Luka 9 - Tonga Bible 1986

Yesu watuma ŵasambizgi ŵake chumi ndi ŵaŵi (12)

¹ Ndipo wanguti wadaniya pamoza chumi ndi ŵaŵi wo, wanguŵapaska nthazi ndi mtufu pa ŵademone wose, ndi kwachichizga matenda.

² Ndipo wanguŵatuma kwachimemeza ufumu waku Chiuta, ndi kuchizga ŵakutama.

³ Ndipo wanguŵanene, “Mungatole kanthu kapa nthowa cha, chingana ndi ndodo, chingana ndi katiri, chingana ndi chiŵande, chingana ndi ndrama, chingana nkhuŵa nayo minjirira yiŵi.

⁴ Ndipo mu nyumba yose mo mungasere, jaririyani mwenimo, ndi mwenimo tuwani.

⁵ Ndipo wose wo ŵarekenge kukurondeni, muchituwako ku muzi wuwa, kung'unthani ku marundi ghinu fuvu lo nge mbukaboni paku wo.”

⁶ Ndipo ŵachituwako, ŵaporotanga mu mizi, ŵakutaula evangeli ndi ŵakuchizga kosekose.

Kuzizikika kwaku Herode

⁷ Ndipo Herode wachinaikiru yo, wanguvwa vyakuchitika vyo; ndipo wanguzizikika ukongwa, chifukwa kunguneneka ndi ŵanyake, kuti, Yohane wayuskika ku ŵakufwa;

⁸ ndipo ndi ŵanyake, kuti, Eliya wawoneka; ndipo ndi ŵanyake, kuti mchimi yumoza wa mwaka wayuka.

⁹ Kweni Herode wanguti, “Yohane ndingumdumuwa mutu ine: kweni njani mwenuyu paku mweniyo ine nthuvwa vyaviyo?” Ndipo wapenjanga kumwona.

Yesu warghiska vyakurgha ŵanthu vikwi vinkhonde (5,000)

¹⁰ Ndipo ŵachiwe ŵakutumika wo, ŵangumkonkhome vyose vyo ŵanguchita. Ndipo wanguŵato ndi wanguruta nawo ku ubende kutuwa ku muzi wakutamulika Betesaida.

¹¹ Kweni mizinda yo yichiziŵa yingumrondo; ndipo wanguyironde, ndipo warongoronga nayo vyapa ufumu waku Chiuta, ndipo wachizganga ŵakukavuka uchizgu.

¹² Ndipo zuŵa lingwanda kuteghama; ndipo wo chumi ndi ŵaŵi ŵanguza, ndipo ŵangumunene, “Tuzgani mzinda wo, kuti ŵarutenge mu mizi ndi minda kwakuzunguliya ŵatandarenge, ndi ŵasaniyenge kamba: pakuti te muno mu malo gha bozwa.”

¹³ Kweni wanguŵanene, “Wapaskeni imwe kurgha.” Ndipo iwo ŵangunena, “Tirive ifwe kwakuruska viŵande vinkhonde ndi somba ziŵi. Kumbi mukhumba kuti tikaguliye khamu ili lose vyakurgha?”

¹⁴ Chifukwa kwenga akhumba ŵanthurumi vikwi vinkhonde (5,000). Ndipo wanguti ku ŵasambizi ŵake, “Muŵatekeske mu mabungwi mpaka akhumba gha machumi ghankhonde.”

¹⁵ Ndipo ŵanguchita viyo, ŵanguŵatekeska wose.

¹⁶ Ndipo wanguto viŵande vyo vinkhonde ndi somba zo ziŵi, ndipo wati walereska kuchanya, wanguvitumbika, ndipo wangumenya; ndipo wanguvipaska ku ŵasambizi kujarika paurongo pa mzinda wo.

¹⁷ Ndipo ŵangurgha ndi ŵanguguta wose: ndipo chingutolekako chakusiyika kwaku wo cha marivuvu, vidundu chumi ndi viŵi.

Petro wasimika kuti Yesu ndi Kristu mwana waku Chiuta

¹⁸ Ndipo kunguŵa wachiromba paku yija, ŵasambizi wo ŵenga pamoza nayo: ndipo wanguŵafumba, wakuti, “Mizinda yo yikamba kuti, ndine yani?”

¹⁹ Ndipo iwo pakwamuka ŵanguti, “Yohane Mbatizi yo; kweni ŵanyake, Eliya; ndi ŵanyake, mchimi yumoza wamwaka wayuka.”

²⁰ Ndipo wanguti kwaku iwo, “Kweni imwe mutiti ndine yani?” Ndipo Petro, wakwamuka, wanguti, “Kristu iyo waku Chiuta.”

