo muwona mukati mu ŵakuyoreka wo munthukazi wakutowa, ndipo imwe mutimukhumba kuti wangaŵa muwoli winu,

¹² mukazanga nayo ku nyumba yinu. Ndipo iyo wakasenganga mutu wake ndi kucheketa njoŵi zake.

¹³ Ŵakazuwanga chivwalo chake cha umukoli, ndipo wakajanga mu nyumba yinu ndi kutenjere wiske ndi nyina mwezi wamphumphu. Pavuli pake mungaziŵa kumusere, ndi kuŵa murumi wake, ndipo iyo wakaŵanga muwoli winu.

¹⁴ Pavuli, asani mulivi kukhorwa nayo, mumufwatuwenge kuti warutenge kose kweniko wangakhumba; kweni kuti mumuguliskenge ndrama cha, kuti mumuchitenge uli ndi muŵanda cha, pakuti imwe mwamuyuyuwa kale.

¹⁵ “Asani munthurumi we ndi ŵanthukazi ŵaŵi, watanja yumoza kweni watinkha munyake, ndipo wose ŵaŵi, wakwanjiwa ndi wakutinkhika ŵamubaliya ŵana. Asani wakudanga kupapika ngwa wakutinkhika,

¹⁶ sono mu zuŵa lenilo uskeu wagaŵiya vyuma vyake nge nchihara ku ŵana ŵake ŵanthurumi, wangachitanga kuti mwana munthurumi wa wakwanjiwa kuŵa kuti uli ndiyo wakupapika wakudanga cha, kumuŵika mu malo gha mwana munthurumi wa wakutinkhika mweniyo ndiyo wakudanga kupapika.

¹⁷ Kweni wamutumbikenge wakudanga kupapika, mwana wa wakutinkhika, pakumupaska vigaŵa viŵi vyaku vyose vyo we navyo, pakuti ndiyo ndopa zake zakudanga, mazaza gha wakupapika wakudanga ndi ghake.

¹⁸ “Asani munthu wendi mwana munthurumi munonono ndi wakugaluka, mweniyo ngwakukana kuvwiya mazu gha wiske pamwenga mazu gha nyina, ndipo chingana ŵatimupuma, kuti wati ŵaphwere cha;

¹⁹ sono wiske ndi nyina ŵamukonge ndi kumutole ku ŵara ŵa msumba wake, pa likomo la malo penipo ŵaja.

²⁰ Ndipo iwo ŵaneniyenge ŵara ŵa msumba kuti, ‘Uyu mwana widu munthurumi ndi munonono ndi wakugaluka, kuti, wakhumba kuvwiya mazu ghidu cha; ndi nkharghe ndi muloŵevu.’

²¹ Sono ŵanthurumi wose ŵa msumba uwa ŵamudinenge ndi mya mpaka kufwa, viyo mupeyengemo uheni mukati mwinu, ndipo Yisraele yose wavwenge, ndi wopenge.

²² “Ndipo asani munthu wachita mrandu wakulangika ndi nyifwa ndi wabayika, ndipo mutumupayika pa muti,

²³ thupi lake kuti litandalenge usiku wose pa muti pa cha, kweni mumuŵikenge zuŵa lenilo. Pakuti munthu wakupayikika ngwakutembeka ndi Chiuta, kuti mukazuzgenge charu chinu cha chenicho Ambuya Chiuta winu watukupaskani kuŵa chihara.