Malaki 2 - Tonga Bible 1986

¹ “Ndipo sono, imwe mwa ŵazukuru, dangu ili ndakwaku imwe.

² Asani mukarekanga kuvwa, asani mukarekanga kulisunga mu mtima kupereka unkhankhu kwaku ine, atiti Ambuya ŵa maŵanja, nkhatumanga thembo paku imwe, ndipo nditembenge vitumbiku vinu. Inya ndavitemba kali, chifukwa kuti mutilisunga lo mu mtima cha.

³ Ehe, nkhachenyanga mphapu yinu, ndi kupaka ulambwe pa visku vinu, ndipo ndimutuzgeningipo pa maso pangu.

⁴ Viyo mukaziŵanga kuti ndatuma dangu ili kwaku imwe, mwakuti phanganu langu ndi Levi, liŵe lakukho, atiti Ambuya ŵa maŵanja.

⁵ Phanganu langu ndi iyo; lenga phanganu la umoyo ndi chimangu, ndipo ndingumupaska ivi, mwakuti wawope, ndipo wangundopa, ndi wangunditenthema.

⁶ Wangusambizga chisambizgu cha uneneska ndipo ubudi kuti ungusanirika cha mu mlomo wake. Wangwenda nane mu chimangu ndi mu urunji, ndipo wanguwezga ŵanandi kusiya ubendezi.

⁷ Pakuti mlomo wa mzukuru utenere kusunga zeru, ndipo ŵanthu ŵatenere kupenja zeru pakumuvwa, chifukwa iyo ndi thenga la Ambuya ŵa maŵanja.

⁸ “Kweni imwe mwatuwamo mu nthowa; mwalandizga ŵanandi ndi chisambizgu chinu, mwananga phanganu laku Levi, atiti Ambuya ŵa maŵanja,

⁹ viyo ndimusanduskeninga kuŵa ŵakunyozeka, ndi ŵakuyuyulika pa maso pa ŵanthu wose, kwakuyana nge ndimo mwareke kusungiya nthowa zangu, kweni mwapenevya mu chisambizgu chinu.”

Kuwura kugomezgeka kwa ŵanthu ndi Chiuta

¹⁰ Kumbi kuti tose tendi uskefwe yumoza cha? Kumbi kuti tose tarengeka ndi Chiuta yumoza cha? Nanga chifukwa nchine tireka kugomezgana yumoza ndi munyake, ndi titananga phanganu la auskefwe?

¹¹ Yuda waŵa wambura chigomezgu, ndipo ukazuzi wachitika mu Yisraele ndi Yerusalemu, chifukwa Yuda wananga nyumba yakupaturika ya Ambuya, yo atanja, ndipo wato kuŵa muwoli wake mwana munthukazi waku chiuta mlendo.

¹² Chifukwa cha munthu wakuchita ivi, mphanyi Ambuya atuzgamo manyi ndi kaboni, pamwenga nkhoswe, pamwenga wakuza ndi sembe ku Ambuya ŵa maŵanja, mu mahema ghaku Yakobe.

¹³ Muzumbwiska jochero la Ambuya ndi masozi, ndi kuliya ndi kutamantha, chifukwa iyo kuti weche so kuphwere cha mpasku pamwenga kuuronde ku manja ghinu ndi ulemu.

¹⁴ Mufumba kuti, “Warekiyanji?” Chifukwa Ambuya ŵenga ŵakaboni ŵa phanganu pakati pako ndi muwoli wa uhurwa wako, kwaku mweniyo kuti waŵa wamagomekezgeka cha, chingana ndi bwezi lako lakusungana nalo, ndiso muwoli wako wa phanganu.

¹⁵ Kuti ndi Chiuta yumoza cha yo wakwata ndi kusungirizgiya ifwe mzimu wa umoyo? Ndipo nchine cho wakhumba? Mphapu yirunji. Viyo chenjeni, paulevi nanga njumoza waŵe wambura kugomekezgeka ku muwoli wa uhurwa wake.

¹⁶ “Chifukwa nditinkha chipata,” atiti Ambuya ŵa maŵanja, “viyo chenjeni mureka kuŵa ŵambura magomekezgeka.”

¹⁷ Mwavukiska Ambuya ndi mazu ghinu. Ndipuuli mutiti, “Taŵavukiska uli?” Pakukamba kuti, “Yose yo wachita uheni ngwamampha mu maso gha Ambuya, ndipo akondwa nayo.” Pamwenga pakufumba kuti, “Wepani Chiuta wa urunji?”