Marangu 13 - Tonga Bible 1986

Ŵatenere kuchenje ndi ŵakuŵanyenga kuti ŵasopenge ŵangoza

¹ “Asani mukati mwinu muyuka nchimi pamwenga wakulota maloto, ndipo watumupaskani chizindikilo pamwenga chakuziziswa,

² Ndipo chizindikilo pamwenga chakuziziswa cho watumumukambiyani chituwaku, ndipo asani watiti, ‘Tiyeni tirondo ŵachiuta ŵanyake wo’, kuti mwaŵaziŵa kali cha, ndipo watiti, ‘Tiyeni tiŵateŵete,’

³ mungategherezganga mazu gha nchimi yo cha, pamwenga wakulota maloto yo cha. Chifukwa Ambuya Chiuta winu watumwesani kuti waziŵe pamwenga mutuŵanja Ambuya Chiuta winu ndi mtima winu wose ndi umoyo winu wose.

⁴ Mulondonge Ambuya Chiuta winu, ndi kumopa, ndi kusunga marangu ghake, ndi kuvwiya mazu ghake, ndipo mukamuteŵetiyanga ndi kubatikana nayo.

⁵ Kweni nchimi yiya pamwenga wakulota maloto yuwa wabayike chifukwa wakusambizgini kuti mugaruke ku Ambuya Chiuta winu, yo wamu tuzgani mu charu cha Egipiti ndi kumuwomboni ndi kumtuzgani mu nyumba ya uŵanda; ndichifukwa chakuti wamupatuskani kutuwa mu nthowa yeniyo Ambuya Chiuta winu wakumulanguliyani kwendamo. Viyo mutuzgengemo uheni mukati mwinu.

⁶ “Asani mbali wako, mwana wa anyoko, pamwenga wako munthurumi, pamwenga mwana wako munthukazi, pamwenga muwoli wako wapa mtima pamwenga mubwezi wako yo wenge mbumoyo wako, watukulandizga ku ubendi, kuti ‘Tiyeni tirutenge kwachiteŵete ŵachiuta ŵanyake,’ ŵeniwo imwe chingana mbauskemwe ŵalivi kuŵaziŵa kale,

⁷ ŵachiuta ŵanyake ŵa ŵanthu wo ŵamuzingirizgani ŵapafupi pamwenga ŵakutali kutuwa kwe kose pa charu,

⁸ mungamuzomerezganga pamwenga kumuvwiya cha. Chingana ndi jiso linu lingamufwiya lisungu cha. Pamwenga kumureka pamwenga kumubisa;

⁹ kweni mumubaye. Janja linu ndilo lidankhe kumikana nayo kumubaya ndipo pavuli, manja gha ŵanthu wose.

¹⁰ Mukamupong'anga mya kuti wafwe, chifukwa wapenjanga kumunyengani kuti muŵareke Ambuya Chiuta winu, yo wakumutuzgani mu charu cha Egipiti mu nyumba ya uŵanda.

¹¹ Wose ŵaYisraele ŵakavwanga ndi kopa, ndipo kuti ŵakachitanga so uheni waviyo cha mukati mwinu.

¹² “Asani mutuvwa mu umoza wa misumba yo Ambuya Chiuta winu watumupaskani kujamu,

¹³ kuti ŵanthurumi ŵaŵaka ŵanyake ŵatuwa mukati mwinu ndi kulandizga ŵanthu ŵamu msumba kuti, ‘Tiyeni tikateŵete ŵachiuta ŵanyake,’ wo mulivi kuŵaziŵa,

¹⁴ viyo mukafumbiske ndi kupenjeska, ndi kufumbiriya ndi phamphu. Ndipo asani mbuneneska, nchakupanikizgika kuti chinthu cha ukazuzi waviyo chachitika mukati mwinu,

¹⁵ mukabayanga wose ŵamu msumba wo ndi lipanga, kubwanganduwa wose teteti ndi ng'ombe zawo.

¹⁶ Mukawunjikanga vyakuskoŵa vyawo vyose pakatikati pa bwalo lawo, ndipo muwoche msumba ndi vyakuskoŵa vyake vyose ndi moto, nge ndi sembe yose yakocha ku Ambuya Chiuta winu. Msumba wo uŵenge ndundu muyaya, ndipo kuti ukazengekanga so cha.

¹⁷ Paŵevi kanthu kakutembeka ko mukasunge, kuti Ambuya aweko ku ukari wawo wakofya, ndi kukulongoni lisungu ndi kuŵa ndi chifundu paku imwe, ndi kukwandaniskani nge ndimo angurapiya ku auskemwe,

¹⁸ asani muvwiya mazu ghake, kusunga marangu ghake ghose gho ndimulanguliyani zuŵa lino, ndi kuchita cho nchakurunjika mu maso gha Ambuya Chiuta winu.