Yesu wakamba ndi kukomwa Kwake ndi nyifwa yake

²¹ Kweni iyo wanguŵachinyiya, ndipo wanguŵalanguliya kunene chenichi chingana nkhu yumoza cha;

²² wakuti, “Kutenere Mwana wa munthu kukomwa vinandi, ndi kukanika ndi ŵara ndi ŵazukuru ŵara ndi ŵalembi, ndi kubayika, ndi pa zuŵa lachitatu kuyuskika.”

²³ Ndipo waŵaneniyanga wose, “Asani yumoza wakhumba kuza kuvuli kwangu, wajikanizge, ndi wajitole mphinjika yake zuŵa ndi zuŵa, ndi warondonge ine.

²⁴ Chifukwa mweniyo yose wangakhumba kutaska umoyo wake, wautayenge; kweni mweniyo yose wakautayanga umoyo wake pa chifwa chaku ine, mweniyo wautaskenge.

²⁵ Chifukwa munthu wajovya chine, pa kwanduwa charu chizirima, kweni kujitaya pamwenga kujananga?

²⁶ Chifukwa mweniyo yose wakanyariyenge ine ndi mazu ghangu, Mwana wa munthu wakanyariyenge iyo, penipo wakazanga mu unkhankhu wake, ndi wa Awiske, ndi ŵangelo ŵakhovu.

²⁷ Kweni ndikuneneskiyani, alipo ŵanyake ŵaku wo mbakuma panu, wo kuti ŵakesanga nyifwa cha, mpaka ŵauwona ufumu waku Chiuta.”

Kusanduka kwaku Yesu

²⁸ Ndipo kunguŵa nge ndi mazuŵa ghakhonde ndi ghatatu pavuli pa makani yagha, kuti wanguto Petro ndi Yohane ndi Yakobe, ndipo wangukwere mu phiri kwachiromba.

²⁹ Ndipo kunguŵa pa warombanga iyo, kaŵiru ka chisku chake kangusanduka, ndipo chivwaru chake chinguŵa chituŵa chakugadima.

³⁰ Ndipo onani, ŵarongoronga nayo ŵanthurumi ŵaŵi, Mosese ndi Eliya,

³¹ wo ŵanguwoneka mu unkhankhu ndipo ŵakambanga vya chiphumura chake, chenicho wakhasanga kufiskiya mu Yerusalemu.

³² Kweni Petro ndi wo ŵapamoza nayo ŵandotanga ndi tulu: kweni ŵanguti ŵaŵa maso, ŵanguwona unkhankhu wake, ndi wo ŵanthurumi ŵaŵi ŵakuma pamoza nayo.

³³ Ndipo kunguŵa kuti ŵachipatukako kwake iwo, Petro wanguti kwaku Yesu, “Ambuya, nkhwamampha kwaku ifwe kuŵa panu: ndipo tichite mahema ghatatu; limoza imwe, ndi limoza kwaku Mosese, ndi limoza kwaku Eliya;” wambura kuziŵa cho wakambanga.

³⁴ Ndipo wachikamba iyo vyenivi, unguŵapo mtambo, ndipo unguŵachinga mduzi; ndipo ŵangopa ŵachisere mu mtambo wo.

³⁵ Ndipo kunguŵa liyowozi lakutuliya mu mtambo mo, lakuti, “Uyu ndi Mwana wangu, wakutondoleka: vwaninga iyo.”

³⁶ Ndipo lati ladumuka liyowozi lo, wangusanirikapo Yesu yija. Ndipo iwo ŵangujaka chete, ndipo kuti ŵanguneniyapo yumoza cha mu mazuŵa gha chimoza chaku vyo ŵanguwona.

Yesu wachizga muhurwa wakufuntha

³⁷ Ndipo kunguŵa pa zuŵa la mlenji wake, ŵanguti ŵasika iwo ku phiri lo, ungukumana nayo mzinda ukuru.

³⁸ Ndipo onani, munthurumi wamu mzinda wo wangubongo, wakuti, “Muwomba, ndikuŵeyere kulerepo pa mwana munthurumi wangu, pakuti ndi mweniyo pe kwaku ine.

³⁹ Ndipo awona mzimu utumto, ndipo wakuta kwamabuchibuchi; ndipo utumviviriska phovu mokumoku, ndipo kwaunononu utuwako kwake, wakumupweteka.

⁴⁰ Ndipo ndinguŵeyere ŵasambazi ŵinu kuti ŵautuzgemu, ndipo ŵengavi nthazi.”

