Marangu 17 - Tonga Bible 1986

¹ “Kuti mukabayiyanga cha Ambuya Chiuta winu sembe ya ng'ombe pamwenga ya mberere yo ye ndi kalema, pamwenga kaheni ka mtundu we wose, chifukwa Ambuya Chiuta winu wakana ya viyo.

² “Asani kwasanirika nukati mwinu, mu mizi yinu yose yo Ambuya Chiuta winu watumupaskani, munthurumi pamwenga munthukazi yo walakwa mu maso gha Ambuya Chiuta winu, pakujumpha phanganu la Ambuya,

³ pakuteŵete ŵachiuta ŵanyake ndi kuŵasopa, pamwenga kusopa dazi, pamwenga mwezi, pamwenga che chose cha maliŵanja gha kuchanya, cho ndakanizga.

⁴ Ghaneneka kwaku imwe ndipo mwavwa makani gho viyo mukafumbiriyanga kwalwana. Ndipo asani nchakuneneska kuti chinthu cha ukazuzi waviyo chachitika mu Yisraele,

⁵ viyo mukatuzgiyanga kubwalo kwa malikomo ghinu munthurumi yo, pamwenga munthukazi yo wachita chinthu chiheni cha viyo. Ndipo mukamupong'anga ndi mya munthurumi yo pamwenga munthukazi yo ndi kumubaya.

⁶ Pa ukaboni wa ŵakaboni ŵaŵi pamwenga wa ŵatatu yo ngwakwenere kubayika, munthu kuti wakabayikanga cha pa ukaboni wa kaboni yumoza.

⁷ Manja gha ŵakaboni ndigho ghakudanga kumuko ndi kumubaya, ndipo pavuli manja gha ŵanthu wose. Viyo mutuzgengemo uheni mukati mwinu.

⁸ “Asani ku mizi kukaŵanga mrando we wose weniwo ngunonono, wakubaya, pamwenga wakususkana, pamwenga wakupumana, viyo mukasokanga ndi kukwere ku malo ghenigho Ambuya Chiuta winu wakasankhanga.

⁹ Muze ku ŵazukuru ŵaLevi, ndi kumweruzgi yo wepa nchitu ya weruzgi mu mazuŵa ghenigho. Mukafumbiriyanga kwaku iwo, ndipo ŵakakuneniyaninga kuti kasuskidu ndi yaka.

¹⁰ Sono imwe mukachitanga kwa kuyana ndicho wamuneniyani pa malo ghenigha Ambuya akasankhanga, ndipo mukaŵanga ŵakuphwere kuchita kwakuyana ndi vyose vyenivyo ŵamulongoni.

¹¹ Mukachitanga ndi kulangula kweniko wamupaskani, ndi kwakuyana ndi udumuliro weniwo wamutauliyani; mukachitanga, kuti mupeteriyenge pa dondo chakureka udumuliro weniwo wamutauliyani, manyi nkhu janja la marghe pamwenga la maze cha.

¹² Munthu mweniyo wakachitanga mazaza ghake, pakureka kuvwiya mzukuru mweniyo watuma kuteŵete penipa paurongo pa Ambuya Chiuta winu, pamwenga mweruzgi, yo munthu wakafwanga. Pakuchita viyo mukatuzgangamo uheni mu Yisraele.

¹³ Ndipo ŵanthu wose ŵakavwanga ndi ŵakawopanga, ndipo kuti ŵakachitanga mazaza gha pa mtima wawo so cha.

¹⁴ “Mutakuti mwaza ku charu chenicho Ambuya Chiuta watukupaskani, ndipo muchito kuŵa chinu ndi kuja mwenimo ndipo sono mukambenge kuti, ‘Ndikajimikiyanga karonga paku ndamwene, kwakukozgana ndi mitundu yose yinyake yeniyo yandizingiriya.’

¹⁵ Mujiŵikiye karonga mweniyo Ambuya Chiuta winu wakasankhanga, mukamikanga yumoza wakutuwa mu ŵabali ŵinu kuŵa karonga. Mungamikanga mlendo cha paku imwe mweniyo kuti ndi wa fuku linu cha.

¹⁶ Kweni wangadaniskanga ŵakavalo cha, pamwenga kutumizga ŵanthu ku Egipiti cha mwakuti wandaniske ŵakavalo, pakuti Ambuya akumukambiyani kale imwe kuti, ‘Mukawerenga so ku nthowa yiya cha.’

¹⁷ Ndipo wangaŵanga ndi ŵawoli ŵanandi cha, vinu mtima wake ungang'anamukiya pa dondo, chingana nkhuti wajandaniskiyenge ndrama za golide ndi siliva cha.

¹⁸ “Ndipo wachija iyo pa chitengo cha ufumu wake, wajilembiyenge mu buku dangu ili kulito mu buku lo le mu manja gha ŵazukuru ŵaLevi.

¹⁹ Ndipo wakalisunganga ndi wakaŵerenganga mwaku lo mazuŵa ghose gha umoyo wake, alinga kuti wasambilenge kopa Ambuya Chiuta wake, pakusunga mazu ghose gha dangu ili ndi malangulu yagha, ndi kughachita.

²⁰ Viyo mtima wake ureke kujikwezga pachanya pa ŵabali ŵake, ndi kuti wareke kusere pa dondo kupatukako ku dangu, manyi nkhu janja la marghe pamwenga ku la maze, alinga kuti wagonere ukongwa mu ufumu wake, iyo ndi ŵana ŵake, mu Yisraele.