⁴¹ Ndipo Yesu wakwamuka, wanguti, “Mphapu yambura chivwanu ndi yakwanangika! Mpaka zuŵanji ndiŵenge pamoza namwe, ndipo ndikunthiyengepo namwe? Mtole kuno mwana wako.”

⁴² Ndipo weche kuza iyo, demone yo wangumtesuwa, ndi wangumviviriska viru-viru, kweni Yesu wanguuchenya mzimu wawiyu, ndi wangumchizga mhurwa, ndipo wangumwezge ku wiske.

⁴³ Ndipo ŵangutondwe limu wose pa mazaza gho ghaku Chiuta. Kweni ŵachizizwiya wose paku vyose vyenivyo Yesu wanguchita, wanguti ku ŵasambizi ŵake,

Yesu wakamba so ndi nyifwa yake

⁴⁴ “Imwe mujiŵikiye mu makutu ghinu mazu yagha; chifukwa Mwana wa munthu wakhasa kuperekeka mu manja gha ŵanthu.”

⁴⁵ Kweni kuti ŵanguwamu iwo cha mu kambidu lenili, ndipo lenga lakubisika kwaku wo, alinga ŵangaliziŵiska cha; ndipo wopanga kumfumba ndi kambidu lo.

Mura ndiyani?

⁴⁶ Ndipo yingubukamu mwawo suskanu yakuti, Njani wangaŵa mraku waku wo.

⁴⁷ Kweni Yesu wachiona suskanu yo ya mtima wawo wangutopo kana wangukajarika pa chipakatu chake,

⁴⁸ ndipo wanguti kwaku wo, “Mweniyo yose wangaronde kana yaka pa zina laku ine, waronde ine: ndipo mweniyo yose wangaronde ine, waronde wakundituma: chifukwa mumanaku yo waku mose ndiyo waŵenge mura.”

We yose yo kuti wamikana nafwe cha we kwaku ifwe

⁴⁹ Ndipo Yohane wakwamuka wanguti, “Akweni, tinguwona ngana wakutuzgiya ŵademone mu zina linu; ndipo tingumkanizga, pakuti walive kurondorana pamoza nafwe.”

⁵⁰ Kweni Yesu wangumunene “Mungakanizganga cha; chifukwa mweniyo yose kuti ngwa paku imwe cha we kwaku imwe.”

Muzi wa Samaria ukana kuronde Yesu

⁵¹ Ndipo kunguŵa, ghachiŵandika mazuŵa gha chirondeka chake kuchanya, kuti mwenecho wanguratiska chisku chake kuya ku Yerusalemu, ndipo wangutuma mathenga paurongo pa chisku chake;

⁵² ndipo ŵanguti ŵaruta ŵangusere mu muzi wa ŵaSamaria, kwachimrongosole.

⁵³ Ndipo kuti ŵangumronde cha, pakuti chisku chake chenga chakurata ku Yerusalemu.

⁵⁴ Kweni ŵanguti ŵawona chenichi ŵasambizi ŵake Yakobe ndi Yohane, wanguti, “Ambuya, mukhumba kwari kuti tidane moto kusikako kuchanya ndi kuŵananga?”

⁵⁵ Kweni wangung'anamuka, ndipo wanguŵachenya.

⁵⁶ Ndipo wanguya ku muzi unyake.

Kurondo Yesu

⁵⁷ Ndipo ŵachika iwo mu nthowa, yumoza wanguti kwaku iyo, “Ndazamrondo imwe kose ko mungaruta.”

⁵⁸ Ndipo Yesu wanguti kwake, “Akambwe ŵe nazo mphanji, ndipo tuyuni twa kuchanya vivimbu; kweni Mwana wa munthu walive pakusamira mutu.”

⁵⁹ Ndipo wanguti ku wamwenga, “Rondo ine.” Kweni iyo wanguti, “Ambuya, ndizomerezgeni kuruta danga kwachiŵika ŵada.”

⁶⁰ Kweni wanguti kwaku iyo, “Reka ŵakufwa wo kuŵika ŵakufwa ŵaku ŵija; kweni iwe ruta memeza ufumu waku Chiuta.”

⁶¹ Ndipo wamwenga nayo wanguti, “Ndazamrondo imwe, Ambuya; kweni danga ndizomerezgeni kwachirayirana ndi ŵamu nyumba yangu.”

⁶² Kweni Yesu wanguti kwaku iyo, “Palive yumoza wakuŵikapo janja lake pa chilimiru, ndi wakulereska ku vyakuvuli, ngwakwenere ku ufumu waku Chiuta.”